ពលករខ្មែរ៣នាក់បានស្លាប់ និងរបួសជាង២០នាក់ ក្នុងគ្រោះថ្នាក់ចរាចរណ៍នៅថៃ

ជាតិ

ពលករខ្មែរ៣នាក់បានស្លាប់ និងរបួសជាង២០នាក់ ក្នុងគ្រោះថ្នាក់ចរាចរណ៍នៅថៃ

09, Jan 2017 , 4:56 pm

រូបភាព

ដោយ: ធឿន បញ្ញាឬទិ្ធ

ភ្នំពេញ៖ ក្រសួងការបរទេស និងសហប្រតិបត្តិការអន្តរជាតិ បានឲ្យដឹងថា ពលករខ្មែរចំនួន៣នាក់បានស្លាប់ និងរងរបួស៨នាក់ ក្នុងឧបទ្ទវហេតុគ្រោះថ្នាក់ចរាចរណ៍រវាងរថយន្តដឹកពលរដ្ឋខ្មែរបុកគ្នាជាមួយរថយន្តកង់១០ នៅខេត្តច័ន្ទបុរី ប្រទេសថៃ កាលពីថ្ងៃទី៣០ ធ្នូកន្លងមក។ ក្នុងហេតុការណ៍គ្រោះថ្នាក់ចរាចរណ៍នោះ មានពលរដ្ឋខ្មែរចំនួន២៩នាក់ ។

សេចក្ដីប្រកាសព័ត៌មានក្រសួងការបរទេស ដែលទើបតែចេញផ្សាយនៅថ្ងៃទី៩ មករានេះ បានបញ្ជាក់ថា សពជនរងគ្រោះ តេង ឆាលី ភេទប្រុស អាយុ ២៧ឆ្នាំ ត្រូវបានបញ្ជូនមក ស្រុកកំណើតនោះខេត្តសៀមរាបហើយ។ ចំណែកសពជនរងគ្រោះ មុច សាម៉ុន ឆ្នាំ និងសព វ៉ាន់ ចាន់រិទ្ធ ត្រូវបានក្រុមគ្រួសារកំពុងទាក់ទងនិងរៀបចំឯកសារយកសពមកកម្ពុជាវិញ។

ចំពោះករណីគ្រោះថ្នាក់ចរាចរណ៍ខាងលើនេះ ស្ថានអគ្គកុងស៊ុលខ្មែរប្រចាំប្រទេសថៃបានចុះអន្តរាគមន៍ ហើយភាគីថៅកែថៃយល់ព្រមជួយឧបត្ថម្ភប្រាក់ដល់គ្រួសារសព ក្នុងមួយគ្រួសារចំនួន ២២.០០០បាត (៦១៥ដុល្លារ) និងម្ចាស់រថយន្តកង់១០ ឧបត្ថម្ភចំនួន ៣០.០០០បាត (ជាង៨០០ដុល្លារ) សរុប ៥២.០០០បាត (១៤៥៥ដុល្លារ)។

ក្រៅពីនេះពលកររបួសធ្ងន់ចំនួន៤នាក់ កំពុងសង្គ្រោះក្នុងបន្ទប់សង្គ្រោះបន្ទាន់ មានឈ្មោះ នៅ សុភ័ក្រ (ភ្នំពេញ) ឈ្មោះ វុត្ថា (ព្រះវិហារ) ឈ្មោះ នុល ពីង (ស្វាយរៀង) និង សិ ថេ (ខេត្តកំពត) ។ ចំណែកពលកររបួសមធ្យម៤នាក់ រួមមានឈ្មោះ រស់ ចាន់ (ព្រៃវែង) របួសបាក់ជើង ,ឈ្មោះ ឌុល ឆាយ (ព្រៃវែង) របួសបែកក្បាល និងបាក់ជើង, កុមារី ឌុល ស្រីការ របួសបាក់ជើង និងឈ្មោះ ចាន់នី (កំពត)កំពុងសំរាកព្យាបាលនៅមន្ទីពេទ្យ។

ចំណែកពលករដ៏ទៃទៀត ដែលរងរបួសស្រាល បានចេញពីមន្ទីរពេទ្យ និងត្រូវបានថៅកែថៃទទួលទៅធ្វើការវិញហើយ។ សូមបញ្ជាក់ថា ពលករខ្មែរទាំង២៩នាក់នេះ ជាកម្មករស៊ីឈ្នួលបេះផ្លែមៀនក្នុងប្រទេសថៃ។ ប៉ុន្តែពួកគាត់ពុំមាន Work permit ដូច្នេះពុំមានសិទ្ធទទួល បានធានារ៉ាប់រងការងារណាមួយឡើយ។

តែយ៉ាងណាស្ថានអគ្គកុងស៊ុលកម្ពុជាក៏បានសហការជាមួយថៅកែថៃ រកមេធាវីការពារក្តី នៅតុលាការនាពេលខាងមុខ ដើម្បីទាមទារសំណងជំងឺចិត្តជូនពលករបាត់បង់ជីវិត និងរងរបួសផងដែរ។ នេះជាការបញ្ជាក់របស់ក្រសួងការបរទេស ៕