​ក្រៅពីការជួយបណ្តុះបណ្តាលគ្រូពេទ្យកម្ពុជាហើយ ភាគីគុយបា ក៏បានឯកភាពថានឹងពិនិត្យលទ្ធភាពបន្ថែម ក្នុងការអាហារូបករណ៍ដល់និស្សិតកម្ពុជាសិក្សាផ្នែកសុខាភិបាលឱ្យបានច្រើន ព្រមទាំងពិចារណាផ្តល់អាហារូបករណ៍​ថ្នាក់ឯកទេសព្យាបាលជំងឺមហារីក ដល់និស្សិតខ្មែរ៣រូប ដែល​កំពុងសិក្សាថ្នាក់វេជ្ជបណ្ឌិត​នៅប្រទេសគុយបាផងដែរ។ ទន្ទឹមនឹងនេះ​ ​កម្ពុជាបានលើកទឹកចិត្តឱ្យ​គុយបា នាំ​ផលិតផលសម្រាប់ព្យាបាលដំបៅបង្កដោយជំងឺទឹកនោមផ្អែមមកកម្ពុជាផងដែរ ដើម្បីកាត់បន្ថយជាអតិប្បរមាអត្រាប្រឈមខ្ពស់ទៅនឹងការកាត់អវយវៈ។ 

នៅអំឡុងឆ្នាំ២០២៣ ខាងមុខនេះ ក៏នឹងមានទស្សនកិច្ចផ្លាស់ប្តូរបទពិ​សោធន៍របស់ភាគីគុយបា ​នៅប្រទេសកម្ពុជាផងដែរ ដើម្បីស្វែងរកឱកាសធ្វើកិច្ចសហប្រតិ​បត្តិការថ្មីៗបន្ថែមទៀត។ លើសពីនេះ ភាគីគុយបា នឹងធ្វើការជាមួយភាគីពាក់ព័ន្ធ ក្នុងការបន្តសុពលភាពបញ្ជិកាឱសថ និងវ៉ាក់សាំង ដែលធ្លាប់បានចរាចរនៅកម្ពុជា ព្រមទាំងបន្តជំរុញការនាំយកឱសថ វ៉ាក់សាំង ឬសម្ភាៈ និងបរិក្ខារពេទ្យរបស់គុយបាទៅកម្ពុជា ទន្ទឹមនឹងបំណងរបស់គុយបា ក្នុងការពង្រីកកិច្ចសហប្រតិបត្តិការលើធុរកិច្ចឱសថជាមួយកម្ពុជាបន្ថែមផងដែរ។ 

 

បើតាមសេចក្តីជូនព័ត៌មានរបស់ក្រសួងសុខាភិបាលកម្ពុជាអំពីលទ្ធផលនៃទស្សនកិច្ចនេះ ការងារដែលបានឯកភាពខាងលើ នឹងអាចចាប់ផ្តើមអនុវត្តពីឆ្នាំ២០២៣ ​បន្ទាប់ពីភាគីកម្ពុជា ​បញ្ជាក់ផែនការ និងតម្រូវការជាលាយលក្ខណ៍អក្សរ ​តាមយន្តការការទូត​។ 

សូមជម្រាបថា ​ទស្សនកិច្ចផ្លូវការរបស់ប្រតិភូកម្ពុជា នៅប្រទេសគុយបា ​មានគោលបំណង​ពង្រឹងកិច្ចសប្រតិបត្តិការក្នុងវិស័យសុខាភិបាល ពិសេសផ្តោត​លើការពិនិត្យលទ្ធភាព ធ្វើកិច្ចសហការផ្នែកឱសថ សម្រាប់ការព្យាបាលជំងឺមហារីក និងជំងឺទឹកនោមផ្អែមជាដើម វ៉ាក់សាំងសម្រាប់បង្ការជំងឺកុមារ និងជំងឺកូវីដ-១៩ ឧបករណ៍ បរិក្ខារពេទ្យជាដើម។ ទស្សនកិច្ចនេះ ក៏ផ្តល់ឱកាស​ឱ្យប្រតិភូកម្ពុជា ស្វែងយល់បន្ថែមពីការងារថែទាំសុខភាពបឋម របស់ប្រទេសគុយបា និងការបណ្តុះបណ្តាលធនធានមនុស្ស ផ្នែកវេជ្ជសាស្ត្រទូទៅ និង​ឯកទេសផងដែរ។ 

 

អំឡុងទស្សនកិច្ចនេះ លោកស្រី ឱ វណ្ណឌីន និងគណៈប្រតិភូ បានធ្វើទស្សនកិច្ចសិក្សា នៅមជ្ឈមណ្ឌលត្រួតពិនិត្យឱសថ រោងចក្រផលិតវ៉ាក់សាំង រោងចក្រផលិតឱសថ ជាពិសេសឱសថព្យាបាលជំងឺមហារីក និងទឹកនោមផ្អែម មន្ទីរពេទ្យ និងមជ្ឈមណ្ឌលព្យាបាលជំងឺមហារីកជាតិគុយបា។ ​គណៈប្រតិភូ ក៏បានពិនិត្យ ស្វែងយល់ និងពិភាក្សាអំពីការងារផ្តល់សេវាសុខភាពបឋម និងការផ្គត់ផ្គង់ឱសថដល់ឱសថស្ថាន និងដល់អ្នកជំងឺនៅក្នុងសហគមន៍ នៃប្រទេសគុយបា​ផងដែរ៕