ជាតិ
សង្គមជាតិ
×![]()
សៀមរាប៖ សារមន្ទីរព្រះសីហនុ-អង្គរ កំពុងដំណើរការជួសជុលដោយក្រុមហ៊ុនសាតូ ក្រោមការត្រូតពិនិត្យដោយផ្ទាល់ពីសំណាក់អាជ្ញាធរជាតិអប្សរា។ ក្រោយពីបើកការដ្ឋានជួសជុលតាំងពីដើមខែវិច្ឆិកា ឆ្នាំ២០១៦ ការជួសជុលគ្រោងនឹងរួចរាល់នៅចុងខែមីនាខាងមុខនេះ។
សារមន្ទីរព្រះសីហនុ-អង្គរ កសាងឡើងនៅឆ្នាំ២០០៨។ សារមន្ទីរនេះត្រូវបានកសាងឡើងក្រោមជំនួយឧបត្ថម្ភដោយមូលនិធិ១% របស់ក្រុមហ៊ុន អ៊ីអុង (AEON) ប្រទេសជប៉ុន។ ដោយសារអាយុកាល ធ្វើឲ្យសារមន្ទីរនេះរងការខូចខាតជាច្រើនកន្លែង ក្នុងនោះរួមមានស្នាមប្រេះនៅតាមដំបូល និងជញ្ជាំង ក៏ដូចជាលិចដំបូល។ល។
ដោយមើលឃើញពីស្ថានភាពនេះហើយ ទើបក្រុមហ៊ុនអ៊ីអុង បានផ្តល់ហិរញ្ញវត្ថុជាថ្មីដើម្បីជួសជុល និងកែលម្អឡើងវិញ។ គម្រោងជួសជុលនេះ ជាកិច្ចសហប្រតិបត្តិការរវាងស្ថាប័ន៤ ដែលរួមមាន ក្រុមហ៊ុនអ៊ីអុង អាជ្ញាធរជាតិអប្សរា ក្រុមហ៊ុនឧស្សាហកម្មសាតូ (កម្ពុជា) និងមជ្ឈមណ្ឌលអាស៊ីសិក្សាស្រាវជ្រាវ និងបណ្តុះបណ្តាលធនធានមនុស្សនៃសាកលវិទ្យាល័យសូហ្វ៊ីយ៉ា។
ក្រោយដំណើរការចាប់តាំងពីដើមខែវិច្ឆិកា ឆ្នាំ២០១៦មក ការដ្ឋានជួសជុលសារមន្ទីរ សម្រេចបានប្រមាណ៦០%ហើយ។ នេះបើតាមការបញ្ជាក់របស់លោក យិត ចាន់ដារដ្ឋ។ លោក យិត ចាន់ដារដ្ឋ ប្រធាននាយកដ្ឋានស្តីទី នៃនាយកដ្ឋានអភិវឌ្ឍន៍វប្បធម៌ សារមន្ទីរ និងបទដ្ឋានបេតិកភណ្ឌរបស់អាជ្ញាធរជាតិអប្សរាបានដឹងទៀតថា តាមគម្រោងក្រុមហ៊ុនសាតូ គ្រោងនឹងបញ្ចប់ការជួសជុលនៅចុងខែមីនាខាងមុខនេះ។
តាមការពន្យល់របស់លោក ចាន់ដារដ្ឋ ការងារចំបងសម្រាប់ជួសជុលសារមន្ទីរព្រះនរោត្តមសីហនុ-អង្គរ គឺនៅផ្នែកដំបូល។ ដំបូលសារមន្ទីររងការខូចខាតស្ទើរគ្រប់កន្លែង ហើយដំណោះស្រាយ គឺត្រូវរុះរើដំបូលចាស់ដែលក្រាលបាស្ទិក ជំនួសដោយការក្រាលសន្លឹកស័ង្កសី មុននឹងប្រកក្បឿងពីលើ។ បច្ចេកទេសនេះ តាមការបញ្ជាក់របស់អ្នកជំនាញ គឺធានាបានយូរអង្វែង។ លោក ចាន់ដារដ្ឋបញ្ជាក់ថា ការពុកផុយនៃដំបូលនេះ បានធ្វើឲ្យអាគារនៃសារមន្ទីរទាំងមូល មានស្នាមប្រេះស្ទើរគ្រប់កន្លែង ដោយសារការជ្រាបទឹក។
សារមន្ទីរព្រះនរោត្តមសីហនុ-អង្គរ មានទីតាំងនៅជាប់សាលាខេត្តសៀមរាប។សារមន្ទីរព្រះនរោត្តមសីហនុ-អង្គរ ត្រូវបានកសាងឡើងនៅឆ្នាំ២០០៨ដោយមូលនិធិនៃក្លឹប១% របស់ក្រុមហ៊ុនអ៊ីអុង។ មានពុទ្ធបដិមាចំនួន២៧៤អង្គ កំពុងតម្កល់ទុកក្នុងសារមន្ទីរមួយនេះដែលវាបានមកពីការធ្វើកំណាយសិក្សាស្រាវជ្រាវនៅប្រាសាទបន្ទាយក្តីដោយសាកលវិទ្យាល័យសូហ្វីយ៉ារួមនិងក្រុមបុរាណវិទូខ្មែរក្នុងឆ្នាំ២០០១៕
Tag:
សារមន្ទីរ
អង្គរ
© រក្សាសិទ្ធិដោយ thmeythmey.com
