ជាតិ
មេធាវី ស្នើទៅចៅក្រមស៊ើបសួរ ឲ្យដោះលែងមន្ត្រីអាដហុក និង មន្ត្រីគ.ជ.ប
× ភ្នំពេញ៖ មេធាវី ស្នើឲ្យចៅក្រមស៊ើបសួរ ដោះលែងមន្ត្រីអាដហុកនិងមន្ត្រីគ.ជ.ប តែម្តង នៅពេលដែលចៅក្រមស៊ើបសួរ ចេញដីកាដំណោះស្រាយ នាពេលខាងមុខ។ ប៉ុន្តែ អ្នកតាមដានស្ថានការណ៍នៅកម្ពុជា មិនមានជំនឿលើធម្យោបាយផ្លូវច្បាប់ឡើយ ថាអាចជួយមន្ត្រីសិទ្ធិមនុស្ស ឲ្យរួចផុតពីពន្ធនាគារ។
ក្រុមមេធាវី ដែលការពារក្តីឲ្យមន្ត្រីអាដហុក និងមន្ត្រីគ.ជ.ប បានដាក់លិខិតទៅកាន់ចៅក្រមស៊ើបសួរ នៃសាលាដំបូងរាជធានីភ្នំពេញ កាលពីថ្ងៃទី១០ មករា ដើម្បីសុំឲ្យលើកលែងការចោទប្រកាន់ ហើយដោះលែងកូនក្តីរបស់ពួកគេ ឲ្យមានសេរីភាពឡើងវិញ។ សព្វថ្ងៃនេះ សំណុំរឿងរបស់មន្ត្រីអាដហុកនិងមន្ត្រីគ.ជ.ប កំពុងតែស្ថិតក្នុងដៃចៅក្រមស៊ើបសួរ។
លោក សំ សុគង់ មេធាវីមួយរូប ក្នុងចំណោមមេធាវីទាំងប្រាំរូបរបស់មន្ត្រីអាដហុកនិងមន្ត្រីគ.ជ.ប បានប្រាប់សារព័ត៌មានថ្មីៗថា លោក បានស្នើឲ្យចៅក្រមស៊ើបសួរ ចេញដីកាដំណោះស្រាយ ឲ្យបានឆាប់រហ័ស។ លោក ពន្យល់ថា តាមរយៈដីកាដំណោះស្រាយ ចៅក្រមស៊ើបសួរ មានឆន្ទានុសិទ្ធិក្នុងការដោះលែងមន្ត្រីអាដហុក និងមន្ត្រីគ.ជ.ប ឬក៏បញ្ជូនសំណុំរឿងទៅជំនុំជម្រះ។
លោកមេធាវីរូបនេះ បានបញ្ជាក់បែបនេះថា៖«ខ្ញុំដាក់លិខិតទៅពីរ គឺទី១ សុំឲ្យចៅក្រមស៊ើបសួរ ចេញដីកាដំណោះស្រាយឲ្យបានលឿន ហើយទីពីរ នៅពេលដែលគាត់ ចេញដីកាដំណោះស្រាយ សុំឲ្យគាត់លើកលែងការចោទប្រកាន់លើកូនក្តីខ្ញុំតែម្តង»។
សំណុំរឿងរបស់មន្ត្រីអាដហុកនិងមន្ត្រីគ.ជ.ប ត្រូវបានបញ្ចប់ការស៊ើបសួរ តាំងពីថ្ងៃទី៧ ខែធ្នូ ឆ្នាំ២០១៦ មកម្ល៉េះ។ សម្រាប់នីតិវិធីបន្ត ចៅក្រមស៊ើបសួរ ត្រូវចេញដីកាដំណោះស្រាយមួយ ដោយសម្រេចថា ត្រូវដោះលែងមន្ត្រីអាដហុក និងមន្ត្រីគ.ជ.ប ឬក៏ត្រូវបញ្ជូនទៅជំនុំជម្រះ។ យ៉ាងណា រហូតមកដល់ពេលនេះ ចៅក្រមស៊ើបសួរ មិនទាន់ចេញដីកាដំណោះស្រា នៅឡើយទេ។ តាមនីតិវិធី ចៅក្រមស៊ើបសួរ មិនអាចរក្សាសំណុំរឿង ឲ្យហួសពី២០ថ្ងៃនោះទេ បន្ទាប់ពីខ្លួនបញ្ចប់ការស៊ើបសួរ។ ទាំងនេះ គឺជាការលើកឡើងរបស់លោកមេធាវី សំ សុគង់ ដដែល។
