ជាតិ
អាមេរិក បានចំណាយជាង១០០លានដុល្លារ ដោះមីន និងយុទ្ធភណ្ឌមិនទាន់ផ្ទុះនៅកម្ពុជា
×
ក្នុងរយៈពេល២០ឆ្នាំចុងក្រោយនេះរដ្ឋាភិបាលសហរដ្ឋអាមេរិកបានចំណាយប្រាក់ជាង ១១៤ លានដុល្លារសម្រាប់គម្រោងមនុស្សធម៌នៅកម្ពុជា ដើម្បីដោះមីន និងយុទ្ធភណ្ឌផ្ទុះដទៃទៀត ដែលសល់ពីជម្លោះផ្ទៃក្នុង និងជម្លោះក្នុងតំបន់។
លោកឯកអគ្គរដ្ឋទូតសហរដ្ឋអាមេរិកប្រចាំកម្ពុជា William Heidt បានទៅមើលប្រតិបត្តិការតាមមូលដ្ឋានរបស់អង្គការ Norwegian People’s Aid (NPA) ក្នុងការលុបបំបាត់យុទ្ធភណ្ឌមិនទាន់ផ្ទុះ និងគ្រាប់មីន ក្នុងខេត្តរតនគិរី នៅថ្ងៃព្រហស្បតិ៍។ NPA ដែលជាអង្គការដៃគូមួយរបស់សហរដ្ឋអាមេរិក ដោះស្រាយបញ្ហាមីននៅកម្ពុជា។
លោកឯកអគ្គរដ្ឋទូត បានមានប្រសាសន៍ថា៖«សហរដ្ឋអាមេរិក បានធ្វើជាដៃគូយូរមកហើយ ជាមួយរដ្ឋាភិបាលកម្ពុជា សហគមន៍ អង្គការមិនមែនរដ្ឋាភិបាល ដើម្បីដោះស្រាយបញ្ហាគ្រាប់មីន និងយុទ្ធភណ្ឌមិនទាន់ផ្ទុះ។» លោក Heidt បន្តថា៖«អ្វីដែលខ្ញុំឃើញនៅថ្ងៃនេះ ក្នុងខេត្តរតនគីរី បង្ហាញឲ្យឃើញពីការយកចិត្តទុកដាក់របស់អ្នកជំនាញជាច្រើន ដែលហ៊ានប្រថុយជីវិតរបស់គេ ដើម្បីធ្វើឲ្យកម្ពុជាមានសុវត្ថិភាព ក្នុងការរស់នៅ។»
អង្គការ NPA ស្ថិតក្នុងចំណោមអង្គការមិនមែនរដ្ឋាភិបាលជាច្រើន ដែលសហរដ្ឋអាមេរិកយកធ្វើជាដៃគូ ដើម្បីលុបបំបាត់សំណល់ជាតិផ្ទុះពីសង្គ្រាមនៅកម្ពុជា។ ដៃគូដទៃទៀតដែលសិក្សា អង្កេតទ្រង់ទ្រាយធំ និងប្រតិបត្តិការដោះមីន រួមមានអង្គការ HALO Trust, Mines Advisory Group (MAG), Cambodia Mine Action Center (CMAC) និងអង្គការ Cambodian Self Help Demining ។ ដោយមានការជ្រោមជ្រែងពីរដ្ឋាភិបាលសហរដ្ឋអាមេរិក មូលនិធិ Golden West Humanitarian Foundation បានបង្កើតក្រុមដោះយុទ្ធភណ្ឌផ្ទុះនៅក្នុងទឹក លើកដំបូងនៅកម្ពុជា ហើយគម្រោងស្មារតីនៃកីឡាបាល់ទាត់ ក៏បានផ្តល់ការអប់រំដល់កុមារស្តីពីគ្រោះថ្នាក់ដែលបណ្តាលមកពីគ្រាប់មីន និងយុទ្ធភណ្ឌផ្ទុះដទៃទៀត ដែលសល់ពីសង្គ្រាម៕
© រក្សាសិទ្ធិដោយ thmeythmey.com