​ក្រោយការប្រកួតរវាង​ Leeds និង Man United បានបញ្ចប់ទៅមិនបានប៉ុន្មានម៉ោងផងនោះ ស្ថាប័ន Premier League បានចេញសេចក្តីថ្លែងការណ៍ថានឹងចាត់វិធានការតឹងរឹងដើម្បីបង្ក្រាបលើបញ្ហាដ៏អសិលធម៌របស់អ្នកគាំទ្រអំឡុងពេលប្រកួត។
 

«Premier League សូមថ្កោលទោសចំពោះការស្រែកច្រៀងដែលបានឮក្នុងការប្រកួតថ្ងៃនេះរវាង Leeds United និង Manchester United ហើយលីគកំពុងតែចាត់ទុកបញ្ហាសោកនាដកម្មជាអទិភាព និងជាបញ្ហាដ៏សំខាន់ដើម្បីដោះស្រាយព្រមទាំង បង្ក្រាបឱ្យខាងតែបាន។»។ នេះបើតាមសេចក្តីថ្លែងការណ៍ពី Premier League។ 
 

នាជំនួប Premier League ថ្ងៃទី១២ កុម្ភៈ ​Man United បានយកឈ្នះលើក្រុមម្ចាស់ផ្ទះ Leeds នាកីឡដ្ឋាន​ Elland Road លទ្ធផល ២-០ ប៉ុន្តែការប្រកួតត្រូវបានរំខានដោយអ្នកគាំទ្រ បានស្រែកច្រៀងទាក់ទង់សោកនាដកម្មធ្លាក់យន្តហោះនៅទីក្រុង Munich ប្រទេសអាល្លឺម៉ង់ឆ្នាំ​ ១៩៥៨។ សោកនាដកម្មនោះបានសម្លាប់កីឡាករក្រុមបិសាចក្រហមចំនួន ៨នាក់ និងការស្លាប់របស់អ្នកគាំទ្រ Leeds ពីរនាក់នៅទីក្រុង Istanbul ក្នុងឆ្នាំ ២០០០ ក្នុងជម្លោះរវាងអ្នកគាំទ្រ Galatasaray ​នៃជំនួប UEFA Cup ផ្តាច់ព្រ័ត្រ។ 
 

ក្រោយករណីនេះ ក្លិប Leeds និង Man United បានចេញសេចក្តីថ្លែងការណ៍រួមថ្កោលទោសដូច្នេះថា៖«ក្លិបទាំងពីសូមថ្កោលទោសចំពោះការស្រែកចេញពីសំណាក់អ្នកគាំទ្រទាំងសងខាងដែលទាក់ទងទៅនឹងប្រវត្តិសាស្ត្រដ៏អាក្រក់ក្នុងការប្រកួតថ្ងៃនេះ។ ទង្វើរទាំងនេះពិតណាស់ពិបាកនឹងទទួលយក ហើយយើងនឹងធ្វើការរួមគ្នាព្រមទាំងក្រុមអ្នកគាំទ្ររបស់យើង ជាមួយ Premier league ដើម្បីចាត់វិធានការតឹងរឹងបង្ក្រាបបញ្ហានេះឱ្យចេញឆ្ងាយពីបាល់ទាត់។»។
 

បញ្ហានេះមិនមែនទើបតែកើតមានឡើយ កន្លងមកអ្នកគាំទ្រក្រុម Liverpool ក៏ធ្លាប់បានអំពាវនាវឱ្យ Premier League ចាត់វិធានការលើរឿងស្រែកចំអកដោយប្រើប្រាស់គ្រោះមហន្តរាយរអិលជាន់គ្នាក្នុងកីឡដ្ឋាន Hillsborough ឆ្នាំ ១៩៨៩ ដែលបណ្តាលឱ្យអ្នកគាំទ្រហង្សក្រហមប្រមាណ ៩៧នាក់បានស្លាប់ផងដែរ៕