ជាតិ
សត្វស្លាបជិតផុតពូជនៅដែនជម្រកលំផាត់ អាចមានសង្ឃឹមឡើងវិញ
× ភ្នំពេញ៖ សត្វស្លាបជិតផុតពូជជាច្រើនប្រភេទអាចមានសង្ឃឹមវិញហើយ ក្រោយអនុក្រឹត្យស្តីពីការកំណត់ និងការបែងចែកការគ្រប់គ្រងនៅដែនជម្រកសត្វព្រៃលំផាត់ ត្រូវបានអនុវត្តន៍ស្របតាមខ្លឹមសារនោះ។
ដែនជម្រកសត្វព្រៃលំផាត់ ដែលមានទីតាំងជាប់ខេត្តរតនគិរី និងមណ្ឌលគិរី ត្រូវបានគេស្គាល់ថា ជាកន្លែងអភិរក្សសត្វស្លាបកម្រជាច្រើន ដូចជា ត្រយងចង្កំកស ត្រយងយក្ស ត្មាតផេះ ត្មាតត្នោត និងត្មាតភ្លើង និងថនិកសត្វ ដូចជា រមាំង ទន្សោង និងខ្លាធំជាដើម។ ផ្ទៃដីទំហំ២៥ម៉ឺនហិចតារបស់ដែនជម្រកសត្វព្រៃលំផាត់ ត្រូវបានប្រមុខរដ្ឋាភិបាលកម្ពុជា ចេញអនុក្រឹត្យកាលពីថ្ងៃទី៥ មករា ឆ្នាំ២០១៧ ដើម្បីកំណត់ និងបែងចែកតំបន់គ្រប់គ្រងជា៤តំបន់ ដែលនេះ គឺជាក្តីសង្ឃឹមរបស់សត្វព្រៃកម្រទាំងនេះ ដែលកំពុងរងការគំរាមកំហែងដោយការបរបាញ់ ការកាប់ឈើខុសច្បាប់ និងការទន្ទ្រានយកដីជាដើម។ នេះបើតាមសេចក្តីប្រកាសព័ត៌មានរបស់អង្គការជីវិតសត្វស្លាបអន្តរជាតិ។
សេចក្តីប្រកាសព័ត៌មានខាងលើ បានបន្តថា ផែនការនេះ នឹងជួយគាំទ្រដល់ការគ្រប់គ្រងឲ្យមាននិរន្តរភាព ដោយមិនមានការការរំខាន និងការទន្ទ្រានទីតាំងដែលនៅសេសសល់ ហើយមានតម្លៃអភិរក្សជាអន្តរជាតិរបស់ដែនជម្រកសត្វព្រៃនេះផងដែរ។
លោក ប៊ូ វរសក្ស នាយកកម្មវិធីអង្គការជីវិតសត្វស្លាបអន្តរជាតិប្រចាំកម្ពុជា បានថ្លែងថា ការបែងចែកតំបន់គ្រប់គ្រងនេះ នឹងការពារមិនឲ្យមានដីសម្បទានសេដ្ឋកិច្ចថ្មី និងការពង្រីកដីសម្បទានដែលមានស្រាប់។ លោកនិយាយថា៖«ផែនការនេះ បានកំណត់ទីតាំងសម្រាប់ឲ្យសហគមន៍បង្កើតជាតំបន់ការពារសហគមន៍ធម្មជាតិ ហើយនឹងពង្រឹងដល់សិទ្ធិក្នុងការប្រើប្រាស់ធនធានធម្មជាតិដោយនិរន្តរភាពរបស់ពួកគាត់ផងដែរ»។
