ជាតិ
សេដ្ឋកិច្ច
ម្រេចដារ-មេមត់ បោះជំហានវាយលុកលើទីផ្សារអន្តរជាតិ
× ឃុំដារគឺជាទីតាំងដាំម្រេចដ៏ធំមួយក្នុងចំណោមឃុំទាំង១៤នៃស្រុកមេមត់ ខេត្តត្បូងឃ្មុំ ក៏ដូចជាប្រទេសកម្ពុជាទាំងមូល។ បើតាមលោកមេឃុំ យិន សុផា ក្នុងចំណោមពលរដ្ឋជាង២៤០០គ្រួសារ មាន៦០ភាគរយ ប្រកបរបរដាំម្រេច ដោយមានផ្ទៃដីរួមប្រមាណ១១២០ហិកតា។
លោកមេឃុំ យិន សុផា ដែលមានតួនាទីជានាយកប្រតិបត្តិសហគមន៍អភិវឌ្ឍន៍កសិកម្មដំណាំម្រេច ដា-មេមត់ ផងដែរនោះ បានបញ្ជាក់ប្រាប់គេហទំព័រថ្មីៗថា ផ្ទៃដីដាំម្រេចនៅឃុំដារ បានគ្របដណ្តប់ប្រមាណ៧០ភាគរយនៃផ្ទៃដីក្នុងស្រុកមេមត់ទាំងមូល។ ក្នុងចំណោមចម្ការម្រេចប្រមាណជា១១២០ហិកតា ៩៥ភាគរយគឺជាកម្មសិទ្ធិរបស់ប្រជាពលរដ្ឋនៅមូលដ្ឋាន។
«ពលរដ្ឋនៅក្នុងមូលដ្ឋានរបស់ខ្ញុំប្រមាណ៦០ភាគរយ ចិញ្ចឹមជីវិតដោយសាររបរដាំម្រេច ខណៈអ្នកខ្លះទៀតពឹងផ្អែកលើដំណាំកៅស៊ូ ដំឡូង និងរបររកស៊ីផ្សេង» នេះជាការអះអាងរបស់លោក យិន សុផា ដែលបានបង្កើតឲ្យមានសហគមន៍អភិវឌ្ឍន៍កសិកម្មដំណាំម្រេច ដា-មេមត់ ចាប់តាំងពីឆ្នាំ២០១០ មក។
លោក សុផា បានបញ្ជាក់ថា តាមរយៈសហគមន៍អភិវឌ្ឍន៍កសិកម្មដំណាំម្រេច ដា-មេមត់ ពលរដ្ឋអាចដឹងពីតម្លៃស្តង់ដានៃទីផ្សារ ដែលកន្លងមក ការលក់ដូរ គឺស្រេចតែទៅលើការកំណត់របស់ឈ្មួញ។ លោ ក បានបន្ថែមថា ក្នុងនាមជាសមាជិកសហគមន៍ម្រេចអន្តរជាតិ IPC (International Pepper Community) សហគមន៍របស់លោកមានច្រកជាច្រើនក្នុងការនាំចេញម្រេចទៅកាន់ទីផ្សាអន្តរជាតិ។
លោកក៏បានគូសបញ្ជាក់ផងដែរ ក្រសួងកសិកម្ម ក្រសួងពាណិជ្ជកម្ម និងមន្ទីរពាក់ព័ន្ធ បានយកចិត្តទុកដាក់យ៉ាងខ្លាំងក្នុងការជុំរុញ និងផ្សព្វផ្សាយផលិតផលម្រេចនៅឃុំដារ ហើយកន្លងមក ក្រៅពីប្រទេសជិតខាងវៀតណាម និងថៃ ផលិតផលទាំងនេះ ក៏ធ្លាប់បាននាំទៅកាន់ទីផ្សារអឺរ៉ុប និងប្រទេសមួយចំនួនផងដែរ ដូចជាអាល្លឺម៉ង់ អារ៉ាប់រួម និងសិង្ហបុរី ជាដើម។
© រក្សាសិទ្ធិដោយ thmeythmey.com