ជាតិ
កម្ពុជា រកចំណូលបានជាង ១ពាន់លានដុល្លារ ពីទេសចរអន្តរជាតិ ក្នុងឆ្នាំ២០២២ ទេសចរអន្តរជាតិ មកទស្សនា «រូងប្រចៀវចេញភ្នំសំពៅ» ក្នុងខេត្តបាត់ដំបង។
× ភ្នំពេញ៖ ក្នុងឆ្នាំ២០២២ កម្ពុជា រកចំណូលបានប្រមាណ ១,៤១៥លានដុល្លារ ពីទេសចរអន្តរជាតិប្រមាណ ២,២៨លាននាក់។ ចំពោះ ទេសចរជាតិប្រមាណ ១៤លាននាក់ ដើរកម្សាន្តទូទាំងប្រទេស បានផ្តល់ចំណូលបានប្រមាណ ៦៥០លានដុល្លារផងដែរ។
ទេសចរជាតិ និងអន្តរជាតិ ចាប់ផ្តើមកើនបន្តិចម្តងៗ ក្រោយជំងឺកូវីដ-១៩ថយចុះ។ ទន្ទឹមនឹងនោះ ទេសចរអន្តរជាតិ ក៏វិលមកកម្សាន្តនៅកម្ពុជាជាបន្តបន្ទាប់ ដោយក្នុងឆ្នាំ២០២២ កម្ពុជា ទទួលបានទេសចរអន្តរជាតិប្រមាណ ២,២៨លាននាក់ កើនជាង ១ពាន់ភាគរយ។ ក្នុងនោះមានទេសចរជនជាតិឥណ្ឌូណេស៊ីចំនួន ៧,៥ម៉ឺននាក់។ ចំនួនភ្ញៀវទេសចរអន្តរជាតិទាំងនោះ ផ្តល់ចំណូលប្រមាណ ១ ៤១៥លានដុល្លារ ដែលជាចំណូលជួយដល់ចរន្តសេដ្ឋកិច្ច។
ដោយឡែក ទេសចរជាតិដើរកម្សន្តទូទាំងប្រទេស មានប្រមាណ ១៤លាននាក់ កើនឡើងជាង ២០០ភាគរយ ផ្តល់ប្រាក់ចំណូលប្រមាណ ៦៥០លានដុល្លារ។ ក្នុងឆ្នាំ២០២២ ដដែល ទេសចរជាតិ ដែលធ្វើដំណើរតាមជើងហោះហើរទៅក្រៅប្រទេសមានចំនួន ៩៧ម៉ឺននាក់ កើនឡើងជាង ៣ពាន់ភាគរយ។
សូមបញ្ជាក់ថា រយៈពេល ២ខែដើមឆ្នាំ២០២៣នេះ កម្ពុជាទទួលបានភ្ញៀវទេសចរអន្តរជាតិបាន ៨៣,៧ម៉ឺននាក់ ដោយក្នុងនោះទេសចរជនជាតិឥណ្ឌូណេស៊ីចំនួន ២ម៉ឺននាក់។ បន្ថែមពីនេះ ក្នុងរបាយកាណ៍ក្រសួងទេសចរណ៍ ដែលបានចេញផ្សាយ កាលពីថ្ងៃទី១៩ ខែមករា ឆ្នាំ២០២៣កន្លងទៅ បង្ហាញថា ភ្ញៀវទេសចរជនជាតិថៃ បានឈរនៅកំពូលតារាងដែលធ្វើដំណើរមកកម្សាន្តកម្ពុជាច្រើនជាងគេ មានចំនួនសរុប ៨៥៣ ៣៧៦នាក់៕
Tag:
ThmeyThmey
ទេសចរណ៍
ទេសចរអន្តរជាតិ ឆ្នាំ២០២២
ថវិកា
© រក្សាសិទ្ធិដោយ thmeythmey.com