ជាតិ
សង្គមជាតិ
ពលរដ្ឋមិនសប្បាយចិត្ត ចំពោះផ្លូវកំពង់ក្របៅ ដែលកាន់តែទ្រុឌទ្រោម
× កំពង់ធំ៖ ផ្លូវមួយខ្សែលាតសន្ធឹងតាមបណ្តោយមាត់ស្ទឹងសែន ដែលអ្នកស្រុកស្គាល់គ្រប់គ្នាថា ផ្លូវកំពង់ក្របៅ ស្ថិតក្នុងភូមិកំពង់ក្របៅ ក្រុងស្ទឹងសែន ខេត្តកំពង់ធំ កំពុងរងការខូចខាតជាដំណំ បន្ទាប់ពីទឹកជំនន់តាំងពីឆ្នាំ២០១០ ។
តាមការឱ្យដឹងពីប្រជាពលរដ្ឋដែលរស់នៅតាមបណ្តោយវិថីមួយនេះ ផ្លូវនេះបានធ្វើរួចរាល់ហើយ និងបានដាក់ឱ្យប្រជាជនប្រើប្រាស់មុនឆ្នាំ២០១០ ដែលកាលណោះវាមានលក្ខណៈល្អប្រសើរណាស់។ ប៉ុន្តែអំឡុងឆ្នាំ២០១០ មានទឹកជំនន់ធំ ទឹកឡើងលិចផ្លូវមួយខ្សែនេះអស់ ហើយវាក៏ចាប់ផ្តើមខូចខាតធ្ងន់ធ្ងរខ្លាំងពីពេលនោះដែរ។ សព្វថ្ងៃ ផ្លូវនេះ កាន់តែយ៉ាប់យ៉ឺនទៅទៀត ដោយសារមានឡានដឹកដីរបស់ក្រុមហ៊ុនឯកមួយ ដែលបានធ្វើអោយស្ថានភាពកាន់តែទ្រុឌទ្រោម។
អ៊ំស្រី លី គឹមស្រ៊ាង អាយុ៥០ឆ្នាំប្លាយ ជាប្រជាជនរស់នៅតាមមាត់ផ្លូវកំពង់ក្របៅនេះបានប្រាប់ថា៖ «រឿងផ្លូវនេះវាខូច គឺវាលំបាកហើយ តែយើងមិនដឹងធ្វើដូចម្តេចនោះទេ។ ហើយក្នុងនាមជាប្រជាពលរដ្ឋម្នាក់ ខ្ញុំសំណូមពរឱ្យធ្វើផ្លូវមួយនេះឱ្យស្អាតទៅ នោះស្ថានភាពក៏វាល្អប្រសើរជាងពេលមានជង្ហុកបែបនេះដែរ»។
ផ្លូវនេះអាជ្ញាធរក៏ធ្លាប់ជួសជុលដែរ តែធ្វើបន្តិចបន្ទួចប៉ុណ្ណោះ។ ហើយនាពេលថ្មីៗនេះក៏គេជួសជុលដែរ ត្រង់កន្លែងណាដែលខូចខ្លាំង តែវាមិនបានទាំងស្រុងនៅឡើយ។
ចំណែកលោកពូ សឿ អាយុ៤០ឆ្នាំ អ្នកប្រកបរបរជាអ្នករត់ម៉ូតូឌុប បានរៀបរាប់ឱ្យដឹងថា ផ្លូវនេះទទួលរងការខូចខាតជាង៣ឆ្នាំហើយ តាំងពីទឹកធំម្តងមក។ អ្នករត់ម៉ូតូឌុប ដែលតែងតែបើកបរលើបណ្តោយផ្លូវនេះ បានរអ៊ូរទាំថា គាត់ពិបាកបើកបរដឹកភ្ញៀវនៅលើផ្លូវនេះណាស់។ គាត់ក៏ប្រាប់បន្ថែមថា ផ្លូវនេះវាខូចខ្លាំងដោយឡានដឹកដីរបស់ក្រុមហ៊ុនឯកជនមួយ ហើយនៅខែវស្សាវិញ កង់ឡានវាជាប់ដី ហើយវាធ្វើឱ្យប្រឡាក់ជាប់ថ្នល់ជាដីដុំៗ ។ លោក សឿ បញ្ជាក់យ៉ាងដូច្នេះ៖«ពេលភ្លៀងមក គឺរអិល បើជិះម៉ូតូមិនស្រួល អាចដួលម៉ូតូ ធ្វើឱ្យមានគ្រោះថ្នាក់មិនខាន។ ថ្មីៗនេះក៏ឃើញមានគេជួសជុលដែរតែធ្វើដោយអន្លើទេ។ ខ្ញុំក៏មិនដឹងថា អ្នកជួលជុលនោះ គឺជារដ្ឋ ឬក៏ឯកជនទេបើសិនជាគេឆាប់ធ្វើផ្លូវមួយខ្សែនេះវាក៏ល្អម្យ៉ាងដែរ ព្រោះវានឹងភាពងាយស្រួលដល់ប្រជាពលរដ្ឋ និងបានជាប្រយោជន៍សាធារណៈទូទៅផងដែរ»។
ពាក់ព័ន្ធនឹងផ្លូវកំពង់ក្របៅដែលកំពុងរងការគំរាមកំហែងនេះ លោកចៅសង្កាត់កំពង់ក្របៅ ចាន់ ប៊ុន បានពន្យល់ថា ផ្លូវនេះបើគិតពីគល់ស្ពានទៅដល់ចុងភូមិ មានប្រវែងប្រមាណជា១៨០០ម៉ែត្រ ហើយផ្លូវនេះដែរ បានខូចខាតក្នុងកំឡុងពេលមានព្យុះកេតសាណា។ អ៊ីចឹងការជួលជុលផ្លូវនេះ ក៏ត្រូវទទួលបានលុយពីគម្រោងកេតសាណាមកជួសជុលដែរ។ ប៉ុន្តែការជួសជុលនោះត្រូវបានអនុវត្តតែបន្តិចប៉ុណ្ណោះ។
លោកចៅសង្កាត់បានប្រាប់អោយដឹងថា លោកបានដាក់ស្នើគម្រោងឆ្នាំ២០១៥ទៅមន្ទីរសាធារណការខេត្តហើយ ប៉ុន្តែលោកនៅមិនទាន់ទទួលបានចម្លើយនៅឡើយទេ។ លោកចៅសង្កាត់ បានទទួលស្គាល់ពីការមិនសប្បាយចិត្តពីពលរដ្ឋ ដែលមិនដឹងថាផ្លូវនេះស្ថិតនៅក្រោមការទទួលខុសត្រូវរបស់មន្ទីរសាធារណការ ហើយបានរអ៊ូរទាំដាក់ដ្នាក់ដឹកនាំសង្កាត់៕
© រក្សាសិទ្ធិដោយ thmeythmey.com