ជាតិ
សម្តេច ប៊ុន រ៉ានី ហ៊ុន សែន ទទួលបណ្ឌិតកិត្តិយសអក្សរសាស្ត្រពីសាកលវិទ្យាល័យចិន រូបថតហ្វេសប៊ុកសម្តេច ហ៊ុន សែន
×
ភ្នំពេញ៖ សម្តេច ប៊ុន រ៉ានី ហ៊ុន សែន ប្រធានកាកបាទក្រហមកម្ពុជាបានទទួលសញ្ញាបត្រថ្នាក់បណ្ឌិតកិត្តិយស ផ្នែកអក្សរសាស្ត្រ ពីសាកលវិទ្យាល័យក្វាំងស៊ីនៃសាធារណរដ្ឋប្រជាមានិតចិន នៅថ្ងៃទី៩ ខែមករានេះ។
លោក XIE Shanggo ប្រធានសាកលវិទ្យាល័យក្វាងស៊ីបានពន្យល់មូលហេតុដែល គណៈកម្មាធិការវាយតម្លៃ សញ្ញាប័ត្ររដ្ឋចិនសម្រេចប្រគល់សញ្ញាបត្របណ្ឌិតកិត្តិយសដល់សម្តេច ប៊ុន រ៉ានី ហ៊ុន សែន ពីព្រោះពួកគេមើលឃើញពីស្នាដៃការងារដែលសម្តេចបានចូលរួមជំរុញការអប់រំការងារសប្បុរសធម៌នៅកម្ពុជាពិសេសគឺជួយពង្រឹងមិត្តភាពកម្ពុជា-ចិន។
ថ្លែងតាមរយៈអ្នកបកប្រែភាសាខ្មែរនៅក្នុងពីធីដែលត្រូវបានធ្វើឡើងនៅសាលសន្និសីទចតុមុខលោក XIEនិយាយថា៖«គណៈកម្មការសិក្សានៃក្រុមប្រឹក្សាអប់រំរដ្ឋចិនបានពិនិត្យឃើញសកម្មភាពដែលសម្តេចប៊ុនរ៉ានីហ៊ុនសែនជួយជំរុញការអប់រំនិងការជួយសង្គ្រោះប្រជាជន។ នេះមិនត្រឹមតែជាបង្ហាញពីការដឹកនាំទេថែម ទាំងសំដែងសេចក្តីគោរព រាប់អានដែលបានពង្រឹងមិត្តភាពកម្ពុជាចិនជាបន្តបន្ទាប់ផងដែរ»។
សញ្ញាប័ត្របណ្ឌិតកិត្តិយសផ្នែកអក្សរសាស្ត្រនេះគឺជាលើកទីពីរហើយដែលសាកលវិទ្យាល័យចិនមួយនេះបានប្រគល់ជូនដល់គ្រួសាររបស់សម្តេចនាយករដ្ឋមន្ត្រី ហ៊ុន សែន។ សម្តេចហ៊ុនសែនដែលជាស្វាមីសម្តេច ប៊ុន រ៉ានី ហ៊ុន សែន ក៏ធ្លាប់ទទួលបានសញ្ញាប័ត្របណ្ឌិតកិត្តិយសផ្នែកអក្សរសាស្ត្រពីសាកលវិទ្យាល័យ ក្វាងស៊ី កាលពីខែតុលា ឆ្នាំ២០១៥ ក្នុងទីក្រុងប៉េកាំង។
ថ្លែងក្នុងពិធីទទួលសញ្ញាប័ត្រ សម្តេច ប៊ុន រ៉ានី ហ៊ុន សែន និយាយថា៖ «នេះគឺជាការលើកទឹកចិត្តដល់នាងខ្ញុំពីការប្រតិបត្តិឲ្យបង្កើតឱកាសគំរូដល់ស្ត្រី និងយុវជន ឲ្យមានភាពក្លាហានស្វែងយល់ក្នុងបុព្វហេតុរកភាពអភិវឌ្ឍន៍រីកចម្រើនរុងរឿង»។
