សម្ដេច ហ៊ុន សែន បាន​ប្រគល់​វិញ្ញាបនបត្រជ័យលាភីក្នុងចលនាប្រឡងប្រណាំងទីក្រុងស្អាតលើកទី៣ ទៅ​កាន់ក្រុង/ខណ្ឌចំនួន ៣៨ កាល​ពីថ្ងៃទី២៧ កុម្ភៈ​កន្លងទៅ។ ក្នុង​វិញ្ញាបនបត្រជ័យលាភី​ដែលរៀបចំដោយ​អគ្គលេខាធិការដ្ឋាននៃគណៈកម្មាធិការជាតិវាយតម្លៃទីក្រុងស្អាត មាន​កំហុស​អក្ខរាវិរុទ្ធត្រង់​បាវចនាជាតិ «ព្រះរាជាណាចក្រកម្ពុជា»ទៅជា «ព្រះរាជាណាច្រកកម្ពុជា»។
  

 

កំហុសអក្ខរាវិរុទ្ធនេះ មាន​ការ​រិះគន់​ជាច្រើន​ពីសំណាក់អ្នក​ប្រើប្រាស់​បណ្ដាញ​សង្គម។ ក្នុង​ចំណោម​អ្នក​រិះគន់ទាំងនោះ ក៏​មាន​វត្ត​មាន​រដ្ឋមន្រ្តី​ក្រសួង​ព័ត៌មាន លោក ខៀវ កាញារីទ្ធផងដែរ។ រដ្ឋមន្រ្តី​ព័ត៌មាន សរសេរដូច្នេះ៖ « ប្រហែសតូចខូចការធំ ! កម្ពុជា គ្មានព្រះរាជាណាមកច្រកទេ មានតែព្រះរាជាជួយវាសនាកម្ពុជាអោយកាន់តែត្រដែត»។ 
 

ចំពោះ​បញ្ហានេះ អគ្គលេខាធិការដ្ឋាននៃគណៈកម្មាធិការជាតិវាយតម្លៃទីក្រុងស្អាត បញ្ជាក់ថា៖ «ក្រោយពីទទួលបានព័ត៌មាន នៅវេលាម៉ោង៦ល្ងាច ថ្ងៃទី២៧ ខែកុម្ភៈ  អគ្គលេខាធិការដ្ឋានបានទាក់ទងជាប្រញាប់ ភ្លាមៗ ទៅកាន់ក្រុង/ខណ្ឌជ័យលាភីទាំង ៣៨ និងបានប្រមូលវិញ្ញាបនបត្រទាំងនេះដើម្បីយកមកកែសម្រួលឡើងវិញ»។
 

ជាមួយ​គ្នានេះ​ នៅថ្ងៃទី២៨ ខែកុម្ភៈ គណៈកម្មាធិការជាតិវាយតម្លៃទីក្រុងស្អាត បានធ្វើលិខិតស្នើសុំទៅកាន់​នាយកខុទ្ទកាលសម្តេចនាយករដ្ឋមន្ត្រី ដើម្បីសុំកែសម្រួល និងស្នើសុំហត្ថលេខារបស់សម្តេច ហ៊ុន សែន​សារជាថ្មី។ ទន្ទឹមនឹងនេះ អគ្គលេខាធិការ និងមន្ត្រីបច្ចេកទេស ក៏​បានសូម​​អភ័យទោសចំពោះកំហុសបច្ចេកទេសដោយអចេតនាផងដែរ៕