មូលហេតុដែលបណ្ដាលឱ្យផ្លូវខូចខាតនេះ ត្រូវបានលោក ថូ ថាំង មេឃុំក្តីដូង  មើលឃើញថា ដោយសារការដឹកជញ្ជូន ដោយឡានដឹកដីលក់ ឡានដឹកខ្សាច់ ឡានដឹកស្រូវ និងគ្រោះទឹកជំនន់។ លោកបន្ថែមថា បញ្ហាទឹកជំនន់ឆ្នាំនេះ មានសភាពធ្ងន់ធ្ងរជាងឆ្នាំមុនៗ។ 
  

 

លោកមេឃុំបានអះអាងទៀតថា បើទោះជាឃុំដឹងពីមូលហេតុ នៃការខូចខាត ដោយសារការដឹកជញ្ជូនក៏ដោយ ក៏អាជ្ញាធរឃុំមិនអាចបញ្ឈប់អាជីវកម្មទាំងនោះបានឡើយ។ លោក ថូ ថាំង ពន្យល់បន្ថែម៖«ខាងអ្នកឡានដឹកដីគេមានអាជ្ញាបណ្ណពីខេត្តរបស់គេ យើងឃាត់អត់បានទេ។ ឡានដឹកស្រូវ ប្រជាជនធ្វើស្រែទៅ បើមិនអាចគាត់ដឹក ស្រូវវាស្ទះ។ បើផ្នែកខាងដឹកខ្សាច់បើខូច គេធ្វើសង»។ 
 

បើតាមលោកមេឃុំក្តីដូង គ្រោះទឹកជំនន់នេះ បណ្ដាលឱ្យផ្លូវក្នុងឃុំខូចខាត និងដាច់ដោយអន្លើៗ សរុបចំនួន១៩កន្លែង និងបាក់លូផងដែរ។ នាកិច្ចសម្ភាសន៍ជាមួយយុវជនឃុំក្ដីដូង កាលពីចុងខែវិច្ឆិកា លោក ថូ ថាំង មេឃុំក្ដីដូង បញ្ជាក់ថា ការខូចខាតហេដ្ឋារចនាសម្ព័ន្ធមិនដូចគ្នានោះទេ។ ដូច្នេះមុននឹងជួសជុលហេដ្ឋារចនាសម្ព័ន្ធខូចខាតទាំងនោះ សមាជិកឃុំត្រូវពិភាក្សា ដើម្បីដាក់ចុះអាទិភាព ដល់ភូមិដែលខូចខាតធ្ងន់ជាងគេ និងជាបន្តបន្ទាប់។ នេះជាការអះអាងរបស់ លោក លោក ថូ ថាំង មេឃុំក្ដីដូង។ 
 

ពាក់ព័ន្ធនឹងការធ្វើ ឬជួសជុលផ្លូវវិញ គឺត្រូវកាត់ការដាច់ថ្លៃជួសជុលពីក្រុមហ៊ុនធ្វើផ្លូវយ៉ាងតិច៣ស្ថាប័ន ទើបអាចដំណើរការធ្វើ ឬជួសជុលបាន។ ហើយការជួសជុល ឬធ្វើផ្លូវទៀតសោត ត្រូវទទួលបានយល់ព្រមពីពលរដ្ឋក្នុងឃុំ យ៉ាងតិច៦០ភាគរយផងដែរ នេះបើតាម លោក ថូ ថាំង៕

 

អានអត្ថបទពាក់ព័ន្ធផ្សេងទៀត៖ យុវជនសកម្មសេវាល្អ