ព្រះសីហនុ៖ ភ្ញៀវទេសចរជាតិ និងអន្តរជាតិភាគច្រើនតែងលម្ហែកម្សាន្តលើឆ្នេរអូរឈើទាល ឆ្នេរអូត្រេះ និងឆ្នេរឯករាជ្យ ដែលមានទេសចរអ៊ូអរនៅភាគខាងត្បូងខេត្តព្រះសីហនុ តែពួកគេមើលរំលងឆ្នេរព្រែកត្រែងដែលមានបរិយាកាសស្ងប់ស្ងាត់ និងឆ្នេរខ្សាច់សក្បុសភ្លឺផ្លែក។
ឆ្នេរព្រែកត្រែងស្ថិតនៅស្របបណ្តោយមាត់សមុទ្រខៀវស្រងាត់ ភាគខាងជើងខេត្តស្ថិតក្នុងតំបន់រដ្ឋបាល និងសេដ្ឋកិច្ចពិសេសពហុបំណងរបស់កម្ពុជា។ វាមានចម្ងាយពីកំពង់ផែអន្តរជាតិខេត្តព្រះសីហនុប្រមាណ ៣គីឡូម៉ែត្រ នៅប៉ែកខាងជើង។ ឆ្នេរខ្សាច់ទឹករាក់ដ៏ស្រស់ស្អាតដែលទេសចរមើលរំលងមានរាងជាចំណិតលោកខែ និងលាយឡំផ្ទាំងថ្មដោយកន្លែងៗ។
ដ្បិតឆ្នេរពុំទាន់មានទេសចរលម្ហែអារម្មណ៍ អាជីវកម្មផ្ទះសំណាក់ សណ្ឋាគារ និងកន្លែងលក់ម្ហូបអាហារពុំទាន់មានច្រើនដែរ។ អ្នកស្រី ចាន់ ស្រីណាត អាជីវករលក់ម្ហូបអាហារ និងភេសជ្ជៈតាមរទេះមានផ្ទុរតាមឆ្នេរបានប្រាប់សារព័ត៌មានថ្មីៗថា អ្នកស្រីអាចចំណូលបានពី ៥ ទៅ ១០ម៉ឺនប៉ុណ្ណោះ ក្នុងថ្ងៃបុណ្យទានជាតិសំខាន់ៗ ពីព្រោះភ្ញៀវទេសចរតិចមកលម្អែកម្សាន្ត។
ស្ត្រីវ័យជាង ៣០ឆ្នាំលក់ដូរម្ហូបអាហារតាមឆ្នេរព្រែកត្រែងតែពេលបុណ្យទានជាតិម្តងៗប៉ុណ្ណោះ។ «ទេសចរគេពុំសូវស្គាល់ទីនេះ ដូចនៅឆ្នេរអូរឈើទាល អូរត្រេះទេ ព្រោះវាមិនទាន់មានការអភិវឌ្ឍហើយនៅឆ្ងាយពីក្រុង»។ ក្រៅពីអ្នកស្រី ណាត អាជីវករខ្លះអង្រឹងសំពត់ ខ្លះបានសង់តូបសម្រាប់ជួលអង្គុយ ឬលក់ម្ហូបអាហារប្រមាណ ៥កន្លែងដែរ តាមបណ្តោយផ្លូវទំនប់រលកម្ខាងឆ្នេរព្រែកត្រែងដែលល្អបំផុតសម្រាប់លម្ហែកម្សាន្តគ្រួសារ និងមិត្តភក្តិ។
ឆ្នេរព្រែកត្រែងមានប្រវែងប្រមាណ ២គីឡូម៉ែត្រ ហើយវាមិនត្រឹមតែមានខ្សាច់សក្បុសជាងឆ្នេរអូរឈើទាល អូរត្រេះ ឆ្នេរសុខា និងឯករាជ្យប៉ុណ្ណោះទេ វាថែមទាំងមានម្លប់ដើមស្រល់ក្រហម អមដោយសួនច្បារដែលគេទើបរៀបចំថ្មីយ៉ាងស្រស់ស្អាតមួយ។
កម្ពុជាដែលមានឆ្នេរសមុទ្រក្នុងខេត្តទាំង ៤ជាង ៤០០គីឡូម៉ែត្របានក្លាយជាសមាជិកក្លឹបឆ្នេរសមុទ្រដែលស្អាតជាងគេបំផុតលើសាកលលោកកាលពីឆ្នាំ ២០១១ ចំណោមសមាជិកមកពី ២៤ប្រទេសដែលមានឆ្នេរស្អាតសរុប ៤២ឆ្នេរ។ នោះក៏ព្រោះ ឆ្នេរសមុទ្រដែលស្ថិតក្នុង ទិសនិរតីកម្ពុជា មានឆ្នេរខ្សាច់សក្បុស សមុទ្រខៀវស្រងាត់ និងរុក្ខជាតិបៃតង។
លោក ថោង ខុន រដ្ឋមន្ត្រីក្រសួងទេសចរបានថ្លែងក្នុងពិធីបើកបុណ្យសមុទ្រថ្ងៃទី២៤ ធ្នូនេះថា ខេត្តព្រះសីហនុទទួលបានភ្ញៀវទេសចរអន្តរជាតិ ប្រមាណ ៤០ម៉ឺននាក់ និងភ្ញៀវទេសចរជាតិប្រមាណ ១,១លាននាក់ ក្នុងឆ្នាំ ២០១៦ កន្លងទៅ។ លោកបានបន្តថ្លែងតាមការព្យាករណ៍ថា តំបន់ឆ្នេរសមុទ្រកម្ពុជាអាចនឹងទទួលបានភ្ញៀវទេសចរអន្តរជាតិប្រមាណ ២លាននាក់ និងភ្ញៀវទេសចរជាតិប្រមាណ ៤លាននាក់នៅឆ្នាំ ២០២០ ។
គួរបញ្ជាក់ផងដែរ កម្ពុជាបានក្លាយជាអនុប្រធានក្លឹបទទួលបន្ទុកតំបន់អាស៊ី-ប៉ាស៊ីហ្វិក ២អាណត្តិជាប់គ្នារហូតដល់ឆ្នាំ ២០១៩ ផងដែរ ក្រោយមហាសន្និបាតក្លឹបបោះឆ្នោតជ្រើសរើសកន្លងមក៕