ក្រៅពីទូរស័ព្ទ និងកំព្យូទ័រ ឧបករណ៍មួយចំនួនទៀតដែលត្រូវយកចុះបញ្ជីដែរនោះរួមមាន ឧបករណ៍ដងហ្គោលប្រើស៊ីម, ម៉ូដឹមដែលប្រើស៊ីម, ឧបករណ៍រ៉ោទ័រដែលប្រើស៊ីម, សៀវភៅអេឡិចត្រូនិកប្រើស៊ីម, សម្ភារៈ ឬឧបករណ៍ផ្សេងៗទៀត ដែលកំណត់ដោយក្រសួងប្រៃសណីយ និងទូរគមនាគមន៍។ 
  

យោងតាមអនុក្រឹត្យ ក្រោមហត្ថលេខានាយករដ្ឋមន្ត្រី នៅថ្ងៃទី០៣កុម្ភៈ ការចុះបញ្ជីអត្តសញ្ញាណឧបករណ៍ទូរគនាគមន៍ប្រើស៊ីមនេះ ដើម្បីទប់ស្កាត់និងកាត់បន្ថយការប្រើប្រាស់ឧបករណ៍ទាំងនោះ ដោយប្រើស៊ីមក្លែងក្លាយ, ឧបករណ៍ជារបស់ចោរលួច និងនាំចូលខុសច្បាប់, ការពារអ្នកប្រើប្រាស់, បង្កើនគុណភាពសេវាទូរគមនាគមន៍, លើកកម្ពស់ការប្រកួតប្រជែងដែលមានតម្លាភាពនិងស្មោះត្រង់ និងចូលរួមរកចណូលថវិកាជាតិ។ 
 

ដោយឡែកការចុះបញ្ជីនេះ លោក លីវ សុផាណារិទ្ធិ អ្នកនាំពាក្យក្រសួងប្រៃសណីយ មិនទាន់អាចបញ្ជាក់បាននៅឡើយទេ ពីកាលបរិច្ឆេទនៃការអនុវត្ត និងការយកថ្លៃសេវាផ្សេងៗនោះ។ លោកផ្ញើសារអក្សរតាមតេឡេក្រាម នៅថ្ងៃទី១៣មីនាថា ចំពោះនីតិវិធីក្នុងចុះអត្តសញ្ញាណនេះ ក៏ដូចជា(ថ្លៃ)សេវាជាដើមនោះ ក្រសួងនឹងរៀបចំប្រកាស និងជូនដំណឹងដល់សាធារណៈជននាពេលខាងមុខ។ 
 

ពាក់ព័ន្ធនឹងការចុះបញ្ជីឧបករណ៍នេះ ធ្វើឡើងតាមប្រព័ន្ធចុះបញ្ជីអត្តសញ្ញាណឧបករណ៍ទូរគមនាគមន៍ប្រើស៊ីម (National Equipment Identity Registration System – National EIRS) ដែលមុខងាររបស់វា គឺគ្រប់គ្រង និងធ្វើឯកសណ្ឋានភាពជាមួយប្រព័្ធន EIR (Equipment Identity Register) ដែលដំឡើងដោយប្រតិបត្តិករទូរស័ព្ទចល័ត ស្របតាមបទប្បញ្ញត្តិជាធរមាន។
 

អ្នកនាំពាក្យ លោក លីវ សុផាណារិទ្ធិ បានបញ្ជក់ទៀតថា ការចុះបញ្ជីអត្តសញ្ញាណនេះ គឺត្រូវអនុវត្តប្រើប្រាស់ទាំងប្រតិបត្តិករទូរសព្ទ, អ្នកនាំចូលឧបករណ៍ទូរគមនាគមន៍ប្រើស៊ីម ក៍ដូចជាអ្នកប្រើប្រាស់ឧបករណ៍ទូរគមនាគមន៍ប្រើស៊ីមទាំងអស់ ដើម្បីចូលរួមចុះបញ្ជីនេះ តាមប្រព័ន្ធនេះ។ 
 

នៅក្នុងអនុក្រឹត្យក៏បានចែងថា ក្នុងករណីរកឃើញថា បុគ្គលណាមួយមិនធ្វើតាមអនុកក្រឹត្យដែលបានចែង ពាក់ព័ន្ធនឹងការចុះអត្តសញ្ញាណឧបករណ៍ទូរគមនាគមន៍ប្រើស៊ីម នឹងរងពិន័យទណ្ឌកម្មរដ្ឋបាល និងពិន័យអន្តរការណ៍។ ពិន័យអន្តរការណ៍ជាប្រាក់ចាប់ពី២លានរៀល រហូតដល់៥រយលានរៀល៕