លោក ហ៊ុយ សំណាង មេឃុំនៃរដ្ឋបាលឃុំកណ្តោល ស្រុកបូទុមសាគរ ឱ្យដឹងថា​ប៉ុស្តិ៍សុខភាពភូមិនេះ ត្រូវបានសាងសង់ឡើងនៅក្នុងភូមិធ្នង់ ឃុំកណ្តោល។ លោកមេឃុំ ជឿជាក់ថា ប៉ុស្តិ៍សុខភាពថ្មីនេះ នឹងជួយឱ្យពលរដ្ឋប្រមាណ៤ ០០០នាក់ នៅក្នុងឃុំកណ្តោល ទទួលបានសេវាពិនិត្យ និងថែទាំសុខភាពកាន់តែងាយស្រួល កាត់បន្ថយចំណាយថ្លៃធ្វើដំណើរ ពិសេសស្ត្រីមានផ្ទៃពោះ ចាស់ជរា និងពលរដ្ឋក្រីក្រ។

 

ពាក់ព័ន្ធនឹងការបង្កើតប៉ុស្តិ៍សុខភាពភូមិនេះ អ្នកស្រី កែវ ចាន់ ដែលជាពលរដ្ឋមានផ្ទៃពោះ​រស់នៅក្នុងភូមិធ្នង់ បានលើកឡើងថា ប៉ុស្តិ៍សុខភាពនេះ នឹងជួយឱ្យអ្នកស្រីមិនចាំបាច់ធ្វើដំណើរទៅពិនិត្យសុខភាព នៅមណ្ឌលសុខភាពដែលនៅឆ្ងាយពីផ្ទះ។ ក្រៅពីកាត់បន្ថយចំណាយ និងពេលវេលាលើការធ្វើដំណើរ ស្ត្រីវ័យ៣៣ឆ្នាំរូបនេះ បញ្ជាក់ទៀតថា ពលរដ្ឋនៅក្នុងឃុំ ក៏ងាយស្រួលក្នុងការជំនួយពីគ្រូពេទ្យបានលឿន ករណីមានការឈឺថ្កាត់យប់ព្រលប់ ឬមានករណីសម្រាលជាដើម។ ​«បាន(ប៉ុស្តិ៍សុខភាព)នៅជិតហ្នឹងល្អ! ល្អថាយើងចង់ទៅពិនិត្យសុខភាព ឬឈឺគ្រុនអី បាននៅជិត វាងាយស្រួលជាងទៅ(មណ្ឌលសុខភាព) នៅឃុំអណ្តូងទឹក»។  អ្នកស្រី កែវ ចាន់ បន្ថែមដូច្នេះ។

 

ពលរដ្ឋឃុំកណ្តោលម្នាក់ទៀត គឺអ្នកស្រី ជៀម ណៀវ ក៏ត្រេកអរដែរ ដែលឃុំមានប៉ុស្តិ៍ សុខភាពនៅក្នុងភូមិ និងនៅជិតផ្ទះរបស់ខ្លួនតែម្តង។ មានវ័យ ៥២ឆ្នាំ អ្នកស្រី ជៀម ណៀវ លើកឡើងដូច្នេះថា៖ «យើងបានអ្នកសម្រាល អ្នកអីនៅជិតហ្នឹងណា៎។ បាននៅជិតហ្នឹងវាស្រួល កូនចៅយើងព្រលប់អីឈឺគ្រុនអីវាស្រួល វាអត់ពិបាកទៅឆ្ងាយ»។

ដែលបន្ថែមពីការមើលឃើញពីភាពវិជ្ជមានជុំវិញការសង់ប៉ុស្តិ៍សុខភាពភូមិនេះដែរ ​អ្នកស្រី ជៀម ណៀវ បានស្នើឱ្យគ្រូពេទ្យដែលបម្រើការងារនៅប៉ុស្តិ៍សុខភាពភូមិ ផ្តល់សេវាដល់ពលរដ្ឋប្រដោយវិជ្ជាជីវៈ និងប្រើប្រាស់ពាក្យសម្តីសមរម្យ ព្រមទាំងមិនមានការរើសអើង៕

 

​អានអត្ថបទពាក់ព័ន្ធផ្សេងទៀត៖ យុវជនសកម្ម សេវាល្អ