ជាតិ
បទវិភាគ
×![]()
យុវជនជំនាន់ក្រោយ ត្រូវនាំគ្នាលើកស្ទួយ អភិរក្សខ្លែងខ្មែរ ឲ្យទាន់ពេល។
ពីមួយឆ្នាំទៅមួយឆ្នាំ ចំនួនអ្នកចេះធ្វើខ្លែងខ្មែរ ជាពិសេសគឺខ្លែងឯក កាន់តែតិចទៅៗ ហើយនៅខេត្តខ្លះស្ទើរតែរកអ្នកចេះធ្វើខ្លែងឯកមិនបាន។ ចំនួនក្មេង យុវជននៅជនបទ ដែលលេងខ្លែង ក៏ថយចុះដែរ ដោយសារចលនាចំណាកស្រុកច្រើន និងបច្ចេកវិទ្យារីកចម្រើន។ ទាំងអស់នេះ ដែលធ្វើឲ្យខ្លែងខ្មែរប្រឈមមុខនឹងការបាត់បង់នាពេលខាងមុខ ប្រសិនបើគ្មានការអភិរក្ស និងលើកកម្ពស់ពីក្រសួងវប្បធម៌ និងវិចិត្រសិល្បៈ ព្រមទាំងយុវជនជំនាន់ក្រោយ។
យ៉ាងណា រាល់ឆ្នាំក្រសួងវប្បធម៌ ក៏បានរៀបចំមហោស្រពខ្លែងខ្មែររាល់ឆ្នាំ ក្នុងគោលដៅដើម្បីអភិរក្សខ្លែងខ្លែងដែរ។ ក៏ប៉ុន្តែ ការរៀបចំមហោស្រពខ្លែងរបស់ក្រសួងវប្បធម៌ ហាក់មិនសូវទទួលបានការចាប់អារម្មណ៍ពីប្រជាជនខ្មែរ ជាពិសេសយុវជននោះទេ។ ជាក់ស្តែងមហោស្រពខ្លែងខ្មែរលើកទី ២០ ដែលរៀបចំធ្វើ កាលពីពាក់កណ្តាលខែធ្នូ កន្លងទៅ មានខ្លែងតែ ១៩ ខែប៉ុណ្ណោះបានចូលរួម និងអ្នកចូលរួមទស្សនាមហោស្រពនេះមានចំនួនតិច ព្រមទាំងប្រជាជនភាគច្រើន ដោយហោចទៅសូម្បីតែអ្នកកាសែតខ្លះក៏មិនដឹងពីព្រឹត្តិការណ៍នេះដែរ។
តាមពិតទៅ មហោស្រពបង្ហើរខ្លែងខ្មែរ ប្រហែលមិនពិបាកទាក់ទាញយុវជនជំនាន់ក្រោយឲ្យចូលរូមសកម្មក្នុងការជួយអភិរក្ស ផ្សព្វផ្សាយ គាំទ្រ ខ្លែងឯកខ្មែរនោះទេ ប្រសិនបើក្រសួងវប្បធម៌ជូនដំណឹង ឬផ្សព្វផ្សាយតាមបណ្តាញសារព័ត៌មានឲ្យបានច្រើន។ អ្នករៀបចំត្រូវមានទំនាក់ទំនងល្អ ឬសហការយ៉ាងជិតស្និទ្ធជាមួយប្រព័ន្ធផ្សព្វផ្សាយ ដើម្បីឲ្យយុវជនបានដឹងពីមហោស្រពនេះ។
ម្យ៉ាងវិញទៀត ប្រសិនបើខ្វះថវិការៀបចំកម្មវិធី ក្រសួងអាចសហការជាមួយក្រុមហ៊ុនឯកជន ដើម្បីឲ្យជួយគាំទ្រផ្នែកហិរញ្ញវត្ថុ។ ថវិកា បានមកពីក្រុមហ៊ុនទាំងនោះ អាចផ្តល់ជារង្វាន់លើកទឹកចិត្តឲ្យបានច្រើន ដល់បេក្ខជនមកពីបណ្តាខេត្តដែលចូលរួមប្រឡង។ ព្រោះកន្លងមកបេក្ខជនមកពីខេត្តខ្លះ បានត្អូញត្អែរពីប្រាក់ឧបត្ថម្ភតិច ដែលមិនគ្រប់គ្រាន់នឹងការចំណាយរបស់ខ្លួននៅភ្នំពេញឡើយ៕
Tag:
ខ្លែង
© រក្សាសិទ្ធិដោយ thmeythmey.com
