ការដោះលែងនេះធ្វើឱ្យក្រុមគ្រួសារជនរងគ្រោះក្នុងហេតុការណ៍ដ៏អាក្រក់បំផុតក្នុងប្រវត្តិសាស្ត្រកីឡាបាល់ទាត់ ផ្ទុះកំហឹងខ្លាំង។ ក្នុងចំណោមមន្ត្រីប៉ូលិស ៣រូប មានមន្ត្រី ២នាក់ ត្រូវបានលើកលែងទោស ខណៈមន្ត្រីប៉ូលិសម្នាក់ទៀត ត្រូវបានចោទប្រកាន់នឹងសម្រេចដាក់គុករយៈពេល ១៨ខែ ប៉ុន្តែក្រុមគ្រួសារជនរងគ្រោះបាននិយាយថា ការកាត់ទោសនេះស្រាលពេក។
 

មន្ត្រីប៉ូលិសក្នុងទីក្រុង Malang ខេត្តច្វាខាងកើត រងការស្តីបន្ទោស សម្រាប់ការបង្កឱ្យមានមនុស្សស្លាប់ដោយរត់ជាន់គ្នា ក្នុងកីឡដ្ឋាន Kanjuruhan ដោយការប្រើប្រាស់ឧស្ម័នបង្ហូរទឹកភ្នែក និងដំបង ដើម្បីបំបែកហ្វូងអ្នកគាំទ្រក្រុមម្ចាស់ផ្ទះ Arema FC អុកឡុកក្នុងទីលានប្រកួត ក្រោយបរាជ័យលទ្ធផល ៣-២ ទល់ក្រុមមកពីទីក្រុងតែមួយ Persebaya Surabaya។
 

សាច់ញាតិជនរងគ្រោះដែលស្លាប់ចំនួន ១៣៥នាក់ បានស្រក់ទឹកភ្នែកនៅពេលចៅក្រមបានអានសាលក្រម នៅថ្ងៃចុងក្រោយនៃការកាត់ក្តីលើកលែងទោសនេះ។  មេធាវីតំណាងសាច់ញាតិជនរងគ្រោះ បាននិយាយថាវាជារឿងអយុត្តិធម៍បំផុត។
 

លោក Bambang Sidik Achmadi មន្ត្រីប៉ូលិសទីក្រុង Malang ដែលត្រូវបានចោទប្រកាន់ពីបទបញ្ជាឱ្យមន្ត្រីក្រោមឱវាទរបស់ខ្លួនបាញ់ឧស្ម័នបង្ហូរទឹកភ្នែក ត្រូវបានរកឃើញថា គ្មានទោសពីសំណាក់តុលាការក្នុងទីក្រុង ​Surabaya។ មន្ត្រីប៉ូលីសម្នាក់ទៀតឈ្មោះ Wahyu Setyo Pranoto ក៏រកឃើញថាមិនមានទោសដែរ។
 

ប្រធានចៅក្រមលោក Abu Achmad Sidqi Amsya បាននិយាយថា ការចោទប្រកាន់នេះ មិនត្រូវបានបញ្ជាក់ណាមួយឡើយ ហើយចុងចោទទទួលបានសេរីភាព ក្នុងដំណើរនេះ៕