ជុំវិញការគ្មានភ្លើងបំភ្លឺផ្លូវនេះ កន្លងអាជ្ញាធរសង្កាត់បន្សាយរាក់ បញ្ជាក់ប្រាប់យុវជនឃុំបន្សាយរាក់ថា សង្កាត់មិនមានលទ្ធភាពក្នុងការដាក់ភ្លើងបំភ្លឺផ្លូវនៅឡើយ​។ ថ្វីបើគ្មានភ្លើងបំភ្លឺផ្លូវនេះក៏ដោយ ប៉ុន្តែគេមើលឃើញថា បញ្ហាចោរកម្ម, ការរំលោភបំពានផ្លូវភេទ ឬអំពើខុសច្បាប់មួយចំនួន ក៏មិនមែនជាបញ្ហាចោទក្នុងសង្កាត់មួយនេះដែរ។ 
 

សម្រាប់លោក ម៉ែន សំ មេប៉ុស្ដិ៍នគរបាលសង្កាត់បន្សាយរាក់ យល់ឃើញថា ការដែលមានភ្លើងបំភ្លឺផ្លូវ នឹងធ្វើឱ្យសង្កាត់ខ្លួន នឹងក្លាយជាសង្កាត់មានសុវត្ថិភាពពេញលេញ​។ លោកអះអាងដូច្នេះថា៖«ប្រសិនបើរដ្ឋាភិបាលអាចដាក់ភ្លើងបានតាមដងផ្លូវ នេះជាជាសុវត្ថិភាព១០០ភាគរយ។ មានភ្លើងវាល្អសម្រាប់ប្រជាពលរដ្ឋ ហើយក៏ងាយស្រួលសម្រាប់សមត្ថកិច្ចដែរ»។ 
 

ដោយមើលឃើញពីសារៈសំខាន់ នៃការដាក់ភ្លើងបំភ្លឺផ្លូវនេះ កន្លងមកខាងប៉ុស្ដិ៍ក៏ធ្លាប់បានយករឿងនេះ ទៅពិភាក្សាជាមួយអាជ្ញាធរសង្កាត់បន្សាយរាក់ផងដែរ។ បន្ទាប់ពីពិភាក្សារួច សង្កាត់មានភ្លើងបំភ្លឺផ្លូវចំនួន៥ ដែលសម្រាប់ដាក់តែទីតាំងដែលប្រឈមហានិភ័យជាងគេ ជាពិសេសគឺនៅតាមផ្លូវកែង។ ការដាក់នៅតាមផ្លូវកែងនេះ គឺដើម្បីបញ្ចៀសនូវគ្រោះថ្នាក់ចរាចរណ៍ និងបញ្ហាផ្សេងៗផងដែរ៕

 

អានអត្ថបទពាក់ព័ន្ធផ្សេងទៀត៖ យុវជនសកម្មសេវាល្អ