​សៀមរាប៖ ថ្ងៃរះនៅអង្គរវត្ត ជាទិដ្ឋភាពដ៏មនោរម្យមួយ ដែលទាក់ចិត្តទេសចរខ្មែរ និងបរទេស ទៅទស្សនា និងផ្ដិតយកទស្សនីយភាពនេះ។ ទេសចរ ត្រូវក្រោកនៅវេលាទៀបភ្លឺ​ ប្រមាណជាម៉ោង៥ព្រឹក ដើម្បីធ្វើដំណើរទៅ​មើលថ្ងៃរះនៅអង្គរតូច។

 

ព្រះអាទិត្យរះពណ៌មាសយ៉ាងឆ្អិនឆ្អៅ ​ដែលជះមកប្រាង្គ ប្រាសាទអង្គរវត្ត​បានបង្កើតជាផ្ទាំងទស្សនីយភាពមួយយ៉ាងអស្ចារ្យ។នៅពេលពន្លឺព្រះអាទិត្យមាសនេះ ចាប់ផ្ដើមបង្ហាញខ្លួនទេស​ចរបាននាំគ្នាស្ទុះស្ទាចាប់កាន់ម៉ាស៊ីនថតរូបរៀងៗខ្លួនដើម្បីផ្ដិតយករូបភាពតាមប្លង់ដែលខ្លួនចង់បាន។ អ្នកមានទូរស័ព្ទដៃទំនើបក៏ថតរូបរៀងៗខ្លួនដែរ។ អ្នកខ្លះក៏ថតខ្លួនឯង(selfie) ហើយអ្នកមានគ្នា ក៏ថតឱ្យគ្នាម្ដងម្នាក់ៗ​។ មិនយូរឡើយ ​ព្រះអាទិត្យ​ក៏រះផុតកំពូលប្រាសាទអង្គរវត្ត ហើយចាប់ផ្តើមបង្កើនកម្ដៅ និងបាត់រូបរាងម្ដងបន្តិច​ៗ​។ ​