អន្តរជាតិ
សមាជិករដ្ឋសភាសហរដ្ឋអាមេរិកអនុម័តសេចក្តីព្រាងច្បាប់ពិដានបំណុល រូបឯកសារ៖ រថយន្តមួយបើកកាត់បដាស្តីពីចំនួនប្រាក់បំណុលសហរដ្ឋអាមេរិក ដែលបិទជាប់នឹងកន្លែងរង់ចាំរថយន្តក្រុង នៅរដ្ឋធានីវ៉ាស៊ីនតោន កាលពីថ្ងៃទី ២០ ខែមករា ឆ្នាំ ២០២៣។
× កិច្ចប្រឹងប្រែងដើម្បីបញ្ជៀសការអស់លុយសងបំណុលនៅសហរដ្ឋអាមេរិកឥឡូវនេះសំដៅទៅរកព្រឹទ្ធសភាវិញម្តង បន្ទាប់ពីរដ្ឋសភាបានអនុម័តសេចក្តីព្រាងច្បាប់កាលពីយប់ថ្ងៃពុធ ដើម្បីព្យួរការដាក់កំហិតលើសហរដ្ឋអាមេរិក ក្នុងការខ្ចីប្រាក់ និងដាក់កម្រិតលើការចាយវាយរបស់រដ្ឋាភិបាលលើវិស័យខ្លះ។
មេដឹកនាំសំឡេងភាគច្រើននៅព្រឹទ្ធសភា លោក Chuck Schumer និងមេដឹកនាំសំឡេងភាគតិចនៅព្រឹទ្ធសភា លោក Mitch McConnell បានថ្លែងថា អស់លោកសង្ឃឹមថានឹងមានការអនុម័តលើសេចក្តីព្រាងច្បាប់នេះក្នុងព្រឹទ្ធសភា នៅពេលប៉ុន្មានថ្ងៃខាងមុខ ហើយបញ្ជូនទៅកាន់លោកប្រធានាធិបតី Joe Biden ដើម្បីឱ្យលោកចុះហត្ថលេខា។
ក្រសួងហិរញ្ញវត្ថុសហរដ្ឋអាមេរិកបានព្រមានថា សហរដ្ឋអាមេរិកនឹងអស់ប្រាក់ចាយវាយ នៅថ្ងៃចន្ទក្រោយ បើសិនជាគ្មានការបង្កើនប្រាក់កម្ចីទេ។
សេចក្តីព្រាងច្បាប់នោះបានទទួលការអនុម័តក្នុងរដ្ឋសភាដោយសំឡេងគាំទ្រ ៣១៤ និងសំឡេងប្រឆាំង ១១៧ ទោះជាមានការប្រឆាំងជំទាស់ពីសំណាក់សមាជិកគណបក្សសាធារណរដ្ឋមួយចំនួន ដែលថា សេចក្តីព្រាងច្បាប់នោះ មិនបានកាត់បន្ថយការចាយវាយឱ្យបានច្រើន ដូចដែលពួកគេចង់បាន រីឯសមាជិកនៃគណបក្សប្រជាធិបតេយ្យខ្លះថា មានការកាត់បន្ថយចំណាយច្រើនពេកក៏ដោយ។
សមាជិករដ្ឋសភា ៧១ នាក់ ពីគណបក្សសាធារណរដ្ឋដែលមានសំឡេងភាគច្រើន បានបោះឆ្នោតប្រឆាំង។ ចំណែកខាងគណបក្សប្រជាធិបតេយ្យវិញ សមាជិកដែលបានបោះឆ្នោតប្រឆាំង មានចំនួន ៤៦ នាក់។
នៅក្នុងសេចក្តីថ្លែងការណ៍មួយ ក្រោយការបោះឆ្នោតនៅថ្ងៃពុធ លោកប្រធានាធិបតី Biden បានថ្លែងថា កិច្ចព្រមព្រៀងនេះជាការសម្របសម្រួលគ្នារវាងគណបក្សទាំងពីរ៕
© រក្សាសិទ្ធិដោយ thmeythmey.com