បើតាមក្រសួងការពារជាតិកម្ពុជាដដែល សមយុទ្ធយោធាកម្ពុជា-ចិន ហៅថា សមយុទ្ធនាគមាសឆ្នាំ២០២៣។ ក្រសួងការពារជាតិកម្ពុជា បន្ថែមថា សមយុទ្ធយោធាទ្រង់ទ្រាយធំនេះ មានរយៈពេល១៣ថ្ងៃ ដោយចាប់ពីថ្ងៃទី២៣ ខែមីនា ដល់ថ្ងៃទី៥ ខែមេសា ឆ្នាំ២០២៣។ 

 

ដោយឡែក ក្រសួងការពារជាតិចិន បានផ្សាយលើគេហទំព័ររបស់ខ្លួន កាលពីថ្ងៃទី១៦ ខែមីនា ថា កងទ័ពកម្ពុជា-ចិន ដែលត្រូវចូលរួមធ្វើសមយុទ្ធ មានសរុបជាង៣០០នាក់ ដោយក្នុងនោះ កងទ័ពចិន មានជាង២០០នាក់។ ក្រសួងការពារជាតិចិន បញ្ជាក់ថា សមយុទ្ធនាគមាសនេះ គឺជាសកម្មភាពនៃកិច្ចសហប្រតិបត្តិការយោធាប្រចាំឆ្នាំ រវាងប្រទេសទាំង២។ 

 

ក្រសួងការពារជាតិកម្ពុជា សរសេរលើទ័ពហ្វេសប៊ុកថា គោលបំណងនៃការធ្វើសមយុទ្ធយោធារួមគ្នា ក្នុងឆ្នាំ២០២៣នេះ គឺដើម្បីការពារសន្តិសុខចំពោះព្រឹត្តិការណ៍ធំៗ និងរបៀបជួយសង្គ្រោះប្រជាពលរដ្ឋ ដែលជួបគ្រោះមហន្តរាយនានា។ 

 

សូមរម្លឹកថា សមយុទ្ធរវាងកងទ័ពកម្ពុជា-ចិន បានចាប់ផ្ដើមធ្វើតាំងពីឆ្នាំ២០១៦មក។ ប៉ុន្តែ នៅឆ្នាំ២០១៧ សមយុទ្ធនេះ ត្រូវបានផ្អាកម្តង ដោយសារកម្ពុជា ជាប់រៀបចំការបោះឆ្នោតឃុំ-សង្កាត់ ហើយក្រោយមក ត្រូវបានផ្អាក២ដងទៀត គឺនៅឆ្នាំ២០២១ និងឆ្នាំ២០២២ ដោយសារជំងឺកូវីដ-១៩៕