ជាតិ
ឧទ្ធរណ៍គាំទ្រសេចក្តីសម្រេចលើការឃុំមន្ត្រីអាដហុកនិងមន្ត្រីគ.ជ.ប ចំនួន៦ខែទៀត
× ភ្នំពេញ៖ នៅទីបំផុត សាលាឧទ្ធរណ៍ បានគាំទ្រសេចក្តីសម្រេចរបស់សាលាដំបូងរាជធានីភ្នំពេញ ដែលបន្តឃុំខ្លួនមន្ត្រីអាហុក និងមន្ត្រីគ.ជ.ប ចំនួន៦ខែបន្តទៀត។
នៅរសៀលថ្ងៃចន្ទនេះ សមត្ថកិច្ចបាននាំខ្លួនមន្ត្រីអាដហុកទាំង៤រូប និងមន្ត្រីគ.ជ.ប ១រូប ដែលកំពុងជាប់ឃុំក្នុងពន្ធនាគារ ដោយសាររឿងអាស្រូវរបស់កញ្ញា ខុម ចន្ទតារ៉ាទី ហៅស្រីមុំ ទៅកាន់សាលាឧទ្ធរណ៍ ដើម្បីចូលរួមសវនាការ លើបណ្តឹងសុំជំទាស់នឹងសេចក្តីសម្រេចរបស់សាលាដំបូងរាជធានីភ្នំពេញ ដែលបន្តឃុំខ្លួនពួកគេ។ ប៉ុន្តែ ក្រោយបញ្ចប់សវនាការ សាលាឧទ្ធរណ៍ មិនបានជំទាស់នឹងសេចក្តីសម្រេចរបស់សាលាដំបូងជាធានីភ្នំពេញនោះទេ ហើយក៏បន្តឃុំខ្លួនអ្នកទាំង៥ខាងលើ បន្តទៀត។
ការដាក់បណ្តឹងទៅកាន់សាលាឧទ្ធរណ៍នេះ គឺដោយសារតែក្រុមមេធាវី មិនសុខចិត្តចំពោះសាលាដំបូងរាជធានីភ្នំពេញ ដែលសម្រេចឃុំខ្លួនមន្ត្រីអាដហុក និងមន្ត្រីគ.ជ.ប ចំនួន៦ខែបន្ថែមទៀត។ នេះជាការលើកឡើងកន្លងមក របស់លោក សំ សុគង់ មេធាវី១រូប ក្នុងចំណោមមេធាវីទាំង៥រូប ដែលរួមគ្នាការពារក្តីឲ្យមន្ត្រីអាដហុក និងមន្ត្រីគ.ជ.ប។
លោក សំ សុគង់ ធ្លាប់ប្រាប់សារព័ត៌មានថ្មីៗថា តុលាការ អាចឃុំខ្លួនបុគ្គលណាមួយបានតែ៦ខែប៉ុណ្ណោះ ក្នុងដំណាក់កាលនៃការស៊ើបអង្កេតនិងការស៊ើបសួរ។ លោកបន្ថែមថា បុគ្គលនោះ អាចនឹងត្រូវបានឃុំខ្លួនចំនួន៦ខែទៀត ប្រសិនបើតុលាការ យល់ថាការស៊ើបអង្កេតឬការស៊ើបសួរ មិនទាន់គ្រប់គ្រាន់។
យ៉ាងណាក៏ដោយ លោក សំ សុគង់ រួមទាំងមេធាវីផ្សេងទៀត ដែលការពារក្តីឲ្យមន្ត្រីអាដហុកទាំងបួនរូប មិនអាចទទួលយកបានទេចំពោះហេតុផលរបស់សាលាដំបូងរាជធានីភ្នំពេញ ក្នុងការបន្តឃុំខ្លួនកូនក្តីរបស់ពួកគេ។ លោក សំ សុគង់ បញ្ជាក់ថា វា ជាការប៉ះពាល់ដល់សិទ្ធិរបស់មន្ត្រីអាដហុក និងមន្ត្រីគ.ជ.ប ប្រសិនបើតុលាការបន្តឃុំខ្លួនពួកគេមែននោះ។
សូមរម្លឹកថា មន្ត្រីជាន់ខ្ពស់នៃសមាគមអាដហុកបួនរូប គឺលោក នី សុខា, លោក ណៃ វង់ដា, លោក យី សុខសាន្ត និងលោកស្រី លឹម មុន្នី រួមទាំងលោក នី ចរិយា អគ្គលេខាធិការរងរបស់គ.ជ.ប ត្រូវបានសាលាដំបូងរាជធានីភ្នំពេញ បញ្ជូនទៅឃុំខ្លួនបណ្តោះអាសន្ន នៅថ្ងៃទី២ ខែឧសភា ឆ្នាំ២០១៦។ រហូតមកដល់ពេលនេះ ពួកគេទាំង៥រូប ជាប់ឃុំជិត៦ខែហើយ។
បើតាមការចោទប្រកាន់ពីសំណាក់តុលាការ អ្នកទាំងនោះ សុទ្ធតែជាប់ពាក់ព័ន្ធនឹងរឿងរ៉ាវរបស់កញ្ញា ខុម ចាន់តារ៉ាទី ហៅស្រីមុំ ជាមួយនឹងឯកឧត្តម កឹម សុខា អនុប្រធានគណបក្សសង្គ្រោះជាតិ។ ក្រោយមក តុលាការ បានចោទមន្ត្រីអាដហុកពីបទ «សូកប៉ាន់សាក្សី» ហើយមន្ត្រីគ.ជ.ប រងបទចោទ «សមគំនិតក្នុងអំពើសូកបាន់សាក្សី»៕
Tag:
តុលាការ
អាដហុក
គជប
© រក្សាសិទ្ធិដោយ thmeythmey.com