ដូចអ្នកប្រឆាំងមុនៗដែរ លោក តុ វ៉ាន់ចាន់ បានសុំចូលរួមជីវភាពនយោបាយជាមួយគណបក្សកាន់អំណាចតាមរយៈលិខិតដែលលោកសរសេរជូនទៅសម្តេចនាយករដ្ឋមន្រ្តី ហ៊ុន សែន ជាប្រធានគណគណបក្ស នៅថ្ងៃទី៥ ខែឧសភា ឆ្នាំ២០២៣នេះ។ លោក ជម្រាបសម្តេចថា លោក ចូលគណបក្សប្រជាជនកម្ពុជា គឺដើម្បីរួមចំណែកអភិវឌ្ឍនិងការពារប្រទេសជាតិ។ 
 

អតីតអ្នកនយោបាយប្រឆាំងរូបនេះ បង្ហាញការប្តេជ្ញាទៅកាន់ប្រធានគណបក្សកាន់អំណាចដូច្នេះថា«ខ្ញុំបាទ នឹងដើរតាមគោលនយោបាយរបស់គណបក្សប្រជាជនកម្ពុជា ដោយស្មោះស្ម័គ្រឥតងាករេ ហើយបម្រើនិងការពារគណបក្សប្រជាជនកម្ពុជាពីពេលនេះតទៅ»។ 
 

គេ មិនទាន់ឃើញការឆ្លើយតបពីសម្តេចនយករដ្ឋមន្រ្តី ហ៊ុន សែន នោះទេ។ ប៉ុន្តែ ជាការសង្កេតឃើញក្នុងមួយរយៈចុងក្រោយនេះ យុវជន សកម្មជន និងអ្នកមាននិន្នាការប្រឆាំង បាននាំគ្នាសុំចូលរួមជាមួយគណបក្សប្រជាជនកម្ពុជាជាបន្តបន្ទាប់ ហើយសុទ្ធតែទទួលបានស្វាគមន៍ពីសម្តេចនាយករដ្ឋមន្រ្តី ដោយគ្មានអ្នកណាម្នាក់ ត្រូវបដិសេធឡើយ៕