កិច្ចសហប្រតិបត្តិការរវាងដៃគូទាំងពីរនេះ ធ្វើឡើងសម្រាប់គម្រោងទេសចរណ៍បៃតង។ គម្រោងនេះ នឹងរួមបញ្ជូលលើការគាំទ្រក្នុងការផ្សព្វផ្សាយយុទ្ធនាការបៃតងរួមគ្នា និងគម្រោងគ្រប់គ្រងកាកសំណល់ នៅរមនីយដ្ឋានអង្គរ។ 

នាឱកាសនៃការចុះហត្ថលេខាលើភាពជាដៃគូ នៅរមណីយដ្ឋានអង្គរនោះ លោក  Fabian Daniel Mosquera Vera នាយកគ្រប់គ្រងនៃ AJE ASEAN លើកឡើងថា គម្រោងនេះ ជាយុទ្ធសាស្ត្រដើម្បីនាំមកវិញនូវមោទកភាព នៃតំបន់បេតិកភណ្ឌពិភពលោកមួយ ហើយគម្រោងនេះនឹងនាំឱ្យតំបន់បេតិកភណ្ឌនេះ មានជីវិតឡើងវិញ។ 

 

ជាមួយគ្នានេះ លោក ឡុង កុសល អ្នកនាំពាក្យនៃអាជ្ញាធរជាតិអប្សរា លើកឡើងថា កិច្ចសហប្រតិបត្តិការលើការការពារបរិស្ថាននៅក្នុងរមណីយដ្ឋានអង្គរនេះ​ គឺជាការលើកតម្លៃជាសកលរបស់រមណីយដ្ឋានអង្គរ។ 
 

លោកក៏រំពឹងដែរថា តាមរយៈកិច្ចសហប្រតិបត្តិការនេះ នឹងចេញជាផ្លែផ្កា ដល់ការការពារបរិស្ថាននៅរមណីយដ្ឋានអង្គរផងដែរ។ លោកបញ្ជាក់ដូច្នេះ៖«ខ្ញុំសង្ឃឹមថាកិច្ចសហប្រតិបត្តិការយើង នឹងផ្ដល់ជាផ្លែផ្កាយ៉ាងល្អប្រសើរបំផុត​ សម្រាប់រមណីយដ្ឋានអង្គរ ក៏ដូចជាការចូលរួមថែរក្សាទៅលើបេតិកភណ្ឌពិភពលោកដែលជាមរតករបស់មនុស្សជាតិ»។ 
 

គួរជម្រាបផងដែរថា អាជ្ញាធរជាតិអប្សរាមិនមែនជាស្ថាប័នទី១ទេ ដែលក្រុមហ៊ុននេះ បង្កើតកិច្ចសហការជាមួយ ក្រោមគោលបំណងការពារបរិស្ថានក្នុងរមណីយដ្ឋានអង្គរ។

កន្លងមកគម្រោងអភិរក្ស និងនិរន្តរភាពតំបន់ប្រវត្តិសាស្ត្រ របស់ស្ថាប័នឯកជននេះ។​ កន្លងមកក្រុមហ៊ុនមួយនេះ បានធ្វើគម្រោងនេះនៅក្នុងឧទ្យានប្រវត្តិសាស្ត្រអយុធ្យា ក្នុងខេត្ត Phra Nakhon Si Ayutthaya ប្រទេសថៃ និងបរិវេណប្រាសាទ Borobudur ប្រទេសឥណ្ឌូនេស៊ី៕