កីឡាជាតិ
ជាតិ
TriAsia សន្យាផ្តល់បៀវត្ស២ខែដល់គ្រូជំនួយ និងកីឡាករខ្មែរដែលខ្លួនបញ្ចប់កិច្ចសន្យា
× ក្រោយមានការសម្របសម្រួលពីសំណាក់មន្ត្រីក្រសួងការងារ ថ្នាក់ដឹកនាំក្រុមហ៊ុន TriAsia Group បានសន្យាផ្តល់ប្រាក់បៀវត្សចំនួនពីរខែដល់គ្រូជំនួយ១រូប និងកីឡាករ៦រូប ដែលត្រូវបានក្លិប TriAsia Phnom Penh FC បញ្ចប់កិច្ចសន្យា កាលពីចុងឆ្នាំកន្លងមក។ នេះបើតាមការអះអាងរបស់លោក ភា វិភព។
លោក ភា វិភព គ្រូជំនួយដែលត្រូវក្លិបបញ្ចប់កិច្ចសន្យា បានបញ្ជាក់ប្រាប់សារព័ត៌មានថ្មីៗ នៅថ្ងៃពុធ ទី១៤ ខែមករា ឆ្នាំ២០១៥ នេះ ថា លោក និងកីឡាករ៦រូបទៀតរួមមាន កីឡាករ ធុល សុធារិទ្ធ កីឡាករ វី លីកា កីឡាករ ឡេង ណារិន កីឡាករ សេង កុសែន កីឡាករ ហ្វ៊ី រ៉ូហ្វីន និងកីឡាករ លឹម យូ បានសម្រេចចិត្តដកពាក្យបណ្តឹងនៅក្រសួងការងារ បន្ទាប់ពីភាគីក្រុមហ៊ុន បានពិចារណារបើកប្រាក់ខែចំនួនពីរខែដល់ពួកគេ។
លោកបានបន្ថែមថា៖ «ភាគីក្រុមហ៊ុន បានយល់ព្រមបើកប្រាក់ខែចំនួនពីរខែដល់ពួកយើងនៅចុងខែមករា និងចុងខែមិនា។ ខ្ញុំ និងកីឡាករទាំងអស់យល់ព្រមតាមការចរចានេះ ពីព្រោះពួកយើងទទួលស្គាល់ថា ក្លិបកំពុងមានបញ្ហាហិរញ្ញវត្ថុ។ ការសម្រេចរបស់ក្រុមហ៊ុន គឺដោយសារតែមានការអន្តរាគមន៍ពីសំណាក់ក្រសួងការងារផងដែរ»។
បើតាមប្រភពពីក្លិប TriAsia កាលពីចុងឆ្នាំ២០១៤ វិបត្តិហិរញ្ញវត្ថុ បានតម្រូវឲ្យក្លិបបញ្ចប់កិច្ចសន្យាបុគ្គលិក និងកីឡាករទាំងខ្មែរ និងបរទេសសរុបចំនួន១៣នាក់។ ទាក់ទងនឹងបញ្ហានេះ លោក វិភព បានលើកឡើងថា លោក និងកីឡាករខ្មែរ៦រូបទៀត គិតគូតែបញ្ហាខ្លួនឯងតែប៉ុណ្ណោះ ដោយមិនលូកលាន់ករណីរបស់កីឡាករ និងបុគ្គលិកបរទេសនោះឡើយ។
ដោយមិននិយាយពីភាគីបរទេស គ្រូជំនួយ និងកីឡាករខ្មែរដែលត្រូវបានដកចេញមានប្រាក់បៀរវត្សចន្លោះ ពី២០០ដុល្លារ ដល់៨០០ដុល្លារអាមេរិក ហើយភាគច្រើនសុពលភាពនៃកិច្ចសន្យារបស់ពួកគេបន្តរហូតដល់ខែសីហា ឆ្នាំ២០១៥ ៕
© រក្សាសិទ្ធិដោយ thmeythmey.com