ពីនេះ ពីនោះ
តើក្នុងនាមជាអ្នកសិក្សាល្អមួយរូប ត្រូវប្រកាន់ភ្ជាប់គោលការណ៍អ្វីខ្លះ?
× ភ្នំពេញ៖ ការសិក្សារៀនសូត្រ គឺគ្មានព្រំដែនកំណត់ឡើយ។ អ្នកសិក្សារៀនសូត្រ គឺមិនមានឡើយទីបញ្ចប់នៃឱកាសដើម្បីទទួលបានការអប់រំ។ ព្រោះថាការអប់រំ មិនមែនសំដៅតែទៅលើការអប់រំនៅក្នុងសាលាឡើយ គឺកន្លែងណាក៏អ្នកសិក្សាអាចទទួលបានការអប់រំបានដែរ។ ក៏ប៉ុន្តែក្នុងការនាមជាអ្នកសិក្សាមួយរូបក៏ត្រូវមានគោលការណ៍ច្បាស់លាស់ ដើម្បីក្លាយជាអ្នកសិក្សាល្អមួយរូប។ ខាងក្រោមនេះគឺជាគោលការណ៍មួយចំនួន ដែលអ្នកសិក្សាត្រូវគិតគូរក្នុងការប្រតិបត្តិ ដើម្បីរៀបចំខ្លួនឲ្យក្លាយជាអ្នកសិក្សាល្អមួយរូប៖
១/. ត្រូវតាំងខ្លួនឯងជាបុគ្គលដែលចង់ចេះ ចង់ដឹង ចង់យល់ជានិច្ច មិនថាតែជាមេរៀន សូម្បីរឿងរ៉ាវនានា ដែលពាក់ព័ន្ធនឹងការអប់រំ និងចំណេះដឹង។
២/. ត្រូវចាត់ទុកខ្លួនឯងជាអ្នកស្រាវជ្រាវ និងបន្តការសិក្សាស្វែងយល់ជានិច្ច។
៣/. ត្រូវចាត់ទុកថាការបរាជ័យនៅក្នុងការសិក្សា មិនមែនជាបញ្ហា ប៉ុន្តែគឺជាប្រយោជន៍នាំទៅរកការទទួលបានសមិទ្ធផលវិជ្ជមានសម្រាប់ជីវិត។
៤/. ត្រូវចាត់ទុកការលំបាកដែលខ្លួនកំពុងជួបប្រទះក្នុងជីវិតជាអ្នករៀនសូត្រ ជាសេចក្ដីសុខនៅពេលដែលខ្លួនទទួលបានជោគជ័យ។ នេះជាគំនិតដាស់តឿនស្មារតីកុំឲ្យមានការបោះបង់។
៥/. ត្រូវប្រកាន់ខ្ជាប់ជានិច្ចនូវស្វ័យសិក្សា និងជាបុគ្គលដែលមិនចេះអស់ចម្ងល់។
៦/. ស្គាល់ច្បាស់ពីការលំបាកនៅក្នុងការសិក្សារៀនសូត្រ ព្រោះការសិក្សាមិនសប្បាយដូចការមើលការសម្ដែងឡើយ។
៧/. ត្រូវប្រកាន់ជំហរអព្យាក្រឹតភាពក្នុងការវិនិច្ឆ័យមេរៀន ទើបអាចរកឃើញពីសច្ចភាពពិតនៃមេរៀន និងគោលបំណងមេរៀនបាន។
៨/. មិនប្រើប្រាស់ភាពលម្អៀងនៃការគិត ទៅប្រៀបធៀបជាមួយស្ថានភាពសង្គមជាក់ស្ដែង
៩/. ប្រើប្រាស់របៀបគិត ការវិនិច្ឆ័យ ការបកស្រាយ ត្រូវផ្អែកលើកគោលការណ៍ហេតុនិងផល មានភស្ដុតាង មានទឡ្ហីករណ៍ច្បាស់លាស់ មិនមែនប្រើប្រាស់ឈ្មោះជាអ្នកសិក្សាធ្វើការវិភាគខ្វះមូលដ្ឋានពុទ្ធិ។
ជារួមមក គោលការណ៍ទាំងនេះ អាចមិនគ្រប់គ្រាន់ដើម្បីកំណត់ថា នៅពេលប្រើប្រាស់ និងអនុវត្តតាមហើយ ធ្វើឲ្យអ្នកសិក្សានោះក្លាយជាមនុស្សល្អ។ ប៉ុន្តែវាជាកត្តាដែលអាចនាំឲ្យជីវិតអ្នកសិក្សាមានតម្លៃ សមជាអ្នកមានចំណេះដឹងមានការពិចារណា៕
© រក្សាសិទ្ធិដោយ thmeythmey.com