ខាន់ ចេសា បានចាញ់កីឡាការិនីហ្វីលីពីន Kaila Isip Napolis នាការប្រកួតវិញ្ញាសា Ne-Waza ទម្ងន់៥២គីឡូក្រាម ក្នុងព្រឹត្តិការណ៍កីឡាស៊ីហ្គេមលើកទី៣២ នៅមជ្ឈមណ្ឌល OCIC ជ្រោយចង្វា នាថ្ងៃទី៤ ខែឧសភា។ បរាជ័យក្នុងលទ្ធផលពិន្ទុ ២-០ ធ្វើឱ្យកីឡាការិនីកូនកាត់ខ្មែរ-អាម៉េរិក ទទួលបាន​ត្រឹមមេដាយប្រាក់។
 

ចេសា បង្ហាញការខកចិត្ត និងសោកស្តាយយ៉ាងខ្លាំងនៅចំពោះមុខអ្នកគាទ្រ ដែលមិនអាចដណ្តើមបានមេដាយមាសដំបូងសម្រាប់កម្ពុជាប្រភេទកីឡាជីជិតស៊ូ ក្នុងនាមអត្តពលិកម្ចាស់ផ្ទះ។ យ៉ាងណាក៏ដោយ ចេសា នៅសល់មួយវិញ្ញាសាទៀត និងជាឱកាសដើម្បីដណ្តើមមេដាយមាសសម្រាប់កម្ពុជា។