បន្ទាប់ពីគ្រោះទឹកជំនន់ស្រកចុះ អាជ្ញាធរឃុំក្ដីដូង បានវាយតម្លៃនៃការខូចខាត។ លោក ថូ ថាំង មេឃុំក្ដីដូងបានប្រាប់ប្រាប់យុវជនឃុំក្ដីដូង កាលពីចុងខែវិច្ឆិកាថា គ្រោះទឹកជំនន់បានធ្វើឱ្យស្រូវពលរដ្ឋជាង ៧០០ហិកតា ត្រូវខូចខាត។ ចំណែកផ្លូវ និងលូ បាក់បែកជាអន្លើៗចំនួន១៩កន្លែង។ 
  

បន្ទាប់ពីស្ថានភាពខាងលើនេះ លោក ថូ ថាំង បញ្ជាក់ថា ការអភិវឌ្ឍ និងជួសជុលផ្លូវឡើងជាអាទិភាពសំខាន់ជាងគេ និងជាសកម្មភាពការងារចម្បង ក្នុងគម្រោងអភិវឌ្ឍន៍ឆ្នាំ២០២៣។ លោក អះអាងបន្ថែមទៀតថា៖ «មិនមានអ្វីសំខាន់ជាងផ្លូវឡើយ​! បើគ្មានផ្លូវបើកប្រជាពលរដ្ឋបង្កបង្កើនផល ដឹកយកមកលក់ម៉េចបាន? តែដាច់ផ្លូវហើយ ស្រូវចុះថោកអត់មានអ្នកទៅយក(ទិញ)»។
 

លោកបន្ថែមទៀតថា ផ្លូវធ្វើដំណើរមិនត្រឹមតែចូលរួមក្នុងការលើកកម្ពស់ជីវភាពប្រជាជនប៉ុណ្ណោះទេ ការមានផ្លូវប្រើប្រាស់នឹងធ្វើឱ្យមានភាពប្រសើរឡើង នូវការទៅទទួលសេវាសាធារណៈនានាដូចជា សេវានៅសាលាឃុំ, មណ្ឌលសុខភាព និងការទៅសាលារបស់សិស្សានុសិស្ស។ 

 

យ៉ាងណាមិញ ការជួសជុលផ្លូវនេះ ត្រូវឆ្លងកាត់ការដេញថ្លៃគម្រោង យ៉ាងតិចក្រុមហ៊ុនឯកជនចូលរួមចំនួន៣ ដើម្បីដេញថ្លៃយកគម្រោងជួសជុលនេះ។ ការណ៍នេះដើម្បីទទួលបានផ្លូវមានគុណភាព និងចំណាយលុយតិច។ ការជួសជុលផ្លូវនេះទៀតសោតក៏ត្រូវមានការចូលរួមពីពលរដ្ឋផងដែរ គឺមានការគាំទ្រពីពលរដ្ឋដើម្បីសម្រេចចិត្តធ្វើ

យ៉ាងតិច៦០ភាគរយផងដែរ៕

 

អានអត្ថបទពាក់ព័ន្ធផ្សេងទៀត៖ យុវជនសកម្មសេវាល្អ