ភ្នំពេញ៖ សាច់ក្រពើ ងៀតក្រពើ និងខ្លាញ់ក្រពើ មានជាហូរហែ ក្នុងសង្កាត់ព្រែកកំពឹស ខណ្ឌដង្កោរាជធានីភ្នំពេញ។ បើសិនលោកអ្នកធ្វើដំណើរតាមបណ្តោយផ្លូវជាតិលេខ២ នោះនឹងឃើញតូបនីមួយៗដាក់លក់សាច់ក្រពើស្រស់ ដែលពន្លាត់ស្បែករួចរាល់ ដោយខ្លះកាត់ជាដុំ ខ្លះដាក់តាំងលក់ទាំងមូល។ ក្រៅពីសាច់ក្រពើ តូបនីមួយៗក៏មានដាក់លក់ងៀតក្រពើ និងខ្លាញ់ក្រពើផងដែរ។

សាច់ក្រពើទាំងនេះ អាជីវករលក់ក្នុងតម្លៃ១គីឡូក្រាម ១ម៉ឺនរៀល ចំណែកខ្លាញ់ក្រពើមានតម្លៃចាប់ពី៥ពាន់រៀល ដល់១ម៉ឺនរៀល រីឯងៀតក្រពើ មានតម្លៃ ២៥០០០រៀលក្នុងមួយគីឡូក្រាម។ បើតាមអ្នកស្រី ខឿន សម្ភស្ស ដែលជាអាជីវករលក់សាច់ក្រពើម្នាក់បានប្រាប់សារព័ត៌មាន ThmeyThmey25 ឱ្យដឹងថា មួយថ្ងៃអ្នកស្រីអាចលក់បាន ២ទៅ ៣ក្បាល។ ប្រសិនបើថ្ងៃចុងសប្តាហ៍អាជីវកររូបនេះអាចលក់អស់រហូតដល់ ៥ក្បាល។