អ្នកបឹងកក់ ស្វែងរកអន្តរាគមន៍ ដោះលែងមន្ត្រីសិទ្ធិមនុស្ស និងសកម្មជនដីធ្លី

ជាតិ

អ្នកបឹងកក់ ស្វែងរកអន្តរាគមន៍ ដោះលែងមន្ត្រីសិទ្ធិមនុស្ស និងសកម្មជនដីធ្លី

10, Jan 2017 , 1:41 pm

រូបភាព

ដោយ: ថ្មីៗ

ភ្នំពេញ៖ សកម្មជនបឹងកក់ បានដង្ហែញត្តិទៅដាក់នៅក្រសួងមហាផ្ទៃ និងរដ្ឋសភា នៅព្រឹកថ្ងៃទី១០ មករានេះ ដើម្បីសុំអន្តរាគមន៍ ក្នុងការដោះលែងមន្ត្រីអាដហុក និងមន្ត្រីគ.ជ.ប រួមទាំងលោកស្រី ទេព វន្នី ដែលកំពុងជាប់ពន្ធនាគារ។ ជាពិសេសពួកគេ ចង់ឲ្យបក្សកាន់អំណាច និងបក្សប្រឆាំង ដែលគ្រោងជួបគ្នាក្នុងពេលឆាប់ៗនេះ លើកយករឿងរបស់អ្នកជាប់ពន្ធនាគារខាងលើ ទៅពិភាក្សា ហើយរកដំណោះស្រាយរួមគ្នា។

«ដោះលែងមន្ត្រីសិទ្ធិមនុស្សទៅ! ដោះលែងអ្នកការពារដីធ្លីទៅ! ដោះលែងលោកស្រី ទេព វន្នីទៅ!»។ ទាំងនេះគឺជាសម្រែករបស់សកម្មជន និងប្រជាពលរដ្ឋក្នុងតំបន់បឹងកក់ ដែលរងគ្រោះដោយសារការបណ្តេញចេញពីលំនៅដ្ឋាន បានស្រែកនៅមុខក្រសួងមហាផ្ទៃ ដើម្បីស្នើឲ្យស្ថាប័នមួយនេះ ជួយរកដំណោះស្រាយ ក្នុងការផ្តល់សេរីភាព ដល់មន្ត្រីសិទ្ធិមនុស្ស និងអ្នកផ្សេងទៀត ដែលកំពុងជាប់ពន្ធនាគារ។

សកម្មជនទាំងនោះ បានបន្លឺឡើងនូវពាក្យខាងលើដដែលៗ ដោយអមជាមួយនឹងការលើកបង្ហាញរូបថតរបស់មន្ត្រីអាដហុកទាំង៤រូប រួមមានលោក នី សុខា លោក ណៃ វង់ដា លោក យី សុខសាន្ត និងលោកស្រី លឹម មុន្នី ព្រមទាំងលោក នី ចរិយា អគ្គលេខាធិការរងរបស់គ.ជ.ប ហើយនឹងលោកស្រី ទេព វន្នី។ ពួកគេ បានស្រែកតវ៉ា រហូតទាល់តែសកម្មជនមួយចំនួន ដែលបានយកញត្តិ ទៅជូនតំណាងក្រសួងមហាផ្ទៃ ត្រឡប់មកខាងក្រៅវិញ។

មន្ត្រីក្រសួងមហាផ្ទៃ បានប្រាប់លោកស្រី ប៉ូវ សោភា តំណាងសកម្មជនបឹងកក់ ថា ក្រសួងមហាផ្ទៃ មិនមានសមត្ថកិច្ចធ្វើអន្តរាគមន៍ ពាក់ព័ន្ធនឹងរឿងនេះទេ។ មន្ត្រីនោះ អះអាងថា ក្រសួងមហាផ្ទៃ នឹងរៀបចំឯកសារ និងញត្តិរបស់ប្រជាពលរដ្ឋ ដាក់ទៅកាន់ក្រសួងយុត្តិធម៌ ដែលជាស្ថាប័នមានសមត្ថកិច្ច ដោះស្រាយលើបញ្ហាខាងលើ។ នេះបើតាមលោកស្រី ប៉ូវ សោភា ដែលបានស្រង់សម្តីរបស់មន្ត្រីនោះ មកប្រាប់ក្រុមអ្នកសារព័ត៌មាន។

យ៉ាងណា លោកស្រី ប៉ូវ សោភា ដែលធ្លាប់ជាប់ពន្ធនាគារដែរនោះ ហាក់ដូចជាមានសង្ឃឹមថា ក្រសួងមហាផ្ទៃនឹងជួយអន្តរាគមន៍ ដោយលោកស្រីមានប្រសាសន៍ បែបនេះថា៖«ខាងក្រសួងមហាផ្ទៃ នឹងធ្វើលិខិតមួយជំរុញក្រសួងយុត្តិធម៌ ដើម្បីជួយរកកិច្ចអន្តរាគមន៍ពីបញ្ហាហ្នឹង។ គាត់មិនមានសិទ្ធិក្នុងការធ្វើអន្តរាគមន៍ សម្រាប់ពួកយើងទេ។ តែគាត់ក៏មិនព្រងើយកន្តើយដែរ។ ញត្តិរបស់ពួកយើង នឹងទៅដល់ដៃលោកឧបនាយករដ្ឋមន្ត្រី ស ខេង ហើយគាត់នឹងធ្វើការឆ្លើយតបជាមួយយើងវិញ។ ចំពោះញត្តិនេះ គាត់ថា គាត់នឹងជំរុញទៅក្រសួងយុត្តិធម៌បន្តទៀត»។

