គម្រោងស្រូវសរីរាង្គមិត្តភាពសង្គ្រោះសត្វព្រៃ ឬស្រូវត្រយ៉ង ត្រូវបានគាំទ្រដោយ​សហគមន៍ ដើម្បីទ្រទ្រង់ដំណាំកសិកម្ម និងការពង្រឹងសមត្ថភាពកសិករ សំដៅ​លើកកម្ពស់ជីវភាព និងធនធានធម្មជាតិ។ ប្រជាសហគមន៍នៅក្នុងដែនជម្រកសត្វព្រៃគូលែនព្រហ្មទេព ដែនជម្រកសត្វព្រៃឆែប និងដែនជម្រកសត្វព្រៃព្រះរកា និងសហគមន៍រំដួលម្លូព្រៃជាយដែន ស្ថិតក្នុងខេត្តព្រះវិហារ សុទ្ធតែបាន​ដាំ​ស្រូវ​សរីរាង្គ​មិត្តភាពសង្គ្រោះសត្វព្រៃ ឬស្រូវត្រយ៉ង។ ប្រជាសហគមន៍ទាំងនោះ បានបង្ហាញការគាំទ្រជាមួយនឹងគម្រោងនេះ ព្រោះធ្វើ​ឱ្យ​ជីវភាពពួកគេ​មានភាពប្រសើរជាងមុន។
  

 

បើតាម​ក្រសួង​បរិស្ថាន ការទិញ- លក់ស្រូវត្រយ៉ង និងស្រូវសរីរាង្គ របស់ប្រជាសហគមន៍នៅក្នុង ខេត្តព្រះវិហារត្រូវឆ្លងកាត់ការត្រូវពិនិត្យយ៉ាងល្អិតល្អន់ពីអ្នកជំនាញចំណីអាហារ។ ជាមួយគ្នានេះ ស្រូវសរីរាង្គ ត្រូវបានដាំដុះដោយប្រើប្រាស់ជីធម្មជាតិ គ្មានសារធាតុគីមី ឬសារធាតុពុល ដែលធ្វើឱ្យប៉ះពាល់ដល់សុខភាពអ្នកបរិភោគ។
 

គួរបញ្ជាក់ដែរថា របាយការណ៍របស់មន្ទីរកសិកម្ម ខេត្តព្រះវិហារ នៅឆ្នាំ២០២១កន្លងទៅ មានសហគមន៍ផលិតស្រូវសរីរាង្គចំនួន៣២ បានចុះកិច្ចសន្យាទិញ-លក់ស្រូវទៅឱ្យក្រុមហ៊ុនក្នុង និងក្រៅស្រុកចំនួន៤ផងដែរ។ ក្នុងបរិមាណ១ ៩៨៥០តោន ដោយមានសមាជិកផលិតចំនួន ៤៨១០គ្រួសារ លើផ្ទៃដី១៧៦១៨ហិកតា៕