ទេសចរជាតិ និងអន្តរជាតិ ចាប់ផ្តើមកើនបន្តិចម្តងៗ ក្រោយជំងឺកូវីដ-១៩ថយចុះ។ ទន្ទឹមនឹងនោះ ទេសចរអន្តរជាតិ ក៏វិលមកកម្សាន្តនៅកម្ពុជាជាបន្តបន្ទាប់ ដោយក្នុងឆ្នាំ២០២២ កម្ពុជា ទទួលបានទេសចរអន្តរជាតិប្រមាណ ២,២៨លាននាក់ កើនជាង ១ពាន់ភាគរយ។ ក្នុងនោះមានទេសចរជនជាតិឥណ្ឌូណេស៊ីចំនួន ៧,៥ម៉ឺននាក់។ ចំនួនភ្ញៀវទេសចរអន្តរជាតិទាំងនោះ ផ្តល់ចំណូលប្រមាណ ១ ៤១៥លានដុល្លារ ដែលជាចំណូលជួយដល់ចរន្តសេដ្ឋកិច្ច។
 

ដោយឡែក ទេសចរជាតិដើរកម្សន្តទូទាំងប្រទេស មានប្រមាណ ១៤លាននាក់ កើនឡើងជាង​ ២០០ភាគរយ ផ្តល់ប្រាក់ចំណូលប្រមាណ ៦៥០លានដុល្លារ។ ក្នុងឆ្នាំ២០២២ ដដែល ទេសចរជាតិ ដែលធ្វើដំណើរតាមជើងហោះហើរទៅក្រៅប្រទេសមានចំនួន ៩៧ម៉ឺននាក់ កើនឡើងជាង ៣ពាន់ភាគរយ។
 

សូមបញ្ជាក់ថា រយៈពេល ២ខែដើមឆ្នាំ២០២៣នេះ កម្ពុជាទទួលបានភ្ញៀវទេសចរអន្តរជាតិបាន ៨៣,៧ម៉ឺននាក់ ដោយក្នុងនោះទេសចរជនជាតិឥណ្ឌូណេស៊ីចំនួន ២ម៉ឺននាក់។ បន្ថែមពីនេះ ក្នុងរបាយកាណ៍ក្រសួងទេសចរណ៍ ដែលបានចេញផ្សាយ កាលពីថ្ងៃទី១៩ ខែមករា ឆ្នាំ២០២៣កន្លងទៅ បង្ហាញថា ភ្ញៀវទេសចរជនជាតិថៃ បានឈរនៅកំពូលតារាងដែលធ្វើដំណើរមកកម្សាន្តកម្ពុជាច្រើនជាងគេ មានចំនួនសរុប ៨៥៣ ៣៧៦នាក់៕