ជាតិ
អភិបាលខេត្តកណ្ដាល ច្រានចោលព័ត៌មានប្ដូរទីតាំងទីរួមខេត្តកណ្ដាល ទៅវិហារសួរ លោក ម៉ៅ ភិរុណ អភិបាលកណ្តាល។ រូបពីហ្វេសប៊ុក លោក ម៉ៅ ភិរុណ
×
កណ្ដាល៖ លោក ម៉ៅ ភិរុណ អភិបាលនៃគណៈអភិបាលខេត្តកណ្ដាល បានច្រានចោលរាល់ព័ត៌មានទាំងឡាយណាដែលថា អាជ្ញាធរមានគម្រោងប្ដូរទីតាំងរដ្ឋបាល ឬទីរួមខេត្តកណ្ដាល ដែលបច្ចុប្បន្ននៅទីក្រុងតាខ្មៅ ទៅតំបន់វិហារសួរ ស្ថិតនៅក្នុងស្រុកខ្សាច់កណ្តាល។
លោក ម៉ៅ ភិរុណ បានថ្លែងប្រាប់សារព័ត៌មានថ្មីៗ ថា អាជ្ញាធរគ្មានផែនការប្ដូរទីតាំងទីរួមខេត្តកណ្ដាលទៅតំបន់វិហារសួរនោះទេ។ លោក បញ្ជាក់ខ្លីប្រាប់ថ្មីៗ នៅក្រោយពិធីបើកការដ្ឋានសាងសង់ផ្ទះតម្លៃសមរម្យរបស់ក្រុមហ៊ុន Worldbridge Land នៅថ្ងៃទី៧មករា មុននឹងឡើងរថយន្តយ៉ាងដូច្នេះថា៖«អត់មានទេ គ្មានគម្រោងឯណាប្ដូរទេ។ គេនិយាយគ្រាន់តែដើម្បីខ្ទរខ្ទារឲ្យដីគេលក់បានថ្លៃ។ (ខ្ញុំ) មិនទាន់ហៅមករករឿងផង»។
សូមស្តាប់ប្រសាសន៍លោក ម៉ៅ ភិរុណ បន្ថែមខាងក្រោម៖
កន្លងមកនេះ មានពាក្យចចាមអារ៉ាម និងសារព័ត៌មានមួយចំនួន បានចុះផ្សាយថា រដ្ឋបាលខេត្តកណ្តាលសព្វថ្ងៃនៅក្រុងតាខ្មៅ គ្រោងដូរទីតាំងទៅដាក់នៅតំបន់វិហារសួរ ក្នុងស្រុកខ្សាច់កណ្តាល ខេត្តកណ្តាលវិញ ពីព្រោះរដ្ឋាភិបាលគ្រោងពង្រីកដែនដីរាជធានីភ្នំពេញ ដោយកាត់ក្រុងតាខ្មៅចូលរាជធានី។
សូមបញ្ជាក់ថា ក្រុងតាខ្មៅ ដែលជាទីរួមខេត្តកណ្ដាល មានចម្ងាយ ១១ គីឡូម៉ែត្រពីចំណុចកណ្ដាលរាជធានីភ្នំពេញ ។ ហើយខេត្តកណ្ដាលមានស្រុកទាំងអស់ ចំនួន ១១ ៕
Tag:
ម៉ៅ ភិរុណ
ក្រុងតាខ្មៅ
© រក្សាសិទ្ធិដោយ thmeythmey.com