ជុំវិញករណីរំលោភបំពានផ្លូវភេទនេះ លោក លៀង កែវ បញ្ជាក់ថា រយៈពេលជាង១០ឆ្នាំមកហើយ ដែលនៅក្នុងឃុំខ្លួន មិនដែលមានករណីរំលោភបំពានលើស្ត្រី និងកុមារីនេះកើតឡើង​។ លោកពន្យល់បន្ថែមដូច្នេះ៖ «កាលពីប្រហែលជាង១០ឆ្នាំមុនអី វា(ករណីរំលោភផ្លូវភេទ)មានខ្លះៗដែរ។ ប្រហែលជា១ ឬ២ករណីអីដែរ ដែលកើតលើក្មេងពេញវ័យ។ ខ្លះត្រូវគ្នាដល់ក្រោយមក ខ្លាចម៉ែឪអី ក៏ទៅជាប្ដឹងវិញចឹង និងមានក្មេងដូចជា១ករណីអីដែរ ជាករណីឪពុកនឹងកូន»។ 
 

សម្រាប់លោកមេប៉ុស្ដិ៍រូបនេះ ករណីដែលបង្កជាករណីរំលោភបំពានកើតឡើង គឺបណ្ដាលមកពីយុវជន ឬអ្នកប្រព្រឹត្តនោះមិនមានចំណេះដឹង, ការប្រើប្រាស់គ្រឿង, សេពគ្រឿងស្រវឹង និងមើលវីដេអូអាសអាភាសជាដើម។ ចំណែកករណីមួយចំនួនទៀត ជាការរួមភេទដោយព្រមព្រៀងគ្នា តែក្រោយមកប្ដឹងខាងប្រុសវិញ ពេលឪពុកម្ដាយដឹងជាដើម។ កន្លងមកអ្នកប្រព្រឹត្តត្រូវបានដោះស្រាយ តាមផ្លូវច្បាប់ ពោលគឺកសាងសំណុំរឿងទៅតុលា ដោយចាត់ការតាមនីតិវិធីច្បាប់។ 
 

បើតាមសម្ដីរបសស់លោក លៀង កែវ ករណីរំលោភបំពានមានភាពប្រសើរនេះ ដោយសារការដាក់ចេញនូវគោលនយោបាយភូមិ ឃុំ សង្កាត់ មានសុវត្ថិភាព ទាំង៧ចំណុច របស់រដ្ឋាភិបាលកម្ពុជា។ ទន្ទឹមនឹងនោះ អាជ្ញាធរមានសមត្ថកិច្ច ក៏តែងតែចុះអប់រំ ផ្សព្វផ្សាយ លើបញ្ហាការរំលោភបំពានផ្លូវភេទលើស្ត្រី​ និង ផ្លូវច្បាប់ជាដើម។ 
 

ជាមួយគ្នានេះ លោក លៀង កែវ ក៏បន្តការអំពាវនាវដល់អាណាព្យាបាល ដែលមានក្មេងស្រី ឱ្យមានការប្រុងប្រយ័ត្ន ជាពិសេសកុំឱ្យពួកគេទៅឃ្វាលគោ ឬទៅកន្លែងស្ងាត់ ឬទុកនៅផ្ទះម្នាក់ឯងឡើយ ដើម្បីចៀសវាង ការរំលោភបំពាននេះកើតឡើង ជាយថាហេតុណាមួយ៕