ជាតិ
បទវិភាគ
×![]()
ដោយ: ថ្មីៗ
សូក្រាត ទស្សនវិទូក្រិកបុរាណ បានអះអាងថា ការជជែកគ្នានឹងនាំទៅដល់គតិបណ្ឌិត។ ក្នុងតថភាពសង្គម យើងបានសង្កេតឃើញថា ការជជែកមួយចំនួនពិតជាបាននាំទៅដល់គតិបណ្ឌិតមែន។ ទោះបីជាយ៉ាងនេះក៏ដោយ ក៏យើងបានពិនិត្យឃើញថា មានការជជែកមួយចំនួនមិនត្រឹមតែមិនអាចនាំទៅដល់គតិបណ្ឌិតប៉ុណ្ណោះទេ ប៉ុន្តែ ថែមទាំងនាំទៅដល់ជម្លោះ និង ការទទួលរងការិះគន់យ៉ាងចាស់ដៃទៀតផង។
ការជជែកគ្នា ដែលនឹងនាំទៅដល់គតិបណ្ឌិត គឺជាការជជែកមួយ ដែលអ្នកជជែកស្គាល់ប្រធានបទច្បាស់ ស្គាល់បញ្ហាច្បាស់ គោរពនីតិវិធីនៃការជជែក ផ្ដល់ឱកាសឱ្យដៃគូពិភាក្សាបញ្ចេញមតិ យោបល់ ព្រមទាំងទទួលស្គាល់ការពិត ភាពសមហេតុផល ភាពត្រឹមត្រូវ ភាពជាក់ស្ដែង តថភាព និង ត្រូវចេះប្រើពាក្យពេចន៍សមរម្យ ថ្លៃថ្នូរចំពោះដៃគូជជែករបស់ខ្លួន។
លើសពីនេះទៀត អ្នកជជែកត្រូវស្គាល់ខ្លួនឯង ត្រូវគោរពពេលវេលាក្នុងការជជែក ត្រូវគោរពក្រមសីលធម៌ក្នុងការជជែក និង ត្រូវផ្ដល់ការពន្យល់ដោយសមហេតុផល ស្របទៅនឹងសច្ចភាព ជាជាងការស្រែកឱ្យតែឭខ្លាំង ឬ ការប្រើពាក្យគ្រោតគ្រាតចំពោះដៃគូរពិភាក្សារបស់ខ្លួន។ ក្រៅពីនេះ អ្នកជជែកក៏ត្រូវផ្ដល់ឱកាសឱ្យដៃគូសន្ទនាលើកឡើងនូវគំនិត យោបល់របស់ខ្លួន ជាជាងបន្ទុចបង្អាក់ ឬ កាត់សម្ដីមិនឱ្យដៃគូរនិយាយការណ៍ពិត ឬ បញ្ចេញយោបល់របស់ខ្លួន។ ជាពិសេស អ្នកជជែក ត្រូវចៀសវាងការបង្កជម្លោះជាមួយដៃគូក្នុងការពិភាក្សា។
ការជជែកអាចធ្វើឡើងដោយទល់មុខគ្នាតែពីរនាក់ ជាក្រុមតូច ឬ ក្រុមធំ ដូចជា ក្នុងអង្គប្រជុំ សិក្ខាសាលា សន្និសីទ វេទិកាតុមូល សន្និសីទកាសែត ឬ ការផ្ដល់បទសម្ភាសជាមួយវិទ្យុនិងទូរទស្សន៍ ជាដើម។ ទោះបីជាក្នុងពិធីណា ពេលណា និង ក្នុងលក្ខខណ្ឌណាក៏ដោយ ក៏ការជជែកត្រូវតែប្រកាន់សច្ចភាព ភាពសមហេតុផល ការណ៍ពិត គោរពសិទ្ធិដៃគូជជែក គោរពសីលធម៌ក្នុងការជជែក និង គោរពលក្ខខណ្ឌផ្សែងទៀត ដូចបានលើកឡើងខាងលើ។ បើមិនដូច្នោះទេ ការជជែកនោះមិនត្រឹមតែមិនបានទទួលគតិបណ្ឌិតប៉ុណ្ណោះទេ ប៉ុន្តែ ថែមមទាំងអាចបង្កជម្លោះជាមួយដៃគូ និង ទទួលរងការរិះគន់និងការមិនចូលចិត្តពីអ្នកស្ដាប់ផងដែរ។
ហេតុនេះ អ្នកនាំពាក្យ អ្នកវិភាគសង្គម អ្នកនយោបាយ វាគ្មិន អ្នកផ្ដល់បទសម្ភាស អ្នកដឹកនាំ និង អ្នកពាក់ព័ន្ធដទៃទៀត ដូចជា ពិធីករ ជាដើម ដែលធ្លាប់មានកំហុសដូចបានលើកឡើងខាងលើ គួរបែរមកជជែកដោយផ្អែកលើចំណេះដឹង ជំនាញ បទពិសោធ ទិន្នន័យ ការពិនិត្យសង្កេត ការពិចារណា ហេតុការណ៍ ភាពសមហេតុផល និង សច្ចភាព ជាជាងផ្អែកលើ ពាក្យសម្ដីជេរប្រមាថ ពាក្យគ្រោតគ្រាត ពាក្យគំរាមកំហែង ដែលអាងលើ កម្លាំង អំណាច តួនាទី បុណ្យស័ក្ដិ ខ្នងបង្អែក អាយុ ឬទ្រព្យសម្បត្តិ របស់ខ្លួន៕
Tag:
សង្គម
នយោបាយ
© រក្សាសិទ្ធិដោយ thmeythmey.com
