ជាតិ
គ.ជ.ប បន្តស្នើឲ្យពលរដ្ឋ ទៅមើលឈ្មោះ ខណៈការបិទផ្សាយបញ្ជីបោះឆ្នោត នឹងបញ្ចប់ឆាប់ៗនេះ
× ភ្នំពេញ៖ នៅសល់តែបួនថ្ងៃទៀតប៉ុណ្ណោះ ការបិទផ្សាយបញ្ជីបោះឆ្នោតដំបូង នឹងត្រូវបញ្ចប់។ គ.ជ.ប អំពាវនាវសាជាថ្មី ឲ្យប្រជាពលរដ្ឋ ប្រញាប់ទៅពិនិត្យឈ្មោះរបស់ខ្លួន។
គណៈកម្មាធិការជាតិរៀបចំការបោះឆ្នោត (គ.ជ.ប) បានវាយតម្លៃថា ប្រជាពលរដ្ឋជាច្រើន បាននាំគ្នាទៅពិនិត្យឈ្មោះរបស់ខ្លួន នៅក្នុងបញ្ជីបោះឆ្នោតដំបូង ដែលត្រូវបានបិទផ្សាយ តាមសាលាឃុំ-សង្កាត់ ចាប់តាំងពីថ្ងៃទី៣ ខែមករា ឆ្នាំ២០១៧មក។
យ៉ាងណា គ.ជ.ប នៅតែចេញសេចក្តីប្រកាសព័ត៌មាន ក្នុងថ្ងៃទី១១ មករានេះ ដើម្បីអំពាវនាវម្តងទៀត ឲ្យប្រជាពលរដ្ឋ ទៅពិនិត្យឈ្មោះ ឲ្យបានគ្រប់គ្នា។ ប្រជាពលរដ្ឋ ក៏អាចស្វែងរក និងពិនិត្យឈ្មោះរបស់ខ្លួន នៅក្នុងវិបសាយ
www.voterlist.org.kh ផងដែរ។
សេចក្តីប្រកាសព័ត៌មានខាងលើ បានបញ្ជាក់ថា៖«ក្នុងករណីបាត់ឈ្មោះ ឬឈ្មោះ និងរូបថត រួមទាំងនិន្នន័យផ្សេងៗ មិនត្រឹមត្រូវ សូមសាមីខ្លួន ប្តឹងតវ៉ាទៅក្រុមប្រឹក្សាឃុំ-សង្កាត់ ដើម្បីសុំការកែតម្រូវជាបន្ទាន់»។
ការបិទផ្សាយបញ្ជីបោះឆ្នោតដំបូង និងការផ្តល់ឱកាស ដល់ប្រជាពលរដ្ឋ សម្រាប់ការប្តឹងតវ៉ា ឬប្តឹងជំទាស់លើបញ្ជីបោះឆ្នោតដំបូង នឹងត្រូវបញ្ចប់នៅថ្ងៃទី១៤ ខែមករា ឆ្នាំ២១០៧។
នៅពេលដែល គ.ជ.ប ចាប់ផ្តើមបិទផ្សាយបញ្ជីបោះឆ្នោតដំបូង អ្នកនយោបាយពីគណបក្សធំៗ បានចេញមុខអំពាវនាវឲ្យប្រជាពលរដ្ឋជិត៨លាននាក់ ដែលបានចុះឈ្មោះបោះឆ្នោត ទៅពិនិត្យឈ្មោះរបស់ពួកគេឡើងវិញ។ ចំណែកឯ ក្រុមសង្គមស៊ីវិលមួយចំនួន ដែលធ្វើការពាក់ព័ន្ធនឹងការបោះឆ្នោត ក៏បានចូលរួមអំពាវនាវផងដែរ៕
© រក្សាសិទ្ធិដោយ thmeythmey.com