ស្រុកកំពង់ស្វាយ, កំពង់ធំ៖ សាលាបឋមសិក្សាក្ដីដូង ស្ថិតក្នុងភូមិក្ដីដូង ឃុំក្ដីដូង ស្រុកកំពង់ស្វាយ ខេត្តកំពង់ធំ ត្រូវការសៀវភៅបន្ថែមសម្រាប់សិស្សអាន ដាក់ក្នុងបណ្ណាល័យ ដោយសារសៀវភៅមួយមួយចំនួន ក្នុងបណ្ណាល័យចាស់ និងសៀវភៅដដែល ដែលសិស្សអានរួច។ 

 

នៅសាលាបឋមសិក្សាក្ដីដូង មានសៀវភៅសម្រាប់សិស្សអាននៅក្នុងបណ្ណាល័យ មានប្រមាណ១ពាន់ក្បាល ក្នុងនោះមានជាប្រភេទរឿងនិទានខ្លី, ប្រលោមលោក, សៀវភៅអប់រំ និងសៀវភៅបំណិនជីវិត​ជាដើម។ ប៉ុន្តែសៀវភៅទាំងនោះ លោក ហេង សារ៉ុម ដែលជានាយករងនៃសាលាបឋមសិក្សាក្ដីដូង លើកឡើងថា បានមកពីមន្ទីរអប់រំ អង្គការ និងសប្បុរសជនជាដើម។  លោក ហេង សារ៉ុម បន្ថែមដូច្នេះថា៖ «បច្ចុប្បន្ន សៀវភៅក្នុងបណ្ណាល័យខ្វះដែរ ដោយសារ (សៀវភៅ) រឿងវាដដៃល។ តាំងពីកូវីដ-១៩មក យើងមិនដែលទិញចូលទេ។ ប៉ុន្តែមិនទាន់មានអង្គការ ឬខាងសហគមន៍ណា គេជួយថែមទៀតទេ។ ហើយសៀវភៅខ្លះនោះ មានចាស់ខ្លះខូចខ្លះទៅ ប្រហែលជា២០ភាគរយ»។ 

 

សៀវភៅខ្លះចាស់ និងខ្លះជាសៀវភៅដដែលសម្រាប់សិស្សអាន កន្លងមកសាលាមួយនេះ ក៏ធ្លាប់ស្នើសុំសៀវភៅអានបន្ថែម​ សម្រាប់ដាក់បណ្ណាល័យ ទៅកាន់មន្ទីរអប់រំខេត្តកំពង់ធំ​ដែរ ប៉ុន្តែមិនទាន់បានការឆ្លើយតបនៅឡើយ​។ ​«ខាងរដ្ឋយើង ខ្ញុំតែងដាក់សំណើស្នើសុំរហូតដែរតែអត់បាន។ បានតែសៀវភៅសិក្សាគោល សៀវភៅរឿងនិទានអីអត់បានទេ ប្រហែលជាគ្មានកម្មវិធីហ្នឹង»។ នេះបើតាមការអះអាងរបស់លោក ហេង សារ៉ុម ដោយលោកបន្តទៀតថា សៀវភៅ ឬបណ្ណាល័យនេះ មានសារៈសំខាន់ណាស់ សម្រាប់សិស្សានុសិស្ស។ នាយករងសាលារូបនេះ បាន​ប្រដូចការអានសៀវភៅ ដូចទៅនឹងគ្រូបង្រៀន ដល់សិស្សានុសិស្សដូច្នោះដែរ។ លោកពន្យល់បន្ថែមដូច្នេះ៖ «បណ្ណាល័យមានសារៈសំខាន់ ព្រោះបណ្ណាល័យជួយពង្រីកចំណេះដឹងការអាន និងការសរសេរ»។ 
 

ដោយទទួលស្គាល់ពីសារៈសំខាន់នេះ សាលាមួយនេះ បានបែងចែកវេនចូលបណ្ណាល័យតាមថ្នាក់នីមួយៗ ដើម្បីប្រាកដថា សិស្សទាំងនោះបានចូលបណ្ណាល័យ ក្រៅពីម៉ោងសេរី ដែលសិស្សអាចចូលបណ្ណាល័យបាន។ ក្រៅពីរៀបចំវេនចូលបណ្ណាល័យ លោកនាយករងថា សិស្សទាំងនោះ ត្រូវយកសៀវភៅសរសេរទៅជាមួយ ដើម្បីកត់រាល់ពាក្យ ដែលពួកគេឆ្ងល់ ឬមិនយល់ រួចស្វែងរកពាក្យទាំងនោះ នៅក្នុងវចនានុក្រម សម្ដេចសង្ឃរាជ ជួន ណាត​។ 
 

​បើកទ្វារបង្រៀនតាំងពីឆ្នាំ១៩៨០ សាលាបឋមសិក្សាក្ដីដូង មានទីតាំងស្ថិត​ក្នុងភូមិក្ដីដូង ឃុំក្ដីដូង ស្រុកកំពង់ស្វាយ ខេត្តកំពង់ធំ​។ បច្ចុប្បន្នសាលា​នេះ មានបង្រៀនចាប់ពីថ្នាក់មេតេយ្យសិក្សា រហូតដល់ថ្នាក់ទី៦ ដោយមានសិស្សសរុប ២៤២នាក់ ក្នុងនោះសិស្សស្រីមាន១១៧នាក់។ ចំណែកគ្រូបង្រៀនមានចំនួន១០នាក់ ក្នុងនោះគ្រូជាស្ត្រីចំនួនស៤នាក់៕

 

អានអត្ថបទពាក់ព័ន្ធផ្សេងទៀត៖ យុវជនសកម្ម សេវាល្អ