ភ្នំទំព័រ ស្ថិតក្នុងឃុំប្រម៉ោយ ស្រុកវាលវែង ខេត្តពោធិ៍សាត់ ចម្ងាយ១១៩គីឡូម៉ែត្រ ពីទីរួមខេត្ត។
 

ភ្នំទំព័រ សម្បូរធនធានធម្មជាតិជីវ:ចម្រុះជាច្រើនដូចជា សត្វ ព្រៃឈើ និងមានកន្លែងទេសចរណ៍ជាច្រើន រួមមាន ទឹកធ្លាក់អូរស្ងួតជ្រោះផ្តាច់ព្រលឹង ទឹកធ្លាក់អូរក្រាំង ទឹកធ្លាក់ម៉ែអាស្មី

ទឹកធ្លាក់រូងអ្នកតាជាដើម។
  

ដើម្បីឡើងទៅដល់កំពូលភ្នំ ទេសចរត្រូវឆ្លងកាត់ដំណាក់កាលចំនួន២។ជាដំបូង ទេសចរត្រូវជិះគោយន្តចេញពីសហគមន៍ចម្ងាយ ១,៥គីឡូម៉ែត្របន្ទាប់មកត្រូវដើរថ្មើរជើងរហូតដល់ពាក់កណ្តាលភ្នំ ឬជំរំទី១ ហៅថា «ពួរភ្នំ» ដែលមានរយៈកម្ពស់ ៦៦០ម៉ែត្រ។

 

លោក តេស ថន ប្រធានសមាគមតំបន់ការពារធម្មជាតិភូមិទំព័រ លើកឡើងថាមុនជំងឺកូវីដ-១៩ ទេសចរដែលចាប់អារម្មណ៍ឡើងភ្នំទំព័រ គឺមានចំនួនភ្ញៀវច្រើនក្នុងនោះក៏មានវត្តមានភ្ញៀវបរទេសផងដែរ។ អ្នក ដែលឡើងភ្នំ ពួកគេមកលក្ខណៈជាក្រុមការងារនិងគ្រួសារជាដើម។ ក្រោយពីជំងឺកូវីដ-១៩ បានធូរស្រាល ចំនួនទេសចរបែរជាចុះថយទៅវិញ។

«អ្នកទេសចរជាចំណែកមួយ ដែលបានជួយផ្សព្វផ្សាយតំបន់ទេសចរណ៍ភ្នំទំព័រនេះ។ ពួកគេរីករាយ និងជួយផ្សព្វផ្សាយ រីឯប្រជាជននៅតំបន់នេះក៏មានមុខរបរថ្មីមួយគឺអ្នកនាំភ្ញៀវឡើងភ្នំ។ បើទោះ ចំណូលដែលទទួលបានពីភ្ញៀវទេសចរមិនបានច្រើន ក៏អ្នកនាំផ្លូវទាំងនោះសប្បាយចិត្តហ្នឹងការងារនេះដែរ។» ប្រធានសមាគមតំបន់ការពារធម្មជាតិភូមិទំព័រ លោក តេស ថន ប្រាប់ដូច្នេះ។

 

លោក បន្ថែមថា បច្ចុប្បន្នចំនួនភ្ញៀវដែលឡើងភ្នំ នៅតែមានប៉ុន្តែមិនច្រើនដូចពីមុន ដោយសារកត្តាឧបសគ្គមួយចំនួន ដូចជាអាកាសធាតុក្តៅខ្លាំងបណ្តាឱ្យទឹកដែលហូរតាមតំបន់ជួរភ្នំទំព័រ មិនសូវសម្បូរ។
 

ដោយឡែកតំបន់ខ្លះ គឺមានទឹកជ្រោះ ដែលអាចឱ្យទេសចរប្រើប្រាស់ និងកម្សាន្តយ៉ាងសប្បាយ។លោក ម៉េង បញ្ញា ជាអ្នកមានបទពិសោធជាង ៧ឆ្នាំ និងជាអ្នកនាំផ្លូវភ្ញៀវឡើងភ្នំបែបផ្សេងព្រេងជាច្រើនតំបន់ ដែលជាកន្លែងទាក់ទាញទេសចរគ្រប់ទិសទី។
 

ម្ចាស់ផេក «ទេសចរណ៍ ព្រៃខ្មែរ»រូបនេះ លើកឡើងថា កន្លងមកនេះលោកបានដឹកនាំទេសចរឡើងទៅភ្នំទំព័រ គឺមានចំនួន ៣ក្រុម សរុបចំនួន ២២នាក់។ ដោយឡែក ថ្មីៗនេះ ទេសចរដែលចាប់អារម្មណ៍ឡើងភ្នំនេះ គឺមិនសូវមានដូចមុនឡើយ ប៉ុន្តែតំបន់ទេសចរណ៍ និងភ្នំដទៃទៀត គឺឃើញមានអ្នកទៅដដែល។

 

 

«មួយរយៈនេះ មិនសូវមានភ្ញៀវកក់សេវាកម្មឡើងភ្នំទំព័រទៀតទេដោយសារស្ថានភាពផ្លូវឡើងភ្នំពិបាកខ្លាំង អាចនិយាយបានជាភ្នំដែលពិបាកឡើងជាងគេក្នុងចំណោមភ្នំខ្ពស់ៗក្នុងប្រទេសកម្ពុជា ទោះវាជាជួរភ្នំខ្ពស់លំដាប់ទី៣ក៏ដោយ។ផ្លូវពិបាក និងមានឧបសគ្គច្រើននេះហើយ ទើប មិនសូវមានភ្ញៀវកក់ឡើងភ្នំនេះ។ » នេះជាការបញ្ជាក់របស់លោក ម៉េង បញ្ញា។

 

ជាអ្នកមានបទពិសោធឡើងភ្នំច្រើនឆ្នាំ លោក បញ្ញាបានប្រាប់ដល់អ្នកសារព័ត៌មានThmeyThmey25 ថា អ្នកចង់ឡើងភ្នំទំព័រទាមទារឱ្យមានបទពិសោធឡើងភ្នំ។ អ្នកធ្វើដំណើរ

ត្រូវប្រើពេលវេលាចាប់ពី ៣ថ្ងៃឡើងទៅ ដើម្បីអាចមានពេលធ្វើដំណើរទាំងចុះ និងឡើង។ជាទូទៅ ភ្នំទំព័រ ទេសចរអាចធ្វើដំណើរឡើងនៅចន្លោះខែឧសភា ដល់ខែមិថុនានិងចន្លោះខែវិច្ឆិកា ដល់ខែកុម្ភ: ព្រោះអាកាសធាតុអំណាយផល មិនសូវក្តៅខ្លាំង និងភ្លៀងខ្លាំង។ យ៉ាងណាក៏ដោយអ្នកឡើងភ្នំ ត្រូវប្រុងប្រយ័ត្នពីគ្រោះថ្នាក់អំឡុងពេលធ្វើដំណើរដូចជា ភ្លៀងដីរអិលឬស្រុតដី ឈើបាក់ និងហានិភ័យផ្សេង។

 

លើសពីនេះ លោក ក៏បានលើកទឹកចិត្តឱ្យទេសចរ ដែលមានបំណងទទួលបានបទពិសោធថ្មីៗ អំពីការឡើងភ្នំនានា ក្នុងស្រុកខ្មែរ ជាពិសេសភ្នំទំព័រ ដែលជាភ្នំខ្ពស់លំដាប់ថ្នាក់ទី៣ ស្រុកខ្មែរនេះផងដែរ៕