ទាក់ទងនឹងសំណុំរឿងខាងលើ លោក សូ ចន្ថា អ្នកតាមដានស្ថានការណ៍សង្គមនៅកម្ពុជា ពុំមានសង្ឃឹមបន្តិចសោះឡើយ ថាមន្ត្រីសិទ្ធិមនុស្សទាំងនោះ អាចនឹងមានឱកាសបានរួចផុតការឃុំឃាំង តាមរយៈការប្រើនីតិវិធីបែបនេះ។ លោក ចាត់ទុក សំណុំរឿងខាងលើថា ជាបញ្ហានយោបាយ ដូច្នេះត្រូវស្វែងរកដំណោះស្រាយផ្នែកនយោបាយ ទើបអ្នកជាប់ពន្ធនាគារទាំងនោះ អាចមានសង្ឃឹម ថាបានរួចផុតពីការឃុំឃាំង។
អ្នកតាមដានស្ថានការណ៍នយោបាយរូបនេះ លើកឡើងថា៖«បើមានការឯកភាពគ្នា ឬសម្របសម្រួលផ្នែកនយោបាយ ពួកគាត់ប្រហែលជាត្រូវបានដោះលែង ដោយឥតលក្ខខណ្ឌ។ តែបើអ្នកនយោបាយ នៅតែយកមន្ត្រីសិទ្ធិមនុស្ស និងពួកសង្គមស៊ីវិល ធ្វើជាចំណាប់ខ្មាំងនយោបាយបែបនេះ ការដោះលែង មើលទៅគ្មានពន្លឺទេ»។
ជុំវិញការបញ្ហានេះ លោក សុខ ឥសាន អ្នកនាំពាក្យគណបក្សប្រជាជនកម្ពុជា ធ្លាប់បដិសេធជាច្រើនលើកច្រើនសាមកហើយ ថាសំណុំរឿងរបស់អ្នកខាងលើ មិនពាក់ព័ន្ធនឹងនយោបាយនោះទេ តែវា ជាចំណាត់ការរបស់តុលាការ ដែលធ្វើទៅតាមគោលការណ៍នៃច្បាប់ ចំពោះបុគ្គលណា ដែលប្រព្រឹត្តបទល្មើស។ លោក សុខ ឥសាន ធ្លាប់អះអាងថា កម្ពុជា គ្មានអ្នកទោសនយោបាយនោះទេ គឺមានតែអ្នកនយោបាយ ដែលមានទោស។
សូមបញ្ជាក់ថា មន្ត្រីអាដហុកទាំងបួនរូប រួមមាន លោក នី សុខា លោក ណៃ វង់ដា លោក យីសុខសាន្ត និងលោកស្រី លឹម មុន្នី ព្រមទាំងលោក នី ចរិយា អគ្គលេខាធិការរងរបស់គ.ជ.ប ត្រូវបានតុលាការបញ្ជូនទៅឃុំខ្លួន កាលពីដើមខែឧសភា ឆ្នាំ២០១៦ ក្រោមបទចោទ «សូកប៉ាន់សាក្សី» និងបទចោទ «សមគំនិតក្នុងអំពើសូកប៉ាន់សាក្សី»។ បើតាមការចោទប្រកាន់របស់តុលាការ អ្នកទាំងប្រាំនាក់ សុទ្ធតែជាប់ពាក់ព័ន្ធនឹងរឿងរ៉ាវរបស់កញ្ញា ខុម ចាន់តារ៉ាទី ហៅស្រីមុំ ជាមួយនឹងឯកឧត្តម កឹម សុខា អនុប្រធានគណបក្សសង្គ្រោះជាតិ៕
© រក្សាសិទ្ធិដោយ thmeythmey.com