ជាតិ
គ.ជ.ប ប្រកាសវិធានការលើបណ្តឹងចំនួន ៧ នៅម៉ោង ៣រសៀលនេះ
× ភ្នំពេញ៖ ក្រុមប្រឹក្សាជំនុំជម្រះគណៈកម្មាធិការជាតិរៀបចំការបោះឆ្នោត បានបើកសវនាការជាសាធារណៈលើពាក្យបណ្ដឹងចំនួន៧ ជាលើកដំបូង ពាក់ព័ន្ធនឹងការចុះឈ្មោះបោះឆ្នោត កន្លងមក នៅថ្ងៃទី១៦ មករានេះ។ បណ្តឹងទាំង ៧ ជំទាស់នឹងសេចក្តីសម្រេចរបស់ គ.ជ.ប ធ្វើឡើងដោយភ្នាក់ងារគណបក្សសង្គ្រោះជាតិ ៥រាជធានីខេត្ត ដោយពួកគេថា ជនជាតិវៀតណាមមានអត្តសញ្ញាណបណ្ណសញ្ជាតិខ្មែរបានចុះឈ្មោះក្នុងបញ្ជីបោះឆ្នោតឆ្នាំ ២០១៦ កន្លងទៅ។
ភ្នាក់ងារគណបក្សប្រឆាំងតាមមូលដ្ឋាន ៥រាជធានីខេត្តបានរកឃើញថា ជនជាតិវៀតណាម ជាង ១០០នាក់ បានចុះឈ្មោះក្នុងបញ្ជីឈ្មោះបោះឆ្នោតឆ្នាំ ២០១៦។ នេះបើតាមពាក្យបណ្ដឹងចំនួន ៧ ចាប់ពីលេខ ០៤៦ ដល់ ០៥២ ដែលគ.ជ.ប យកមកពិភាក្សា នៅថ្ងៃនេះ។
លោក ឌិន វ៉ារិន តំណាងភ្នាក់ងារ CNRP ម្នាក់ បានប្រាប់ក្រុមប្រឹក្សាជំនុំជម្រះដែលដឹកនាំដោយលោក ស៊ិក ប៊ុនហុក ប្រធាន និងសមាជិក ៩រូបទៀតថា លោករកឃើញជនជាតិវៀតណាមចំនួន ២៧នាក់ បានចុះឈ្មោះក្នុងបញ្ជីបោះឆ្នោត ក្នុងការិយាល័យចុះឈ្មោះបោះឆ្នោតចំនួន ៣កន្លែង។
តំណាងអ្នកប្តឹងក្នុងសំណុំរឿង ០៤៦ ក្នុងសង្កាត់ផ្សារថ្មី២ ខណ្ឌដូនពេញ រាជធានីភ្នំពេញរូបនេះ បានបញ្ជាក់ហេតុផលដែលលោកថា ពួកគេជាជនជាតិវៀតណាមនោះ ដោយសារពួកគេនិយាយភាសាខ្មែរប៉ៃឡាំ។
«ខ្ញុំរស់នៅក្បែរពួកគេ ពួកគេនិយាយភាសាខ្មែរមិនច្បាស់ទេ។ ហេតុអ្វីពួកគេមានអត្តសញ្ញាណបណ្ណសញ្ជាតិខ្មែរចុះឈ្មោះបោះឆ្នោត»? ភ្នាក់ងារ CNRP វ័យជាង ៤០ ចំណោមភ្នាក់ងារមកពី ៥នៅរាជធានីភ្នំពេញខេត្តរូបនេះ បានបញ្ជាក់ក្រុមប្រឹក្សាជំនុះជម្រះ គ.ជ.ប មុនពេលលោកស្នើ គ.ជ.ប ឲ្យលុបឈ្មោះពួកគេចេញពីបញ្ជីឈ្មោះបោះឆ្នោតរួច កន្លងទៅ។
មិនខុសគ្នា លោក សំ សុគង់ មេធាវីរបស់ដើមបណ្តឹងភ្នាក់ងារគណបក្សសង្គ្រោះជាតិ (CNRP) មកពីខេត្តកំពង់ឆ្នាំង បានចោទសួរសំណួរ គ.ជ.ប ហេតុអ្វីពួកគេមានឈ្មោះក្នុងបញ្ជីបោះឆ្នោត? លោកបានសួរអង្គសវនាការ គ.ជ.ប នៅថ្ងៃទី១៦ មករា នេះដូច្នេះថា៖«តើពួកគេជាជនជាតិ វៀតណាមបានប្រកាសសញ្ជាតូបនីយកម្មតាមច្បាប់សញ្ជាតិខ្មែរឬទេ? ពួកគេបានចូលស្បថ នៅតុលាការកំពូលទេ? ឈ្មោះពួកគេមានក្នុងព្រះរាជក្រមរបស់ព្រះមហាក្សត្រទេ?
ប៉ុន្តែ ចុងចម្លើយដែលមានវត្តមានក្នុងសវនាការសុទ្ធតែអះអាងថា ពួកគេមានអត្តសញ្ញាណបណ្ណខ្មែរដែលអាចចុះឈ្មោះក្នុងបញ្ជីឈ្មោះបោះឆ្នោតដោយស្របច្បាប់។
លោក ស៊ិក ប៊ុនហុក ប្រធានក្រុមប្រឹក្សាជំនុះជម្រះ គ.ជ.ប ប្រកាសក្រោយសវនាការសាកសួរដើមបណ្តឹង សាក្សី តំណាងអាជ្ញាធរមូលដ្ឋាន និងចុងចម្លើយដែលមានវត្តមានជាង ៧០នាក់រយៈពេលជាង ២ម៉ោងថា ក្រុមប្រឹក្សាជំនុះជម្រះ គ.ជ.ប នឹងប្រកាសលទ្ធផល នៅម៉ោង ៣រសៀល ថ្ងៃទី១៦ ខែមករានេះ។
គួរបញ្ជាក់ជូនថា ក្រោយបញ្ចប់ការចុះឈ្មោះបោះឆ្នោតថ្មី ប្រជាពលរដ្ឋខ្មែរ ចំនួន ៧,៨៧៣,១៩៤ ស្នើនឹង៨១ភាគរយ បានទៅចុះឈ្មោះបោះឆ្នោត ក្នុងចំណោមប្រជាពលរដ្ឋដែលមានអាយុគ្រប់បោះឆ្នោតចំនួន ៩,៦៦៤,២១៦ លាននាក់។ ចំនួនដែលចុះឈ្មោះបានក្នុងបញ្ជីថ្មីនេះ ថយចុះជិត ២លាននាក់ ធៀបទៅនឹង ៩លាន ២ សែននាក់ដែល គ.ជ.ប បានចុះឈ្មោះសម្រាប់ការបោះឆ្នោតជ្រើសរើសក្រុមប្រឹក្សា ឃុំ-សង្កាត់ កាលពីឆ្នាំ២០១២៕
Tag:
ស៊ិក ប៊ុនហុក
គ.ជ.ប
© រក្សាសិទ្ធិដោយ thmeythmey.com