កីឡាជាតិ
ជាតិ
សៀវម៉ី ឈានទៅកាន់វគ្គផ្តាច់ព្រ័ត្រដើម្បីដណ្តើមមេដាយមាស
× កីឡាការិនី ស៊ន សៀវម៉ី បានផ្តល់ក្តីរំភើបដល់កម្ពុជា បន្ទាប់ពីកីឡាការិនីរូបនេះ បានបន្តយកឈ្នះកីឡាការិនីហ្វីលីពីន Alora Kirstie Elaine ក្នុងលទ្ធផល ៦-៥ នៅវគ្គពាក់កណ្តាលផ្តាច់ព្រ័ត្រ។
កីឡាការិនីតេក្វាន់ដូ ស៊ន សៀវម៉ី បានក្លាយជាអត្តពលិកខ្មែរទីមួយបើគិតចាប់តាំងពីឆ្នាំ១៩៧០មក ដែលបានឈ្នះមេដាយពីព្រឹត្តិការណ៍កីឡាប្រចាំទ្វីបអាស៊ី (Asian Games)។ សៀវម៉ី អាយុ១៩ឆ្នាំ បានប្រកួតឈ្នះកីឡាការិនីអ៊ូបេគីស្ថាន Abdullaeva Umida ក្នុងលទ្ធផល ២៩ ទល់នឹង៧ ក្នុងទម្ងន់៧៣គីឡូក្រាមនៅវគ្គ១/៤ផ្តាច់ព្រ័ត្រនាថ្ងៃសុក្រ ទី៣ ខែតុលា។
Umida គឺជាម្ចាស់ការពារតំណែងជើងឯកអាស៊ី និងម្ចាស់មេដាយប្រាក់យុវជនអូឡាំពិក។ សៀវមី ដែលម្ចាស់មេដាយមាសស៊ីហ្គេមផងដែរនោះ បានបន្តទៅជួបជាមួយកីឡាការិនីហ្វីលីពីន Alora Kirstie Elaine ដែលជាម្ចាស់មេដាយសំរិទ្ធ Asian Games កាលពីឆ្នាំ២០១០ និងជាមេដាយមាសស៊ីហ្គេម២ជំនាន់។ នៅជុំទីមួយ សៀវមី ទទួលបានពិន្ទុនាំមុខក្នុងលទ្ធផល ៣-០ នៅជុំទីពីរ និងចាញ់ ៤-០ នៅជុំទីបី ប៉ុន្តែលទ្ធផលសរុប សៀវម៉ី ឈ្នះ ៦-៥។
សូមបញ្ជាក់ថា នេះជាមេដាយទី៧របស់កម្ពុជាពីព្រឹត្តិការណ៍កីឡា Asian Games បន្ទាប់ពីកម្ពុជាបានឈ្នះមេដាយសំរិទ្ធ១នៅឆ្នាំ១៩៦២ ឈ្នះមេដាយប្រាក់២ និងសំរិទ្ធ៣នៅឆ្នាំ១៩៧០ ។
ស៊ន សៀវមី គឺជាកីឡាការិនីតែម្នាក់គត់ដែលឆ្លងផុតដំណាក់កាលឈានទៅដល់ការដណ្តើមបានមេដាយ ខណៈអត្តពលិកបីរូបផ្សេងទៀត រួមមាន ស៊ន ដាវីន ដែលជាបងស្រីបង្កើតរបស់ សៀវមី កីឡាការិនីចំបាប់ ចូវ សុធារ៉ា កីឡាករចំបាប់ ងួន មករា បានរងបរាជ័យដ៏គួរឲ្យខកចិត្តនៅវគ្គ១/៤ផ្តាច់ព្រ័ត្រ។
យោងតាម អនុក្រឹត្យថ្មីស្តីពីការផ្តល់ប្រាក់រង្វាន់របស់រដ្ឋាភិបាល ជ័យលាភីមេដាយមាសនឹងទទួលប្រាក់រង្វាន់ចំនួន៨០លានរៀល (២ម៉ឺនដុល្លារអាមេរិក) មេដាយប្រាក់បាន៤០លានរៀល (១ម៉ឺនដុល្លារអាមេរិក) និងមេដាយសំរិទ្ធ បាន២៤លានរៀល (៦០០០ដុល្លារអាមេរិក) ហើយដៃគូឧបត្ថម្ភផ្សេងៗ សុទ្ធតែបានសន្យាផ្តល់រង្វាន់ជាទីគាប់ចិត្តបន្ថែមទៀតដែរ៕
© រក្សាសិទ្ធិដោយ thmeythmey.com