ជាតិ
ចូលឆ្នាំចិន៖ តំបន់ការពារទេសភាពចំនួន២ គ្មានទេសចរទៅកម្សាន្ត
×
ដោយ៖ សែម ប្រាក់ដាវ
ភ្នំពេញ៖ តំបន់ការពារទេសភាពបឹងព្រែកល្ពៅស្ថិតនៅខេត្តតាកែវ និងតំបន់ការពារទេសភាពអន្លង់ព្រីង នៅខេត្តកំពត គ្មានទេសចរទៅកម្សាន្តនោះទេ នាឱកាសចូលឆ្នាំចិន។ តំបន់ការពារទេសភាពទាំង២នោះ មានសត្វចាបព្រៃវែង និងសត្វក្រៀល ដែលជាប្រភេទសត្វកម្រ និងជិតផុតពូជ ។
តំបន់ការពារទេសភាពបឹងព្រែកល្ពៅ ជាជម្រកសត្វស្លាប់រាប់ម៉ឺនក្បាលគួរជាទីគយគន់បំផុត ក្នុងខេត្តតាកែវ។ សម្រាប់ថ្ងៃចូលឆ្នាំចិន តំបន់ការពារទេសភាពបឹងព្រែកល្ពៅមួយនេះ មិនទទួលបានទេសចរទៅកម្សាន្តនោះទេ ដោយសារតែទឹកស្រក ធ្វើឱ្យសត្វមិនសូវបង្ហាញខ្លួនឱ្យទេសចរទស្សនា។ នេះបើតាមលោក ឈឿន សុជាតិ មន្រ្តីឧទ្យានុរក្សតំបន់ការពារទេសភាពបឹងព្រែកល្ពៅ។
បើតាមលោក ឈឿន សុជាតិ បច្ចុប្បន្ននៅតំបន់ការពារទេសភាពបឹងព្រែកល្ពៅ មានសត្វក្រៀល ដែលជិតផុយពូជ ប្រមាណ ១០ក្បាល។ មន្រ្តីឧទ្យានុរក្សតំបន់ការពារទេសភាពបឹងព្រែកល្ពៅ បញ្ជាក់ថា៖ «កាលពីឆ្នាំមុនៗគឺមានភ្ញៀវទេសចរកក់កន្លែងដែរ ដើម្បីទស្សនាសត្វនៅតំបន់ការពារទេសភាពបឹងព្រៃកល្ពៅ ។ ឆ្នាំនេះ ទេសចរមិនមកកម្សាន្តនៅបឹងព្រៃកល្ពៅសូម្បីមួយនាក់ ហើយក៏គ្មានទេសចរកក់កន្លែងដែរ»។
តំបន់បឹងព្រែកល្ពៅ ខេត្តតាកែវមួយនេះ ជាទីជម្រកដ៏មានសុវត្ថិភាព សម្រាប់សត្វស្លាបពង និងបន្តពូជ។
ដោយឡែកតំបន់ការពារទេសភាពអន្លង់ព្រីង នាថ្ងៃចូលឆ្នាំចិននេះ ក៏មិនទទួលបានទេសចរមកកម្សាន្តផងដែរ។ ប៉ុន្តែបើតាមអ្នកស្រី សាយ អាន់ តំបន់នេះ នឹងមានភ្ញៀវកក់កន្លែងកម្សាន្ត នៅខែក្រោយ។
គណៈកម្មការគណនីយសហគមន៍ នៅតំបន់ការពារទេសភាពអន្លង់ព្រីង ខេត្តកំពតរូបនេះ បានលើកឡើងថា៖ «ទេសចរបានកក់កន្លែងស្នាក់ និងការដំណើរទស្សនា សត្វក្នុងតំបន់ការពារទេសភាពអន្លង់ព្រីងផងដែរ នៅចន្លោះខែកុម្ភៈ ទើបទទួលបានទេសចរមកកម្សាន្តច្រើន»។
តំបន់ការពារទេសភាពអន្លង់ព្រីង ស្ថិតនៅស្រុកកំពង់ត្រាច ខេត្តកំពត ដែលមានទំហំ២១៧ហិកតា៕
Tag:
ThmeyThmey25
ទេសចរណ៍
បឹងព្រៃកល្ពៅ
© រក្សាសិទ្ធិដោយ thmeythmey.com