ក្រៅសញ្ញាបត្រកិត្តិយសចិនពេលនេះប្រធានកាកបាទក្រហមកម្ពុជាដែលមានងារជាកិត្តិព្រឹទ្ធបណ្ឌិតធ្លាប់ទទួលសញ្ញាបត្របណ្ឌិតកិត្តិយសពីប្រទេសដទៃទៀតផង។ តាមឯកសារជីវប្រវត្តិសម្តេច ប៊ុន រ៉ានី ហ៊ុន សែន នៃរាជបណ្ឌិត្យសភាកម្ពុជា ភរិយានាយរដ្ឋមន្ត្រីដែលព្រះមហាក្សត្របានផ្តល់ងារជាកិត្តិព្រឹទ្ធបណ្ឌិត កាលពីឆ្នាំ២០១១ និងងារជាសម្តេច កាលពីឆ្នាំ២០១៣ រូបនេះ បានទទួលសញ្ញាបត្របណ្ឌិតកិត្តិយសផ្នែកអប់រំ ពីសាកលវិទ្យាល័យស៊ីឡាស នៃប្រទេសកូរ៉េខាងត្បូង។
ក្នុងឆ្នាំ ២០០៩ សញ្ញាបត្របណ្ឌិតកិត្តិយសផ្នែកអក្សរសាស្ត្រ ពីសាកលវិទ្យាល័យ ជេជូរ ប្រទេសកូរ៉េខាងត្បូង ចំពោះការងារជួយជាតិមាតុភូមិក្នុងការស្វែងរកសន្តិភាព និងក្តីស្រឡាញ់អាណិតអាសូរដល់មនុស្សជាតិ។
ក្នុងឆ្នាំ២០០៩ សញ្ញាបត្របណ្ឌិតកិត្តិយសផ្នែកសេដ្ឋកិច្ច ពីសាកលវិទ្យាល័យស្ត្រី សេអ៊ូល ដែលទទួលស្គាល់ពីស្នាដៃនៃការចូលរួមការងារកាកបាទក្រហមកម្ពុជា និងកិច្ចខិតខំប្រឹងប្រែងរបស់សម្តេចលើកិច្ចការ និងសិទ្ធិស្ត្រី។
ក្នុងឆ្នាំ២០០៨ សញ្ញាបត្របណ្ឌិតកិត្តិយសផ្នែកមនុស្សធម៌ ពីសាកលវិទ្យាល័យកម្ពុជា ទទួលស្គាល់ពីការប្តេជ្ញាចិត្ត និងភក្តីភាព ចំពោះសកម្មភាពមនុស្សធម៌។ ក្នុងឆ្នាំ ២០០៤ មេដៃកិត្តិយសកាកបាទក្រហមថេហ្គូន (Red Cross Grand Order of Taegung )ពីកាកបាទក្រហមជាតិ នៃប្រទេសកូរ៉េខាងត្បូង និងគ្រឿងឥស្សរិយយសការងារជាតិ និងអន្តរជាតិដទៃទៀត។
ភរិយានាយករដ្ឋមន្ត្រីដែលធ្លាប់ទទួលពានរង្វាន់វេទិកាភាពជាអ្នកដឹកនាំតំបន់អាស៊ីប៉ាស៊ីហ្វិកផង បានក្លាយជាប្រធានកាកបាទក្រហមកម្ពុជាតាមរយៈបោះឆ្នោតជ្រើសរើសរបស់មហាសន្និបាតកាកបាទក្រហមកម្ពុជា អាណត្តិទី២ តាំងពីឆ្នាំ ១៩៩៨មកម្ល៉េះ៕
Tag:
ប៊ុនរ៉ានី
បណ្ឌិតកិត្តិយស
ក្វាងស៊ី
© រក្សាសិទ្ធិដោយ thmeythmey.com