អ្នកវិភាគនិងសកម្មជនដីធ្លី ទទូចឲ្យបក្សទាំងពីរយករឿងមន្ត្រីសិទ្ធិមនុស្ស ទៅចរចា

ជាតិ

អ្នកវិភាគនិងសកម្មជនដីធ្លី ទទូចឲ្យបក្សទាំងពីរយករឿងមន្ត្រីសិទ្ធិមនុស្ស ទៅចរចា

16, Jan 2017 , 2:25 pm

រូបភាព

ដោយ: សារព័ត៌មានថ្មីៗ

ភ្នំពេញ៖ បក្សកាន់អំណាចនិងបក្សប្រឆាំងកំពុងស្វែងរកការជួបគ្នា មិនបានកំណត់របៀបរវារៈ ដែលទាក់ទងនឹងករណីមន្ត្រីអាដហុក និងមន្ត្រីគ.ជ.ប ឡើយ។ អ្នកតាមដានស្ថានការណ៍នយោបាយនៅកម្ពុជា និងសកម្មជនដីធ្លី អះអាងថា បក្សទាំងពីរមិនគួរ មើលរំលងករណីមន្ត្រីអាដហុក និងមន្ត្រីគ.ជ.ប នោះទេ។

សកម្មជនដីធ្លីនិងអ្នកវិភាគនយោបាយមួយចំនួនបានទទូចជាថ្មីម្តងទៀតឲ្យគណបក្សកាន់អំណាចនិងគណបក្សប្រឆាំងចរចារកដំណោះស្រាយនយោបាយដល់មន្ត្រីសិទ្ធិមនុស្សនិងមន្ត្រីគ.ជ.ប ដែលកំពុងជាប់ឃុំឃាំងក្នុងពន្ធនាគារ។ ការទទូចបែបនេះកើតមានឡើងនៅពេលមានលេចឮព័ត៌មានថ្មីថា គណបក្សទាំងពីរកំពុងបោះជំហានឈានទៅរកការជួបគ្នាម្តងទៀត ប៉ុន្តែដោយគ្មានករណីរបស់មន្ត្រីសិទ្ធិមនុស្សនិងមន្ត្រីគ.ជ.ប នៅក្នុងរបៀបវារៈរបស់គេឡើយ។

លោក មាស នី អ្នកវិភាគនយោបាយមួយរូប និយាយថា៖«ខ្ញុំសង្ឃឹមថា អ្នកនយោបាយនឹងបង្ហាញពីសុឆន្ទៈពិត ក្នុងការដោះស្រាយរឿងនេះ នៅក្នុងកិច្ចប្រជុំបិទទ្វារ។ បើមិនព្រមដោះលែងពួកគាត់ទេស្ថានការណ៍ប្រហែលជាមិនល្អប្រសើរឡើយ»។

អ្នកវិភាគនយោបាយមួយរូបទៀត លោក សូ ចន្ថា និយាយថា ស្ថានការណ៍នយោបាយនៅកម្ពុជា អាចដំណើរកាន់តែល្អប្រសើរ គឺទាល់តែបក្សទាំងពីរ ជជែកគ្នា ហើយស្វែងរកដំណោះស្រាយក្នុងការដោះលែងអ្នកទាំងប្រាំ។ អ្នកវិភាគរូបនេះ និយាយបែបនេះថា៖«ជាបំណងរបស់ខ្ញុំ ខ្ញុំចង់ឃើញ បក្សទាំងពីរ ជជែកគ្នា ហើយធ្វើយ៉ាងម៉េច ដើម្បីឲ្យស្ថានការណ៍ហ្នឹង មានប្រក្រតីភាព ដែលគ្រប់ភាគីមានឱកាសចូលរួបកសាងកម្ពុជា។ ជាពិសេស ការដោះលែងអ្នកទោសមនសិការ ឲ្យមានសេរីភាពឡើងវិញ មុនការបោះឆ្នោតមកដល់ វាជារឿងមួយដ៏ល្អ»។

