ជាតិ
សារមន្ទីរកូរ៉េខាងជើងដំបូងគេបង្អស់នៅកម្ពុជាសម្ពោធជាផ្លូវការ សៀមរាប៖ សារមន្ទីរសព្វទស្សន៍អង្គរ ឫហៅជាភាសាអង់គ្លេស Angkor Panorama Museum បានដាក់សម្ពោធជាផ្លូវការហើយនៅរសៀលថ្ងៃទី ៤ ធ្នូ ឆ្នាំ២០១៥ ។ ជាសារមន្ទីរដំបូងបង្អស់ ដែលកសាងឡើងដោយប្រទេសកូរ៉េខាងជើង និងមានវត្តមាននៅលើទឹកដីអង្គរ។
សារមន្ទីរដ៏ស្កឹមស្កៃមួយ បានផុសចេញនៅលើទឹកដីនៃរមណីយដ្ឋានអង្គរ ដែលធ្វើឲ្យមហាជនមានការភ្ញាក់ផ្អើល។ ភ្ញាក់ផ្អើលត្រង់ថា វាជាសារមន្ទីរមួយថ្មី ប្លែកពីសារមន្ទីរដែលមានកន្លងមក។ កសាងឡើងតាមរចនាបថខ្មែរពិតៗ សារមន្ទីរសព្វទស្សន៍អង្គរ ធ្វើឲ្យអ្នកទស្សនា គយគន់មិនចេះនឿយណាយ និងចង់ផ្តិតរូបភាពទាំងស្រុងនៅក្នុងសារមន្ទីរនេះម្តង។
ពុំមានរូបបដិមា ដូចនិងសារមន្ទីរផ្សេងៗទៀតនោះទេ សព្វទស្សន៍អង្គរគឺជាសារមន្ទីរលក្ខណៈ 3D ដែលបំពាក់គ្រឿងបរិក្ខាទំនើបៗ ។ ប្រវត្តិប្រាសាទ ប្រវត្តិព្រះមហាក្សត្រខ្មែរសម័យដើម គឺមានបញ្ចូលនៅក្នុងម៉ាស៊ីនស្វ័យប្រវត្តិ ដែលអាចឲ្យអ្នកទស្សនាចុចមើល និងអានដោយងាយស្រួលបំផុត។ ក្រៅពីនេះ សព្វទស្សន៍អង្គរ ឫប៉ាណូរ៉ាម៉ា មានបន្ទប់មើលភាពយន្ត 3D និងផ្ទាំងគំនូរ 3D ដែលបង្ហាញពីការសាងសង់ប្រាសាទអង្គរវត្ត សម័យរុងរឿង និងជីវភាពរស់នៅរបស់ដូនតា សម័យអង្គរផងដែរ។
ក្នុងពិធីសម្ពោធដាក់ឲ្យប្រើប្រាស់នៅរសៀលថ្ងៃទី៤ ធ្នូនេះ ឯកអគ្គរដ្ឋទូតនៃសាធារណរដ្ឋប្រជាមានិតប្រជាធិបតេយ្យកូរ៉េ លោក ហុង គី ចូល បាននិយាយថា សារមន្ទីរនេះកសាងឡើងដោយក្រុមហ៊ុន Mansudae Newtech Corporation Ltd. របស់សាធារណរដ្ឋកូរ៉េ នឹងមានការចូលរួមពីអាជ្ញាធរជាតិអប្សរា។ ក្រុមហ៊ុននេះបានចាប់ផ្តើមការសាងសង់ចាប់ពីខែ សីហា ឆ្នាំ២០១១ និងបានបញ្ចប់នៅខែ កញ្ញា ឆ្នាំ២០១៥ ។
មិនមានរបាយការណ៍ពិតប្រាកដ បញ្ជាក់ពីតម្លៃសាងសង់របស់សារមន្ទីររបស់កូរ៉េខាងជើងនេះទេ។ គេរំពឹងថា សារមន្ទីរសព្វទស្សន៍ នឹងអាចទាក់ទាញភ្ញៀវទេសចរបានច្រើន ព្រោះថា ជាសារមន្ទីរថ្មី ប្លែកពីគេផ្សេង៕
© រក្សាសិទ្ធិដោយ thmeythmey.com