សម្តេចនាយករដ្ឋមន្ត្រី ហ៊ុន សែន ស្នើពលរដ្ឋ ជាពិសេសអ្នកបំពេញការងារនៅស្ថាប័នសាធារណៈទាំងអស់ ត្រូវប្រើអគ្គិសនីដោយសន្សំសំចៃ ខណៈអគ្គិសនីកម្ពុជា(EDC)ឈានដល់ដំណាក់កាលខាតបង់ជាលើកដំបូង នៅឆ្នាំ២០២២។ បើតាមសម្តេច ឆ្នាំនេះរដ្ឋនឹងបំពេញការខាតបង់របស់EDC រហូតដល់១០០លានដុល្លារ។
ស្របពេលដែលតម្លៃអគ្គិសនីនៅប្រទេសតំបន់និងពិភពលោកកំពុងឡើងថ្លៃខ្ពស់ សម្តេច ហ៊ុន សែន ប្រាប់ដល់ពលរដ្ឋនៅគ្រប់ទីកន្លែងទាំងអស់ ត្រូវយកចិត្តដាក់ឱ្យខ្ពស់បំផុតក្នុងការសន្សំសំចៃអគ្គិសនី ដោយត្រូវអនុវត្តចាប់ផ្តើមពីស្ថាប័នរដ្ឋទៅ ដើម្បីកាត់បន្ថយការខាតបង់។ លោកបានបញ្ជាក់ថា៖ «ព្រោះបើមិនធ្វើអ៊ីចឹងទេ! គឺយើងនឹងទទួលការខាតបង់កាន់តែធំ!»។
ក្នុងពិធីសំណេះសំណាលជាមួយប្រតិភូកីឡាអាស៊ានប៉ារ៉ាហ្គេម នៅថ្ងៃទី៦ កក្កដា ប្រមុខរដ្ឋាភិបាលរូបនេះបន្តមានប្រសាសន៍យ៉ាងដូច្នេះ៖ «ក្នុងឆ្នាំនេះ[ឆ្នាំ២០២២] តាមការគិតយើងខាតប្រមាណជា១០០លានដុល្លារ»។
បើតាមសម្តេច ការខាតបង់ជាលើកដំបូងរបស់EDC ដែលរដ្ឋាភិបាលត្រូវអន្តរាគមន៍នេះ គឺវាផ្តើមចេញពីសង្គ្រាមនៅប្រទេសអ៊ុយក្រែន និងការដាក់ទណ្ឌកម្មសេដ្ឋកិច្ចរបស់ប្រទេសមហាអំណាចពិភពលោកលើប្រទេសរុស្សី។
សម្រាប់ចុងឆ្នាំ២០២២នេះ សម្តេច ហ៊ុន សែន គ្រោងប្រកាសការបញ្ចុះថ្លៃអគ្គិសនីដល់ប្រជាពលរដ្ឋ ប៉ុន្តែផែនការនេះ អាចត្រូវពន្យារពេលវិញ ព្រោះតែរដ្ឋត្រូវបំពេញការខាតបង់របស់EDC។
បញ្ហានៃវិបត្តិជំងឺកូវីដ-១៩ ជាពិសេសសង្គ្រាមរវាងរុស្សីនិងអ៊ុយក្រែន ជាហេតុផលយ៉ាងចម្បងដែលធ្វើឱ្យប្រភពថាមពល ដូចជា ឧស្ម័ន ប្រេងឥន្ធនៈ ធ្យូងថ្ម រួមទាំងកាដឹកជញ្ជូននៅលើពិភពលោកឡើងថ្លៃឥតឈប់ឈរ មកទល់បច្ចុប្បន្ន។ បច្ច័យទាំងនេះ បានបង្កឱ្យថ្លៃដើមក្នុងការផលិតអគ្គិសនីនៅកម្ពុជាក៏ដូចជាប្រទេសដទៃទៀត មានការកើនឡើងខ្ពស់ដែលមិនធ្លាប់មានពីមុន។ នេះជាការលើកឡើងរបស់លោក កែវ រតនៈ អគ្គនាយកអគ្គិសនីកម្ពុជា(EDC)។
