ជាតិ
នយោបាយជាតិ
បើស្ត្រីដឹកនាំប្រទេសអាចកាត់បន្ថយអំពើពុករលួយបានច្រើន
×
ពិភពលោកកំពុងធ្វើការងារយ៉ាងសកម្ម ដើម្បីបោសសម្អាតអំពើពុករលួយ។ អំពើពុករលួយ គឺជាមហាឧបសគ្គ ក្នុងការអភិវឌ្ឍន៍ប្រទេសជាតិ។ និន្នាការថ្មីមួយយល់ថា ប្រសិនបើនៅលើពិភពលោក មានស្ត្រីជាអ្នកដឹកនាំច្រើន អំពើពុករលួយ ទំនងជាអាចកាត់បន្ថយបានច្រើនជាងបុរស ។ លោក ព្រាប កុល នាយកប្រតិបត្តិអង្គការតម្លាភាពកម្ពុជា បានយល់ស្របខ្លះនឹងនិន្នាការថ្មីនេះ តែវាមិនមែនត្រូវទាំងស្រុងនោះទេ។
សូមស្តាប់លោក ជា ធីរិទ្ធ
អំពើពុករលួយ ប្រៀបដូចជាជំងឺអេដស៍ ហើយប្រសិនបើជំងឺនេះ ឆ្លងចូលក្នងប្រទេសណាមួយហើយ វាយនឹងបផ្លាញ់គ្រប់ប្រព័ន្ធនៃការដឹកនាំនៃប្រទេសនោះ ពោលគឺមិនអាចរីកចម្រើនបានឡើយ ។ នេះជាមហន្តរាយនៃអំពើពុករលួយ ដែលកំពុងបរិយាយដោយលោក ព្រាប កុល នាយកប្រតិបត្តិអង្គការតម្លាភាពកម្ពុជា។ សកម្មជនប្រឆាំងនឹងអំពើពុករលួយរូបនេះ បញ្ជាក់ថា បើអំពើពុករលួយនេះ កើតមានក្នុងរដ្ឋណាមួយហើយ រដ្ឋាភិបាលនៃប្រទេសនោះត្រូវតែមានវិធានការទប់ស្កាត់ និងកម្ចាត់ចោលជាបន្ទាន់ បើចង់ឲ្យប្រទេសជាតិរីកចម្រើន។ វិធានការទាំងនោះអាចធ្វើបាន លុះត្រាតែមេដឹកនាំនៃប្រទេសដែលមានអំពើពុករលួយកើតឡើង មានចេតនាពិតប្រាកដក្នុងការបោសសម្អាតអំពើពុករលួយ។
ទាក់ទងនឹងមេដឹកនាំនេះ អ្នកស្រាវជ្រាវមួយចំនួន បានយល់ឃើញថា ប្រសិនបើពិភពលោក ឬប្រទេសនីមួយៗ មានមេដឹកនាំជាស្ត្រីច្រើន អំពើពុករលួយទំនងជាងអាចកាត់បន្ថយបានគ្រាន់បើជាងបុរសជាមេដឹកនាំ។ ពីព្រោះ តែស្ត្រី ជាមនុស្សដែលមានទឹកចិត្តសន្តុះប្រណីច្រើន និងភ័យខ្លាច មិនហ៊ានប្រព្រឹត្តអំពើពុករលួយខ្លាំងក្លាដូចជាបុរសឡើយ។ ម្យ៉ាងទៀត ស្ត្រីដែលតស៊ូបានក្លាយជាមេដឹកនាំ ភាគច្រើន គឺជាស្ត្រីដែលមានសមត្ថភាព និងជាមនុស្សលះបង់ខ្ពស់ ។
ចំពោះទស្សនៈខាងលើនាយកប្រតិបត្តិអង្គការតម្លាភាពកម្ពុជា លោក ព្រាប កុល បានយល់ស្របខ្លះដែរ ពីព្រោះថា ស្ត្រីជាមនុស្សដែលមានមេត្តាច្រើនជាងបុរស។ តែយ៉ាងណាក៏ដោយ ទស្សនៈនេះ លោក ព្រាបកុល អះអាងថា វាមិនមែនជាកត្តាស្វ័យប្រវត្តិសម្រាប់មេដឹកនាំជាស្ត្រីទូទៅឡើយគឺវាអាស្រ័យទៅលើបុគ្គល និងតាមរបបដឹកនាំនៃប្រទេសនីមួយៗតែប៉ុណ្ណោះ ។ ហើយបើនិយាយសម្រាប់បរិបទកម្ពុជាវិញ ទំនងជាមិនសូវត្រូវនោះទេ ពីព្រោះថា កន្លងមកនៅកម្ពុជា ស្ត្រីត្រូវគេមើលឃើញថា គឺជាអ្នកចូលរួមចំណែក និងជំរុញឲ្យមានអំពើពុករលួយ នៅពេលដែលប្តីរបស់ខ្លួនបម្រើការងារនៅក្នុងស្ថាប័នរដ្ឋ។ នេះជាការបញ្ជាក់របស់លោក ព្រាប កុល ៕
© រក្សាសិទ្ធិដោយ thmeythmey.com