ជាតិ
កម្ពុជា បញ្ជូនទ័ពមួកខៀវ២៤៤នាក់ ទៅបំពេញបេសកកម្មនៅសាធារណរដ្ឋអាហ្រ្វិកកណ្តាល
× ភ្នំពេញ៖ ក្រោយហ្វឹកហ្វឺនលើជំនាញជាច្រើនដោយជោគជ័យ កម្ពុជា បញ្ជូបកងទ័ពមួកខៀវទៅបំពេញបេសកកម្មរក្សាសន្តិភាពក្រោមឆ័ត្រអង្គការសហប្រជាជាតិចំនួន ២៤៤នាក់ នាយប់នេះ។
កងវិស្វកម្មលេខ៤៣២ នឹងហោះហើរទៅបំពេញបេសកកម្មរក្សាសន្តិភាព ក្រោមឆ័ត្រអង្គការសហប្រជាជាតិ នៅសាធារណរដ្ឋអាហ្រ្វិកកណ្តាល (MINUSCA)នាយប់ថ្ងៃទី៥ ខែឧសភា ឆ្នាំ២០២៣នេះ។ បើតាមប្រសាសន៍ នាយឧត្តមសេនីយ៍ សែម សុវណ្ណនី អគ្គនាយកនៃមជ្ឈមណ្ឌលជាតិរក្សាសន្តិភាព កម្លាំងដែលនឹងចេញយុទ្ធដំណើរនេះ ត្រូវបានអង្គការសហប្រជាជាតិ កែសម្រួលជាកងពហុជំនាញ និងបានបន្ថែមសមាជិកកម្លាំងចំនួន ២៥នាក់បន្ថែមទៀត។ កម្លាំងសរុប២៤៤នាក់នេះ មាននារី ៣០នាក់ មកពីបណ្តា៤០កងឯកភាពនៃកងយោធពលខេមរភូមិន្ទរួមមាន។
នាយឧត្តមសេនីយ៍ សែម សុវណ្ណនី បានបញ្ជាក់បន្ថែមថា៖ «កងកម្លាំងមួកខៀវកម្ពុជា បានទទួលការហ្វឹកហ្វឺនមុនចល័ត និងលើជំនាញវិជ្ជាជីវៈប្រកបដោយគុណភាព ពីគ្រូបង្គោលកម្ពុជា និងពីបណ្តាប្រទេសជាមិត្ត ដើម្បីប្រសិទ្ធភាពនិងប្រសិទ្ធផលដូចបណ្តាកងមុនៗដែរ»។
នាយឧត្តមសេនីយ៍ សែម សុវណ្ណនី អគ្គនាយកនៃមជ្ឈមណ្ឌលជាតិរក្សាសន្តិភាព
ដើម្បីសម្រួលដល់ការបំពេញបេសកកម្មរបស់កងទ័ព រដ្ឋាភិបាលកម្ពុជា បានត្រៀមជាស្រេចនូវឱសថ បរិក្ខារ គ្រឿងបន្លាស់ និងការងារធានាជីវភាពរស់នៅ សម្រាប់រយៈពេល១ឆ្នាំ ព្រមទាំងបានចាក់ថ្នាំបង្ការផ្សេងៗតាមនិយាមរបស់អង្គកាសហប្រជាជាតិផងដែរ។
គួរបញ្ជាក់ផងដែរ រយៈពេល១៧ឆ្នាំមកនេះ កម្ពុជាបានបញ្ជូនកងកម្លាំងចូលរួមបេសកកម្មរក្សាសន្តិភាពរបស់ អ.ស.ប សរុបចំនួន ៨៩៥១នាក់ ក្នុងនោះមាននារីចំនួន៦៩២នាក់។ កម្ពុជា បានបញ្ជូនកម្លាំងចេញបំពេញបេសកកម្មចំនួន១១ និងប្រទេសចំនួន៩ ដូចជា សាធារណរដ្ឋស៊ូដង់ ស៊ូដង់ខាងត្បូង ឆាដ អាហ្វ្រិកកណ្តាល លីបង់ ម៉ាលី ស៊ីរី សាយប្រឺស និងយេមែន។ បច្ចុប្បន្ន កម្លាំងកម្ពុជា ចំនួន៨៧៤នាក់ ក្នុងនោះនារីចំនួន១៤១នាក់ កំពុងបំពេញបេសកកម្មនៅប្រទេសចំនួន៤ រួមមាន សាធារណរដ្ឋស៊ូដង់ខាងត្បូង លីបង់ អាហ្វ្រិកកណ្តាល និងម៉ាលី ៕
Tag:
ទ័ព
មួកខៀវ
សាធារណរដ្ឋអាហ្រ្វិកកណ្តាល
បេសកកម្ម
© រក្សាសិទ្ធិដោយ thmeythmey.com