ការតវ៉ារបស់ប្រជាពលរដ្ឋ មិនមានការប៉ះទង្គិចគ្នាជាមួយអាជ្ញាធរឡើយ មានតែការប្រើពាក្យគំរោះគំរើយខ្លះៗ ពីសមត្ថកិច្ចទៅលើពួកគេ។ ក្នុងចំណោមសកម្មជនទាំងនោះក៏មាន ប្រជាពលរដ្ឋខ្លះ ឆ្លៀតប្រើសម្តីបែបឌឺដងតិចតួច ឲ្យសមត្ថកិច្ចវិញដែរ។ សកម្មជនមួយចំនួន និយាយថា៖«សមត្ថកិច្ចខ្លះ ធ្វើការស្រួលជាមួយប្រជាពលរដ្ឋ និងបម្រើប្រជាពលរដ្ឋ! តែសមត្ថកិច្ចខ្លះ ពិបាកអ៊ីចឹងទៅ»។

ក្រោយពីផ្តល់បទសម្ភាសដល់ក្រុមអ្នកសារព័ត៌មានរួចហើយសកម្មជន និងប្រជាពលរដ្ឋទាំងនោះ ក៏នាំគ្នាធ្វើដំណើរឆ្ពោះទៅកាន់រដ្ឋសភា ដើម្បីបន្តយកញត្តិទៅដាក់នៅស្ថាប័នកំពូលមួយនេះទៀត។ ពួកគេបានចាកចេញពីក្រសួងមហាផ្ទៃ នៅម៉ៅងជាង៩ព្រឹក។

មូលហេតុ ដែលសកម្មជនបឹងកក់ នាំគ្នាតវ៉ានៅថ្ងៃនេះ គឺដោយសារតែជំនួបចរចារវាងបក្សកាន់អំណាច និងបក្សប្រឆាំង កាន់តែជិតមកដល់។ សកម្មជនទាំងនោះ សង្ឃឹមថា ថ្នាក់ដឹកនាំនៃគណបក្សទាំង២ នឹងលើកយករឿងរបស់មន្ត្រីអាដហុក និងមន្ត្រីគ.ជ.ប រួមទាំងលោកស្រី ទេព វន្នី ទៅជជែកគ្នា ដើម្បីជួយពួកគេឲ្យបានរួចផុតពីការឃុំឃាំង។

កាលពីប៉ុន្មានថ្ងៃមុន ឯកឧត្តម កឹម សុខា អនុប្រធានគណបក្សសង្គ្រោះជាតិ បានសរសេរលិខិតទៅកាន់សម្តេច ស ខេង អនុប្រធានគណបក្សប្រជាជនកម្ពុជា ដើម្បីសុំជួបចរចា រឿងប្រទេសជាតិ។ សម្តេច ស ខេង បានយល់ព្រមនឹងសំណើរបស់ឯកឧត្តម កឹម សុខា ដោយឆ្លើយតបវិញថា ជំនួបនេះ អាចនឹងរៀបចំឡើងនៅក្រោយថ្ងៃទី១១ ខែមករា។

មន្ត្រីអាដហុក និងមន្ត្រីគ.ជ.ប បានជាប់ពន្ធនាគារ តាំងដើមខែឧសភា ឆ្នាំ២០១៦មកម្ល៉េះ ក្រោមបទចោទ «សូកប៉ាន់សាក្សី» និង បទចោទ «សមគំនិតក្នុងអំពើសូកប៉ាន់សាក្សី»។ ដើមហេតុ ដែលអ្នកទាំង៥រងបទចោទ គឺដោយសារតែលិខិតចំហ១ច្បាប់របស់នារីម្នាក់ ឈ្មោះខុម ចាន់តារ៉ាទី ហៅស្រីមុំ ដែលគេសង្ស័យថាមានទំនាក់ទំងស្នេហាលួចលាក់ជាមួយឯកឧត្តម កឹម សុខា។

បច្ចុប្បន្ននេះ សំណុំរឿងរបស់ពួកគេ ស្ថិតនៅក្នុងដៃរបស់ចៅក្រមស៊ើបសួរនៃសាលាដំបូងរាជធានីភ្នំពេញ។ ក្នុងដំណាក់កាលនេះ ចៅក្រមស៊ើបសួរ មានសិទ្ធិលើកលែងការចោទប្រកាន់ ហើយដោះលែងពួកគេឲ្យមានសេរីភាពវិញ ឬក៏បញ្ជូនសំណុំរឿងទៅជំនុំជម្រះនៅថ្ងៃណាមួយ។

ចំណែកលោកស្រី ទេព វន្នី ទើបតែជាប់ពន្ធនាគារម្តងទៀត កាលពីប៉ុន្មានខែមុន ក្នុងបទល្មើសដែលទាក់ទងនឹងអំពើហិង្សានៅក្បែរផ្ទះ សម្តេច ហ៊ុន សែន តាំងពី២០១៣ ម្ល៉េះ។ កាលនោះ លោកស្រី ទេព វន្នី ជាស្ត្រីម្នាក់ដែលជាប់ពន្ធនាគារច្រើនលើកច្រើនសាជាងគេនោះ បានចូលរួមជាមួយនឹងប្រជាពលរដ្ឋផ្សេងៗទៀត ដើម្បីទាមទារឲ្យតុលាការទម្លាក់ការចោទប្រកាន់លើលោកស្រី យ៉ោម បុប្ផា ដែលជាអតីតសកម្មជនបឹងកក់៕