ចាប់តាំងពីឆ្នាំ២០១១ ផ្ទៃដីជិត៥ម៉ឺនហិកតារបស់ដែនជម្រកសត្វព្រៃនេះ ត្រូវបានប្រគល់ទៅឲ្យក្រុមហ៊ុនដីសម្បទានសេដ្ឋកិច្ចមកពីប្រទេសវៀតណាម ចិន និងកម្ពុជាចំនួន៦។ ដីសម្បទានសេដ្ឋកិច្ចនេះ មិនត្រឹមតែបង្កើតទំនាស់ជាមួយប្រជាសហគមន៍នោះទេ ប៉ុន្តែ វាបានធ្វើឲ្យខូចខាតដល់គម្របព្រៃឈើ បាត់បង់ប្រភេទសត្វព្រៃ និងទីជម្រកសំខាន់ៗរបស់ពួកវាទៀតផង។
យ៉ាងណាក៏ដោយ លោក សាយ សំអាល់ រដ្ឋមន្ត្រីក្រសួងបរិស្ថាន នៅពេលថ្មីៗនេះ បានប្រសាសន៍ថា៖«ការកំណត់ និងការបែងចែកការគ្រប់គ្រងតំបន់ដែនជម្រកសត្វព្រៃលំផាត់នេះ នឹងធានាប្រសិទ្ធភាពក្នុងការគ្រប់គ្រង និងកាត់បន្ថយទំនាស់រវាងអ្នកគ្រប់គ្រង និងអ្នកប្រើប្រាស់ធនធានធម្មជាតិ»។
អនុក្រឹត្យចុះថ្ងៃទី៥ មករា ដែលបានកំណត់ និងបែងចែកការគ្រប់គ្រងតំបន់ដែនជម្រកសត្វព្រៃលំផាត់នេះ បានទទួលការអបអរសាទរ ពីប្រជាសហគមន៍ផងដែរ។ លោក ធុន សុផាន់ ប្រធានគណៈកម្មការសហគមន៍ការពារធម្មជាតិអូររ៉ៃ បាននិយាយថា៖ «សហគមន៍របស់យើងខ្ញុំ សប្បាយរីករាយក្នុងចូលរួមជាមួយមន្ត្រីដែនជម្រក ដើម្បីទប់ស្កាត់ការកាប់ឈើ និងការទន្ទ្រានយកដីខុសច្បាប់»។
ទោះបីជាមានអនុក្រឹត្យរបស់រដ្ឋាភិបាលក្តី អង្គការជីវិតសត្វស្លាបអន្តរជាតិ បានផ្តល់យោបល់ថា ដើម្បីកំណត់ និងការបែងចែកតំបន់គ្រប់គ្រង គឺត្រូវការបោះបង្គោលព្រំប្រទល់ ការអប់រំផ្សព្វផ្សាយដល់ប្រជាសហគមន៍ រៀបចំ និងអនុវត្តន៍ពិធីសារសម្រាប់តំបន់នីមួយៗ គាំទ្រ និងកសាងសមត្ថភាពរបស់ប្រជាសហគមន៍ក្នុងការគ្រប់គ្រងសហគមន៍របស់ពួកគេជាដើម។
សូមបញ្ជាក់ថា តំបន់ដែនជម្រកសត្វព្រៃលំផាត់ បានផ្តល់ជម្រកដល់សត្វជាច្រើន ដូចជា ដំរី គោព្រៃ ខ្ទីង ខ្លា ក្របីព្រៃ ខ្លាឃ្មុំ ប្រភេទសត្វមំសាសី និងពពួកសត្វស្វា និង មានសត្វស្លាបប្រហែល១០០ប្រភេទផងដែរ។ នេះបើតាមគេហទំព័ររបស់ក្រសួងទេសចរណ៍។ ក្រៅពីផ្តល់ជម្រកដល់សត្វព្រៃ ដែនជម្រកសត្វព្រៃលំផាត់ ក៏ជាជម្រក និងប្រភពចំណូលរបស់អ្នកស្រុកជាង១០០គ្រួសារ ដែលភាគច្រើនជាជនជាតិព្នង។ ពួកគេចិញ្ចឹមជីវិតដោយប្រើប្រាស់ធនធានធម្មជាតិ ដូចជា ការយកជ័រឈើ វ័ល្លិ៍ ផ្តៅ រុក្ខជាតិស្មៅ និងផ្លែឈើនៅក្នុងព្រៃផ្សេងៗទៀត៕
© រក្សាសិទ្ធិដោយ thmeythmey.com