បើតាមលោក រតនៈ គ្រប់ប្រទេសដែលរងប៉ះពាល់ពីការឡើងថ្លៃនៃប្រភពថាមពលនេះ ដូចជានៅប្រទេសថៃ សិង្ហបុរី អូស្រ្តាលី និងអង់គ្លេស...ជាដើម គឺបានដំឡើងថ្លៃអគ្គិសនីរៀងខ្លួនអស់ទៅហើយ ដើម្បីទប់ទល់ការខាតបង់នៃការលក់អគ្គិសនី។ លោកថ្លែងប្រាប់សារព័ត៌មានថ្មីៗ(ThmeyThmey) តាមទូរសព្ទនារសៀលថ្ងៃទី៦កក្កដា ថា៖ «ប៉ុន្តែនៅកម្ពុជា គឺមិនមានកើនឡើងថ្លៃអគ្គិសនីក្នុងឆ្នាំ២០២២នេះទេ ដែលធ្វើឱ្យយើងខាត ព្រោះតែថ្លៃដើមផលិតអគ្គិសនីខ្ពស់ជាងមុន តែការលក់រក្សាថ្លៃដដែល។ ដូច្នេះ យើងមានការខាតថវិកា ដែលរដ្ឋត្រៀមបញ្ចេញថវិកាជាតិ ដើម្បីបំពេញការខាតរបស់យើង»។
ការខាតបង់របស់EDCក្នុងឆ្នាំ២០២២ អាចមានទំហំដល់១០០លានដុល្លារ ឬលើសពីនេះ ប្រសិនបើប្រភពថាមពលនៃការផលិតអគ្គិសនី នៅតែបន្តឡើងថ្លៃ។ លោក កែវ រតនៈ បានបញ្ជាក់ថា៖ «នេះគ្រាន់តែជា ការព្យាករទេ! ការខាតបង់ជាក់ស្តែងប្រចាំឆ្នាំនេះ គឺអាស្រ័យលើប្រេងឥន្ធនៈនៅទីផ្សារពិភពលោកបន្តឡើងថ្លៃ ឬក៏ធ្លាក់ចុះ នារយៈពេល៦ខែខាងមុនទៀត។ បើតម្លៃប្រេងឥន្ធនៈដែលយើងទិញចូលបន្តឡើងថ្លៃទៀត យើងនឹងខាតច្រើនជាងហ្នឹងទៀត។ ផ្ទុយមកវិញ បើតម្លៃប្រេងឥន្ធនៈចុះថោក យើងនឹងកាត់បន្ថយការខាតបង់ថវិកាទៅតាមហ្នឹងដែរ»។
បច្ចុប្បន្ន ការប្រើប្រាស់អគ្គិសនីប្រចាំថ្ងៃនៅកម្ពុជា មានខ្ពស់បំផុតក្នុងកម្រិត ២ ២០០មេហ្កាវ៉ាត់។ ពេលវេលាដែលពលរដ្ឋប្រើអគ្គិសនីដល់ទំហំនេះ គឺស្ថិតនៅចន្លោះម៉ោង៨ព្រឹកដល់៥ល្ងាច រៀងរាល់ថ្ងៃច័ន្ទដល់សុក្រ។ ដោយឡែក ប្រភពអគ្គិសនីដែលកម្ពុជាកំពុងប្រើប្រាស់នេះ មានពីប្រភពថាមពលស្អាតនិងកកើតឡើងវិញ(វារីអគ្គិសនី, ថាមពលព្រះអាទិត្យ, ថាមពលជីវម៉ាស់)ចំនួន៦១ភាគរយ, ប្រភពពីរោងចក្រធ្យូងថ្មមានជាង៣៣ភាគរយ និងប្រភពប្រេងឥន្ធនៈមានក្រោម៥ភាគរយ។ នេះជាការរៀបរាប់បន្ថែមរបស់ លោករដ្ឋមន្ត្រីប្រតិភូអមនាយករដ្ឋមន្ត្រីទទួលបន្ទុកជាអគ្គនាយកអគ្គិសនីកម្ពុជា។
បើតាមអាជ្ញាធរអគ្គិសនី ការប្រើប្រាស់អគ្គិសនីតាមលំនៅដ្ឋាន មានតម្លៃ៣៨០រៀលក្នុងមួយគីឡូវ៉ាត់(kWh)សម្រាប់អ្នកប្រីអគ្គិសនីចាប់ពី១ដល់១០kWhក្នុងមួយខែ។ តម្លៃនេះ កើនដល់៤៨០រៀលក្នុងមួយ kWh ចំពោះអ្នកប្រើអគ្គិសនីអស់ពី១១ដល់៥០kWhក្នុងមួយខែ និងតម្លៃ៦១០រៀលក្នុងមួយkWhសម្រាប់អ្នកប្រើអគ្គិសនីអស់៥១ដល់២០០ kWhក្នុងមួយខែ។ រីឯតម្លៃ៧៤០រៀលក្នុងមួយkWh គឺចំពោះអ្នកប្រើអគ្គិសនីអស់ចាប់ពី២០១kWh ឡើងទៅក្នុងមួយខែ៕