ចំណែកឯ ក្រុមសកម្មជនបឹងកក់ រួមទាំងប្រជាពលរដ្ឋពីតំបន់ផ្សេងៗទៀត បានបន្តធ្វើយុទ្ធនាការ «ថ្ងៃចន្ទពណ៌ខ្មៅ» នៅព្រឹកថ្ងៃទី១៦ មករានេះ ដើម្បីទាមទារឲ្យដោះលែងមន្ត្រីអាដហុក និងមន្ត្រីគ.ជ.ប រួមទាំងលោកស្រី ទេព វន្នី។ នេះបើតាមការអះអាងរបស់លោកស្រី ប៉ូវ សោភា ដែលជាសកម្មជនបឹងកក់មួយរូប។

លោកស្រី ប៉ូវ សោភា សង្ឃឹមថា ថា្នក់ដឹកនាំនៃគណបក្សទាំងពីរ នឹងពិភាក្សាគ្នា ដើម្បីធ្វើយ៉ាងណាជួយឲ្យមន្ត្រីអាដហុក និងមន្ត្រីគ.ជ.ប រួមទាំងលោកស្រីទេព វន្នី មានសេរីភាពឡើងវិញ។ លោកស្រី បញ្ជាក់ដូច្នេះថា៖«ពួកខ្ញុំ នៅតែទន្ទឹងរង់ចាំមើលការដោះលែងពួកគាត់។ ឲ្យតែដោះលែងពួកគាត់ ពួកខ្ញុំនឹងបញ្ឈប់យុទ្ធនាការ ថ្ងៃចន្ទពណ៌ខ្មៅហើយ»។

ទាក់ទងនឹងបញ្ហាខាងលើ លោក យឹម សុវណ្ណ អ្នកនាំពាក្យគណបក្សសង្គ្រោះជាតិ និយាយយ៉ាងខ្លីថា កិច្ចចរចានាពេលខាងមុខ បានផ្តោតទៅលើស្ថានការណ៍នយោបាយ ដូច្នេះ វា ហាក់ដូចជា ក្តោបរាល់បញ្ហាទាំងអស់ បើទោះបីជាបញ្ហាខ្លះ មិនបានបង្ហាញចំៗក្នុងរបៀបវារៈក៏ដោយ។ លោកសង្កត់ធ្ងន់ថា៖«ចំណុច ដែលយើងដាក់ក្នុងរបៀបវារៈហ្នឹង គឺនិយាយពីបញ្ហានយោបាយ។ អ៊ីចឹងអ្វីៗដែលទាក់ទងនឹងបញ្ហានយោបាយ យើងនឹងលើកទៅនិយាយទាំងអស់»។

ដោយឡែក លោក សុខ ឥសាន អ្នកនាំពាក្យគណបក្សប្រជាជនកម្ពុជាឯណោះវិញ មិនបកស្រាយអ្វីច្រើននោះទេ ជុំវិញជំនួបនេះ។ លោកនៅតែនិយាយដដែលថា ករណីមន្ត្រីអាដហុកនិងមន្ត្រីគ.ជ.ប គឺស្ថិតនៅក្រោមចំណាត់ការរបស់តុលាការ ដែលស្ថានប័នដដៃមិនអាចលូកដៃចូលនោះទេ។

អ្នកនាំពាក្យបក្សកាន់អំណាចរូបនេះ លើកឡើងបែបនេះថា៖«ឲ្យពួកគាត់ (អ្នកវិភាគនិងសកម្មជនដីធ្លី) ទៅជំរុញតុលាការទៅ ព្រោះរឿងហ្នឹង គឺជារឿងតុលាការ។ វា មិនពាក់ព័ន្ធអ្វី ទៅនឹងបក្សនយោបាយទេ»។

សូមបញ្ហាក់ថា មន្ត្រីអាដហុក និងមន្ត្រីគ.ជ.ប បានជាប់ពន្ធនាគារ តាំងពីដើមខែឧសភា ឆ្នាំ២០១៦ មកម្ល៉េះ ក្រោយបទចោទ «សូកប៉ាន់សាក្សី» និងបទ «សមគំនិតក្នុងអំពើសូកប៉ាន់សាក្ស៊ី»។ តាមការរកឃើញរបស់តុលាការ អ្នកទាំងប្រាំ សុទ្ធតែជាប់ពាក់ព័ន្ធនឹងរឿងអាស្រូវរបស់កញ្ញា ខុម ចាន់តារ៉ាទី ហៅស្រីមុំ ជាមួយនឹងឯកឧត្តម កឹម សុខា អនុប្រធានគណបក្សសង្គ្រោះជាតិ៕