ជាតិ
នយោបាយជាតិ
លោក សម រង្ស៊ី រិះគន់ចលនាថ្មីដែលចង់បង្កើតគណបក្ស លោក សម រង្ស៊ី
× ពីវេទិកានៃគណបក្សសង្គ្រោះជាតិ កាលពីថ្ងៃទីល្ងាចថ្ងៃទី១០ធ្នូដែលជាទិវាសិទ្ធិមនុស្សអន្តរជាតិនោះ លោក សម រង្ស៊ី ប្រធានគណបក្សជំទាស់ បាននិយាយច្រើនពីលទ្ធផលនៃការចរចាជាមួយគណបក្សកាន់អំណាចរបស់លោកនាយករដ្ឋមន្ត្រី ហ៊ុន សែន ប្រាប់អ្នកគាំទ្ររបស់ខ្លួន។ ពីវេទិកាដដែល ប្រធានគណបក្សសង្គ្រោះជាតិ ក៏ឆ្លៀតរិះគន់ចលនាថ្មីដែលគំរាមបង្កើតគណបក្សប្រឆាំងថ្មីទៀតដែរ។
លោក សម រង្ស៊ី បាននិយាយស្រែកខ្លាំងដាក់ក្បាលមីក្រូ ដើម្បីពន្យល់ប្រាប់អ្នកគាំទ្រដែលស្តាប់លោកនៅទីលានប្រជាធិបតេយ្យថា ពួកគេ និងពលរដ្ឋខ្មែរកំពុងទទួលបានផ្លែផ្កាពីដើមឈើមួយដើម ដែលបានដាំដោយគណបក្សសង្គ្រោះជាតិ។ ហើយថាផ្លែផ្កានេះ កំពុងចេញរូបរាងដោយប្រើប្រាស់រយៈពេលខ្លីតែប៉ុណ្ណោះ។ លោក សម រង្ស៊ី កំពុងនិយាយអំពីការសម្រេចចិត្តរបស់គណបក្សនេះក្នុងការដើរចូលរដ្ឋសភា ហើយចាប់ផ្តើមជជែកជាមួយគណបក្សប្រជាជនកម្ពុជាអំពីការកែទម្រង់ថ្នាក់ជាតិធំៗមួយចំនួន។
«ក្នុងរយៈពេល២ខែទៀត យើងនឹងបានប្តូរគណកម្មាធិការជាតិរៀបចំការបោះឆ្នោតហើយ។ ខ្ញុំសន្យាថា នៅឆ្នាំ២០១៥ គណបក្សសង្គ្រោះជាតិនឹងមានទូរទស្សន៍ហើយ សូមបងប្អូនចាំបើកមើល! ការផ្លាស់ប្តូរមួយទៀត គណបក្សមិននៅក្នុងរដ្ឋាភិបាល នឹងត្រូវទទួលស្គាល់ជាផ្លូវការតាមច្បាប់…»។ លោក សម រង្ស៊ី បានចាត់ទុកលទ្ធផលទាំងនេះ ជាផ្លែផ្កាដ៏ល្អដែលចេញពីដើមឈើដែលគណបក្សសង្គ្រោះជាតិបានដាំ តែរយៈពេលប៉ុន្មានខែជាមួយគណបក្សប្រជាជនកម្ពុជា។
ប៉ុន្តែសម្រាប់លោក សម រង្ស៊ី មានមនុស្សមួយចំនួនមិនបានពេញចិត្តនឹងផ្លែផ្កានេះទេ ហើយចង់កាប់បំផ្លាញដើមឈើនេះចោលទៀត។ លោក សម រង្ស៊ី កំពុងនិយាយអំពីបណ្តាញសង្គមខ្មែរដើម្បីខ្មែររបស់ក្រុមសង្គមស៊ីវិល និងអ្នកស្រាវជ្រាវមួយចំនួនដែលគេស្គាល់ឈ្មោះហើយ ដែលបានព្រមានបង្កើតគណបក្សនយោបាយរបស់ខ្លួនមួយ។
លោក សម រង្ស៊ី និយាយយ៉ាងដូច្នេះថា៖ «អ្នកខ្លះ គេមិនសប្បាយចិត្ត។ គេឃើញយើងដាំដើមឈើ ពូជសង្គ្រោះជាតិ យើងដាំតែ៤ ឬ៥ខែ ស្រាប់តែលូតលាស់ធំ ចេញជាផ្លែ គេថាឲ្យកាប់ចោលទៅ។ គេសុំដាំថ្មី។ បងប្អូនមានដែលឮទេ? ប៉ុន្តែដើមឈើនោះ មិនដឹងរើសពូជពីណាមកទេ?» លោក សម រង្ស៊ី អំពាវនាវដល់អ្នកគាំទ្រឲ្យថែរក្សាដើមសង្គ្រោះជាតិវិញ ដោយនិយាយយ៉ាងដូច្នេះ៖«ដើមឈើយើងធំហើយណា បងប្អូន។ សូមជួយថែទាំណា! បានផ្លែប៉ុណ្ណេះហើយ សូមរង់ចាំបន្តិចទៅ ទុំហើយ។ បានហូបទាំងអស់គ្នា មិនត្រឹមតែយើងទេ ប៉ុន្តែសម្រាប់កូនចៅយើងជំនាន់ក្រោយៗទៀត»៕
© រក្សាសិទ្ធិដោយ thmeythmey.com