ដោយ៖​ ហេ អួញ  ( យុវជនឃុំកណ្តោល)
 

 

អ្នកស្រី ឈឺន  គី  ពលរដ្ឋរស់នៅភូមិធ្នង់ ឃុំកណ្តោល  ស្រុកបូទុមសាគរ ខេត្តកោះកុង សម្តែងការព្រួយបារម្ភជាខ្លាំងចំពោះសកម្មភាពប្រមូលផ្តុំរបស់យុវជន នៅក្នុងឃុំខ្លួន នៅតាមទីតាំងស្ងាត់ៗ។ អ្នកស្រី ឈឺន គី ខ្លាចថាពួកគេ ប្រមូលផ្តុំគ្នាប្រើប្រាស់ ឬចែកចាយគ្រឿងញៀន ឬប្រព្រឹត្តអំពើល្មើសផ្សេងៗ។ ពលរដ្ឋរូបនេះ មិនចង់ឃើញនៅក្នុងឃុំមានអសុវត្ថិភាព មានចោរកម្ម ដែលបង្កឡើងដោយអ្នកប្រើប្រាស់គ្រឿងញៀននោះទេ។ អ្នកស្រី ឈឺន  គី បន្ថែម៖ «អត់ចង់ឃើញទេ! ចង់ឱ្យគេ(អាជ្ញាធរ)បង្ក្រាប ឱ្យបានតឹងរ៉ឹង កុំឱ្យមានការជួញដូរ(គ្រឿងញៀន)»។

 

 

​អ្នកស្រី ឈឺន គី ​បានសំណូមពរ ឱ្យអាជ្ញាធរបង្កើនការល្បាតនៅពេលយប់បន្ថែមទៀតដែរ ដើម្បីផ្តល់ភាពកក់ក្តៅដល់ពលរដ្ឋ និងទប់ស្កាត់កុំឱ្យមានបទល្មើលកើតឡើង។ «សំណូមពរ(ទៅ)ប៉ុស្តិ៍ ឱ្យជួយល្បាតយប់ឡើង ឱ្យបានញឹកញាប់។ ផ្ទះខ្ញុំជាប់ផ្លូវអ៊ីចឹង ខ្ញុំខ្លាចតែអ្នកញៀនថ្នាំទេ រាល់ថ្ងៃ។ ដេកខ្លាច»។ អ្នកស្រី ឈឺន គី ស្នើយ៉ាងដូច្នេះ។ 

​

ឆ្លើយតបនឹងកង្វល់នេះ លោក សុខ រចនា មេប៉ុស្តិ៍ស្ដីទីនៃប៉ុស្តិ៍នគរបាលឃុំកណ្តោល បានបញ្ជាក់ថា  អាជ្ញាធរ បាន និងកំពុងតាមដានករណីសង្ស័យយ៉ាងម៉ត់ចត់ ហើយកម្លាំងប៉ុស្តិ៍នគរបាលក៏បានសហការ ជាមួយប្រជាការពារ ក្នុងការល្បាតចល័ត ទាំងថ្ងៃទាំងយប់ដែរ។ បើតាម មេប៉ុស្តិ៍ស្ដីទី រាល់ការបង្ក្រាបបទល្មើសនីមួយៗ គឺទាមទារឱ្យអាជ្ញាធរក្តាប់បានព័ត៌មានច្បាស់លាស់ ទើបអាចអន្តរាគមន៍បាន។​ 

 

លោក សុខ រចនា ពន្យល់បន្ថែម៖«បទល្មើសគ្រឿងញៀនគឺពិបាកក្នុងការបង្ក្រាប។ សម្រាប់ការបង្ក្រាបគឺទាមទារឱ្យច្បាស់លាស់ បើសិនជាយើងបង្ក្រាបទៅ យើងគ្រាន់តែសង្ស័យ យើងបង្ក្រាបទៅ ស្រាប់តែវាមិនមែនជាបទល្មើសគ្រឿងញៀន ឬក៏គាត់មិនបានជួញដូរ ឬក៏ប្រើប្រាស់ ហ្នឹងជាបញ្ហាដល់យើងវិញ»។ 

 

 លោក សុខ រចនា មេប៉ុស្តិ៍ស្ដីទីនៃប៉ុស្តិ៍នគរបាលឃុំកណ្តោល ស្រុកបូទុមសាគរ​ ខេត្តកោះកុង។

 

យ៉ាងណាក៏ដោយ សម្រាប់ លោក សុខ រចនា ការទប់ស្កាត់បទល្មើសនានានៅក្នុងឃុំឱ្យកាន់តែមានប្រសិទ្ធភាព មិនអាចខ្វះការចូលរួមពីប្រជាពលរដ្ឋបាននោះឡើយ។ ដូច្នេះលោកមេប៉ុស្តិ៍ស្តីទីរូបនេះ បានស្នើសុំការសហការយ៉ាងជិតស្និទ្ធបន្ថែមទៀតពីប្រជាពលរដ្ឋដោយជួយរាយការណ៍ករណីសង្ស័យមកកាន់សមត្ថកិច្ច ដើម្បីឱ្យមានការអន្តរាគមន៍ និងទប់ស្កាត់បទល្មើសបានទាន់ពេល។ អត្តសញ្ញាណប្រជាពលរដ្ឋដែលរាយការណ៍ មកកាន់តែសមត្ថកិច្ច នឹងត្រូវលាក់ទុកជាសម្ងាត។ នេះជាការគូសបញ្ជាក់របស់ លោក សុខ រចនា​ ដែលលោកបានបន្តថា ​ សមត្ថកិច្ចប៉ុស្តិ៍ នឹងខិតខំបន្ថែមទៀតក្នុងការផ្សព្វផ្សាយអំពីបញ្ហាគ្រឿងញៀន និងរៀបចំផែនការល្បាត ពិសេសផ្តោតលើការតាមដានករណីគ្រឿងញៀន និងក្មេងទំនើង ធ្វើយ៉ាងណាធានាសន្តិសុខ និងសណ្តាប់ធ្នាប់នៅក្នុងឃុំ៕

​

អានអត្ថបទពាក់ព័ន្ធផ្សេងទៀត៖ យុវជនសកម្ម សេវាល្អ