ជាតិ
នយោបាយជាតិ
EU ជំរុញវប្បធម៌សន្ទនានៅកម្ពុជា លោក Jean-françois CAUTAIN ប្រតិភូសហភាពអឺរ៉ុបប្រចាំកម្ពុជា
× នៅក្នុងទិវាសិទ្ធិមនុស្សអន្តរជាតិ សហភាពអឺរ៉ុបប្រចាំនៅកម្ពុជា បានរៀបចំវេទិកាវាគ្មិន នៅក្នុងបរិវេណនិវេសនដ្ឋាននៃប្រតិភូសហភាពអឺរ៉ុប។ មនុស្សប្រមាណ១៥០នាក់ ត្រូវបានអញ្ជើញចូលរួមក្នុងវេទិកានេះ ដែលរួមមាន សមាជិកសហភាពអឺរ៉ុប មន្ត្រីរដ្ឋាភិបាល សង្គមស៊ីវិល វិស័យឯកជន អង្គការក្រៅរដ្ឋាភិបាលជាតិ និងអន្តរជាតិ ទីភ្នាក់ងារអង្គការ សហប្រជាជាតិ និងសិស្ស និស្សិតជាដើម។
វេទិការនេះរៀបចំឡើង មិនមែនត្រឹមតែដើម្បីប្រារព្ធទិវាសិទ្ធិមនុស្សអន្តរជាតិប៉ុណ្ណោះទេ ប៉ុន្តែថែមទាំងដើម្បីផ្តល់ឱកាសដល់សាធារណៈជន ធុរៈជន មន្ត្រីសង្គមស៊ីវិល និងមន្ត្រីរដ្ឋាភិបាល បានប្រាស្រ័យទាក់ទងគ្នាលើបញ្ហានានាដែលទាក់ទងនឹងសិទ្ធិមនុស្សនៅអឺរ៉ុប អាស៊ាន និងកម្ពុជា។ ជាពិសេស គឺលើកទឹកចិត្តដល់វប្បធម៌សន្ទនាគ្នានៅក្នុងសង្គមកម្ពុជា ស្តីពីបញ្ហាសិទ្ធិមនុស្ស និងបញ្ហាពាក់ព័ន្ធដទៃទៀត។
ថ្លែងនៅក្នុងសន្និសីទសារព័ត៌មានកាលពីល្ងាចថ្ងៃទី១០ធ្នូនោះ លោក ហ្សង់ ហ្វ្រង់ស័រ កូតាំង ឯកអគ្គរដ្ឋទូតសហភាពអឺរ៉ុបប្រចាំកម្ពុជា បានមានប្រសាសន៍ថា៖« ការការពារ និងលើកកម្ពស់សិទ្ធិមនុស្សនៅជុំវិញពិភពលោក គឺជាគុណតម្លៃស្នូលរបស់សហភាពអឺរ៉ុប រួមជាមួយនឹងលទ្ធិប្រជាធិបតេយ្យ និងនីតិរដ្ឋផងដែរ»។ លោក សង្ឃឹមថាដៃគូសហភាពអឺរ៉ុបទាំងអស់ ព្រមទាំងថ្នាក់ដឹកនាំបច្ចុប្បន្ន និងអនាគតរបស់ប្រទេសកម្ពុជា ក៏មានទស្សនៈដូចគ្នានេះដែរ។ សម្រាប់លោកឯកអគ្គរដ្ឋទូត សន្តិភាព ការអភិវឌ្ឍន៍ កំណើនសេដ្ឋកិច្ច និងវិបុលភាពប្រកបដោយនិរន្តរភាពមិនអាចកើតឡើងឡើយ ប្រសិនបើគ្មានការគោរពសិទ្ធិមនុស្ស។
នេះជាលើកទី២ហើយ ដែលប្រតិភូសហភាពអឺរ៉ុប បានរៀបចំវេទិកានេះឡើង ដោយយកលំនាំគំរូតាមវេទិកាវាគ្មិន នៅ Hyde Park ចក្រភពអង់គ្លេស។ នៅឆ្នាំនេះ វេទិកាវាគ្មិន បានផ្តោតលើប្រធានបទពិភាក្សាចំនួន៥ ដែលឈរលើគោលការណ៍គោរពសិទ្ធិមនុស្ស រួមមានកំណែទម្រង់ការបោះឆ្នោត បរិស្ថាន ការងារ ចំណាកស្រុក និងបណ្តាញព័ត៌មានសង្គម៕
© រក្សាសិទ្ធិដោយ thmeythmey.com