រដ្ឋមន្ត្រីក្រសួងពាណិជ្ជកម្ម​កម្ពុជា និង​លោក Thani bin Ahmed Al Zeyoudi អនុរដ្ឋមន្ត្រីពាណិជ្ជកម្មអន្តរជាតិអេមីរ៉ាតអារ៉ាប់រួម បានជួបពិភាក្សាគ្នា​តាម​ប្រព័ន្ធ​វីដេអូ កាលពីពេល​ថ្មីៗ​កន្លងមក​នេះ។ បើតាមសេចក្តីប្រកាសព័ត៌មានរបស់ក្រសួងពាណិជ្ជកម្ម ជំនួបនេះធ្វើឡើងក្នុងគោលបំណងជំរុញ និងពង្រីកបន្ថែមនូវកិច្ចសហប្រតិបត្តិការគ្រប់វិស័យ ដើម្បីជំរុញឱ្យមានលំហូរវិនិយោគ និងបង្កើនទំហំពាណិជ្ជកម្មទ្វេភាគីរវាងកម្ពុជា និងអេមីរ៉ាតអារ៉ាប់រួម។

 

លោក ប៉ាន សូរស័ក្តិ បានលើកឡើងថា អេមីរ៉ាតអារ៉ាប់រួម គឺជាទីផ្សារដ៏ធំមួយដែលឈរក្នុងលំដាប់ទី២៦ សម្រាប់ការនាំចេញទំនិញមកពីកម្ពុជា។ ទោះបីស្ថិតក្នុងបរិបទនៃការរីករាលដាលជំងឺកូវីដ-១៩ក្ដី ក៏ទំហំពាណិជ្ជកម្មទ្វេភាគីរបស់ប្រទេសទាំងពីរសម្រេចបានប្រមាណ ១៥០លានដុល្លារក្នុងឆ្នាំ២០២១ ដែលកើនឡើង៥៣ភាគរយ ធៀបនឹងឆ្នាំ២០២០។ នេះបើយោងតាមទិន្នន័យរបស់ក្រសួងពាណិជ្ជកម្មកម្ពុជា។

 

ទំនិញដែលនាំចេញពី​កម្ពុជាទៅកាន់អេមីរ៉ាតអារ៉ាប់រួមមានដូចជា​វាយនភណ្ឌ ស្បែកជើង ផលិតផលធ្វើដំណើរ កង់ អង្ករ ...។ ដោយឡែកចំពោះមុខទំនិញដែលនាំចូលពីអេមីរ៉ាតអារ៉ាប់រួម មានដូចជា ផលិតផលប្រេង ចំណីសត្វ ជី  រ៉ែ  ថ្នាំជក់ និងផលិតផលធ្វើពីសេរ៉ាមិកជាដើម។ 

 

សូមរំលឹក​ថា កាលពី​ព្រឹត្តិការណ៍ពិព័រណ៌ពិភពលោក ២០២០ ឌូបៃ កម្ពុជាបានទទួលពានរង្វាន់ប្រាក់ពិភពលោក លើការរចនាពន្លាជាតិល្អជាងគេ ៕